Noyabrın 21-də Bakıda Ümummilli Lider Heydər Əliyevin anadan olmasının 100-cü ildönümünə və Türkdilli Ölkələrin Parlament Assambleyasının (TürkPA) 15 illiyinə həsr olunmuş konfrans keçirilib.

AZƏRTAC xəbər verir ki, konfransın Ulu Öndər Heydər Əliyevin 100 illiyinə həsr olunan hissəsində çıxış edən Türkiyə Böyük Millət Məclisinin (TBMM) sədr müavini Bekir Bozdağ Türkiyə, Azərbaycan və Türk dünyasının digər ölkələrinin tarixi dostluqlarını, qardaşlıqlarını möhkəmləndirmək üçün çalışdıqlarını vurğulayıb. Hazırda Türkiyə Prezidenti Rəcəb Tayyib Ərdoğanın, Azərbaycan Prezidenti İlham Əliyevin və digər Türk dövlətlərinin başçılarının əlaqələri genişləndirmək üçün genişmiqyaslı işlər gördükləri diqqətə çatdırılıb.

Bildirib ki, parlamentlərarası əlaqələr xalqlarımız arasındakı münasibətlərin daha da inkişaf etdirilməsinə xidmət göstərir. Dünyadakı hazırkı mürəkkəb vəziyyət Türk dövlətlərinin birlikdə olmasını zərurətə çevirir.

Bekir Bozdağ dövlətlərarası münasibətləri “Bir millət, yeddi dövlət” olaraq inkişaf etdirməyin əhəmiyyətindən danışıb.

Qırğız Respublikasının Joqorku Keneşinin üzvü Dastanbek Cumabekov çıxışında diqqətə çatdırıb ki, Ulu Öndər Heydər Əliyev Azərbaycanın beynəlxalq aləmdə nüfuzunun artması istiqamətində böyük işlər görüb. Onun hakimiyyətə gəlməsi ilə Azərbaycanda parlament inkişaf edib, əhalinin sosial rifahı yaxşılaşıb, iqtisadiyyat dirçəlib.

O əlavə edib ki, Ümummilli Liderin vətənpərvərliyinin Qarabağın işğaldan azad edilməsində mühüm rolu olub.

Türkiyə Böyük Millət Məclisinin digər üzvü Ahmet Zenbilci isə qeyd edib ki, ki, Ulu Öndər Heydər Əliyev Türk dünyası üçün gördüyü işlərlə yaddaşlarda böyük iz qoyub. Bu gün Azərbaycan ilə Türkiyə arasında bənzərsiz münasibətlər hökm sürürsə, bunda Ümummilli Liderin böyük əməyi var.

Ahmet Zenbilci bildirib ki, bundan sonra da Azərbaycan ilə Türkiyə arasındakı münasibətlər ən yüksək səviyyəyə qaldırmaq üçün işlər görüləcək.

Milli Məclisin deputatı Əhliman Əmiraslanov vurğulayıb ki, Ulu Öndər Heydər Əliyev Türk dövlətlərinin əlaqələrinin inkişafı, birliyi üçün çox iş görüb.

“Bu gün Ulu Öndər Heydər Əliyevin ruhu şaddır. Çünki Ümummilli Liderin Türk dünyası ilə bağlı arzuları reallaşıb”,- deyə o qeyd edib.

Milli Məclisin deputatı Hikmət Babaoğlu Azərbaycanın və Türkiyənin tarixən davam edən qardaşlıq münasibətlərinin hazırda ən yüksək səviyyəyə çatdığını vurğulayıb. Keçirilən belə tədbirlərin Türk dövlətləri arasında əlaqələri daha da inkişaf etdirdiyini diqqətə çatdırıb.

Tədbirin TürkPA-nın 15 illiyinə həsr olunmuş hissəsində çıxış edən qurumun Baş katibi Mehmet Süreyya Er deyib: “TürkPA-nın gördüyü işlər üzv dövlətlər tərəfindən hər zaman dəstəklənib. TürkPA regional və beynəlxalq təşkilatlarla geniş əlaqələr qurub, münasibətlərini genişləndirir”.

O əlavə ki, Türk dünyasında gedən proseslərdə TürkPA fəallıq nümayiş etdirir.

Türkiyə Böyük Millət Məclisinin üzvü Osman Mesten vurğulayıb ki, hazırda Şərq dövlətləri inkişaf mərhələsinə qədəm qoyub. Buna zəmin yaradan bir neçə amil var. Belə ki, ortaq tarix və dil, əhalinin artan sayı birgə əməkdaşlığı inkişaf etdirən əsas məsələlərdəndir.

O deyib ki, qlobal imperializmə, eyni zamanda, islamofobiyaya qarşı mübarizə üçün Türk dünyasının birgə əməkdaşlığı vacibdir.

Digər çıxış edənlər Türk dünyasının birləşməsinin tarixi zərurətə çevrildiyini vurğulayıblar. Ortaq mədəniyyətin, tarixin, dilin, dinin qarşılıqlı əməkdaşlığın inkişafına zəmin yaratdığı diqqətə çatdırılıb. Eyni zamanda, Türk dövlətlərinin bütün sahələrdə əməkdaşlığının önəmi qeyd olunub, bu barədə təkliflər səsləndirilib.

Tədbirdə Türk dövlətləri arasında təhsil sahəsində münasibətlərin, o cümlədən əlifba və dil birliyinin vacibliyi, tələbə təqaüdlərinin təsis olunmasının əhəmiyyəti barədə fikir mübadiləsi aparılıb.

Konfrans TürkPA-nın keçmişi, bugünkü vəziyyəti və perspektivləri haqqında müzakirələrlə yekunlaşıb.

Sonra ailə fotosu çəkdirilib.

Qeyd edək ki, konfransda Milli Məclisin deputatları, Türkiyənin, Qırğızıstanın, Özbəkistanın, Şimali Kiprin, həmçinin Qara Dəniz İqtisadi Əməkdaşlıq Təşkilatının (QİƏT), “Türk Kültür və Sənətləri Ortaq Yönətimi”nin (TÜRKSOY), Türk Dövlətləri Təşkilatının (TDT), Müstəqil Dövlətlər Birliyinin (MDB) nümayəndələri iştirak ediblər.