Abşeron yarımadasının şimalında dairəvi yolların yaradılması ideyası var

"Prezident İlham Əliyev tərəfindən təsdiqlənən "Bakı şəhərində və ətraf ərazilərdə nəqliyyat infrastrukturunun təkmilləşdirilməsinə dair 2025-2030-cu illər üçün Dövlət Proqramı" Bakı şəhəri və Abşeron yarımadasında nəqliyyat infrastrukturunun yaxşılaşdırılması ilə bağlı ikinci dövlət proqramıdır. İlk Dövlət proqramı 2006-cı ildə qəbul olunmuşdu və o vaxt proqram çərçivəsində Bakıda yolların yenidən qurulması, müəyyən yol qovşaqlarının salınması, çoxlu körpü, tunel tikintisi, küçələrin genişləndirilməsi işləri icra edilmişdi".

Bu sözləri "Azərbaycan" qəzetinə nəqliyyat eksperti Ərşad Hüseynov deyib. O xatırladıb ki, həmin proqram əsasında şəhərdə kiçik avtobusları irihəcmli nəqliyyat vasitələri əvəz edib. Yeni Dövlət proqramı isə daha geniş, əhatəli sənəddir. Görülən işlərin davamı və dayanıqlı olması yaxşı haldır. Yeni proqramda üç istiqamətdə tədbirlər nəzərdə tutulur. Birincisi, nəqliyyat infrastrukturu ilə bağlı məsələlərdir. Burada müəyyən yolların yenidən tikilməsi, genişləndirilməsi, qovşaqların yaradılması və sair nəzərdə tutulur. Əsas diqqət paytaxtın şimal və şimal-qərb tərəfindən şəhərə gediş-gəlişin yaxşılaşdırılmasına yönəlib. Abşeron yarımadasının şimalında dairəvi yolların yaradılması ideyası var, bu da müsbət qarşılanmalıdır. "Sabunçu-Sulutəpə, Pirşağı-Novxanı-Saray qəsəbəsindən keçərək Bakı-Şamaxı yoluna birləşən yollar Abşeron yarımadasının yükünü xeyli azaldacaq və Şamaxı istiqamətində hərəkət üçün Bakı şəhərinə daxil olmağa ehtiyac qalmayacaq. Mərdəkandan Lökbatana getmək istəyən də şəhərə daxil olmayacaq, Sabunçudan Sulutəpə yolu ilə Lökbatana keçəcək. Layihələrdən bəziləri küçələrin təkmilləşdirilməsinə yönəlikdir. Bu layihələr çərçivəsində Ziya Bünyadov prospektinin vəziyyətinin əhəmiyyətli dərəcədə yaxşılaşdırılması nəzərdə tutulur. Bu prospektdən Bakı dairəvi yoluna keçid verilməsi planlaşdırılır. 20 Yanvar qovşağının yaxşılaşdırılması görüləcək işlər sırasındadır", - deyə o əlavə edib. 

Ekspert qeyd edib ki, Dövlət proqramında yer alan tədbirlər şəhərin yol-nəqliyyat infrastrukturunu yaxşılaşdıracaq. İkinci istiqamət ictimai nəqliyyatın və mobilliyin inkişafı ilə bağlıdır. Mobillik üçün şəraitin yaxşılaşdırılması, yeni metro stansiyalarının salınması, avtobusların sayının artırılması, Bakıətrafı qatar şəbəkəsinin genişləndirilməsi, yeni qatarlar alınması, tramvay xəttinin çəkilməsi,  Mehdiabad - 28 May istiqamətində kütləvi sərnişindaşıma vasitəsi, yəni metrobusların təşkili nəzərdə tutulur. Bütün bunlar tətbiq olunsa, yollarda əhəmiyyətli dəyişikliklər olacaq. 

Ə.Hüseynov vurğulayıb ki, Dövlət proqramının uğurlu olması ikinci istiqamətdə olan tədbirlərlə bağlıdır: "İctimai nəqliyyatın sürətli və dayanıqlı inkişafı üçün tədbirlər görülməsə, yeni yollar çəkilsə belə yenə tıxaclar olacaq. Bu baxımdan mobilliyin sırf alternativ ictimai nəqliyyat üzrə inkişafı vacibdir. Tramvay, metro, şəhərətrafı qatarlar, əlçatanlıq, xidmət keyfiyyətinin qaldırılması - bütün bunlar həll olunsa, uğurlu nəticələr görə biləcəyik". 

Ekspert bildirib ki, üçüncü istiqamət isə təhsil müəssisələrinin mobilliyə təsiri məsələsidir. Bu məsələ ciddi araşdırılmalıdır. Söhbət hansısa universitetin, məktəbin köçürülməsindən getmir. Bakı ətrafındakı ərazilərdən şagirdlərin şəhər daxilindəki məktəblərə gətirilməsi halları çoxdur. Yaxşı olar ki, Bakı ətrafında yeni məktəblər tikilsin, mövcud məktəblərin şəraiti, pedaqoji heyətin fəaliyyəti yaxşılaşdırılsın ki, əhali oradakı məktəbi bəyənib şəhər məktəblərinə üz tutmasın. Tələbələrin mobilliyi ilə bağlı ciddi işlər görülməlidir. 

Proqramda iş saatlarının dəyişdirilməsi məsələsinin də yer aldığını qeyd edən Ə.Hüseynov deyib ki, dövlət qurumlarında, tibb və digər müəssisələrdə çalışanların eyni vaxtda işə gedib qayıtdıqda yollarda vəziyyət daha dözülməz olur. Müəssisələr dəyişkən iş qrafikinə keçərsə,  pik saatın vaxtı uzanar, yük daha uzun müddətə paylanar. Onda küçələr eyni vaxtda yüklənməz. Biri var on min insan yarım saat müddətində harasa gedə, bir də var ki, iki saata ünvana çata. Bundan başqa, sənəddə yollarda təhlükəsizliklə bağlı tədbirlər də yer alıb. Hər yerdə piyada keçidləri işıqlandırılmalıdır. Proqramın icrası nəticəsində kəsintisiz səki olmalı, səkilərdə maneələr aradan qaldırılmalıdır. 

Ə.Hüseynov sonda qeyd edib ki, Dövlət proqramının icrası nəticəsində yaxın 5 ildə Bakıda və şəhər ətrafında mobilliklə bağlı mənzərə əhəmiyyətli dərəcədə dəyişəcək.

Əsmər QARDAŞXANOVA,

"Azərbaycan"