Vyetnam Sosialist Respublikası Kommunist Partiyasının Mərkəzi Komitəsinin Baş katibi To Lamın Azərbaycana rəsmi səfərini iki ölkənin münasibətlərində yeni mərhələnin başlanğıcı kimi dəyərləndirmək olar. Bu səfər çərçivəsində Prezident İlham Əliyev və Baş katib To Lam arasında geniştərkibli və təkbətək görüşlər keçirildi, müxtəlif sahələr üzrə əməkdaşlığın genişləndirilməsi məsələləri müzakirə olundu. Əldə olunmuş razılaşmalar iki ölkə arasında münasibətləri strateji tərəfdaşlıq səviyyəsinə yüksəldib. Səfər çərçivəsində imzalanmış “Azərbaycan Respublikası ilə Vyetnam Sosialist Respublikası arasında Strateji Tərəfdaşlığın qurulması haqqında Birgə Bəyanat” isə münasibətləri daha yüksək mərhələyə daşıyacaq ciddi siyasi sənəddir.
Bu barədə «Azərbaycan» qəzetinə açıqlamasında Milli Məclisin deputatı Müşfiq Məmmədli bildirib. Ölkələrimizin iqtisadi və ticarət əlaqələrinin genişləndirilməsi istiqamətində prioritetlərdən danışan deputatın sözlərinə görə, Azərbaycan ilə Vyetnam arasında iqtisadi əməkdaşlıq üçün böyük potensial mövcuddur. Tərəflər energetika, ticarət, sərmayə qoyuluşu, nəqliyyat, mədəniyyət və təhsil sahələrində əlaqələrin daha da dərinləşdirilməsi barədə razılığa gəliblər. Energetika sahəsində imzalanmış Anlaşma Memorandumu və SOCAR ilə “PetroVietnam” arasında əldə olunmuş razılaşma qarşılıqlı investisiya imkanlarını genişləndirməyə imkan verəcək. Azərbaycanın bərpaolunan enerji sahəsində böyük layihələri icra olunur və bu sahəyə Vyetnam şirkətlərinin də sərmayə qoyması üçün şərait mövcuddur. Azərbaycan tərəfi də öz növbəsində Vyetnamda enerji layihələrinə investisiya yatırmağa hazır olduğunu bəyan edib.
Səfər çərçivəsində ticarət dövriyyəsinin artması və diversifikasiyası ilə bağlı da geniş fikir mübadiləsinin aparıldığını diqqətə çatdıran Müşfiq Məmmədli əlavə edib ki, hazırda Azərbaycan və Vyetnam arasındakı ticarət dövriyyəsi əsasən neft ixracına əsaslanır. Gələcəkdə ticarət dövriyyəsinin daha balanslı və dayanıqlı inkişafı üçün yeni layihələr və investisiya imkanlarının araşdırılması zəruridir.
“Səfər zamanı iki ölkənin müdafiə nazirlikləri arasında müdafiə sahəsində əməkdaşlıq haqqında Anlaşma Memorandumu da imzalanıb. Hər iki ölkənin müdafiə sənayesi sahəsində təcrübəsi və imkanları mövcuddur və birgə müəssisələrin yaradılması bu sahədə əməkdaşlığı daha da gücləndirə bilər. Bundan əlavə, Şimal-Cənub və Şərq-Qərb nəqliyyat dəhlizləri vasitəsilə qarşılıqlı ticarətin stimullaşdırılması imkanları müzakirə olunub. Tərəflər bu dəhlizlərin hər iki ölkənin tranzit imkanlarını artırmaqla yanaşı, regional və beynəlxalq əməkdaşlığa töhfə verəcəyini bildiriblər”, - deyə deputat bildirib.
O, iki ölkə arasında elm, texnologiya və rəqəmsal inkişaf sahəsində yeni imkanlardan da danışıb. Bildirib ki, səfər zamanı, həmçinin elm, texnologiya və rəqəmsal inkişaf sahələrində əməkdaşlıq haqqında Anlaşma Memorandumu imzalanıb. Bu sahədə də potensial kifayət qədər yüksəkdir və birgə layihələrin reallaşdırılması hər iki ölkənin iqtisadiyyatına əlavə dəyər qatacaq. Eyni zamanda, mədəniyyət və arxiv işi sahəsində əməkdaşlıq haqqında sənədlər imzalanıb. Tərəflər arasında mədəniyyət, incəsənət və turizm sahəsində qarşılıqlı layihələrin həyata keçirilməsi barədə razılıq əldə olunub.
“Azərbaycan Prezidenti İlham Əliyev də iki ölkənin BMT və Qoşulmama Hərəkatı çərçivəsində səmərəli əməkdaşlığını vurğulayıb. Azərbaycanın Qoşulmama Hərəkatına sədrliyi dövründə Vyetnamın dəstəyini yüksək qiymətləndirən dövlətimizin başçısı beynəlxalq hüququn aliliyi, ərazi bütövlüyü və suverenlik prinsiplərinin müdafiəsində vahid mövqedən çıxış etdiklərini qeyd edib”, - deyə Müşfiq Məmmədli bildirib.
Onun sözlərinə görə, Prezident İlham Əliyevlə Vyetnamın dövlət başçısı To Lam arasında keçirilən görüş və imzalanmış sənədlər iki ölkə arasında münasibətlərin yeni mərhələyə qədəm qoyduğunu təsdiqləyir. Bu səfər təkcə diplomatik münasibətlərin genişlənməsi deyil, eyni zamanda, iqtisadi, enerji, nəqliyyat, mədəniyyət və müdafiə sənayesi sahələrində konkret nəticələr doğuracaq strateji əməkdaşlıq yolunda əhəmiyyətli bir addımdır. İmzalanmış “Strateji Tərəfdaşlıq haqqında Birgə Bəyanat” iki ölkə arasında əlaqələrin yalnız ikitərəfli deyil, həm də regional və beynəlxalq əməkdaşlıq platformalarında daha aktiv şəkildə davam etdirilməsinə imkan verəcək. Xüsusilə beynəlxalq hüququn aliliyi, ərazi bütövlüyü və suverenlik məsələlərində vahid mövqenin nümayiş etdirilməsi tərəflərin siyasi baxımdan tam həmrəyliyini təsdiqləyir.
İqtisadi sahədəki razılaşmaların isə Azərbaycan və Vyetnam arasında ticarət dövriyyəsinin balanslaşdırılmasına və yeni investisiya layihələrinin reallaşdırılmasına yol açacağını deyən Müşfiq Məmmədlinin sözlərinə görə, energetika, bərpaolunan enerji və nəqliyyat-logistika sahəsində qarşılıqlı investisiyaların qoyulması yaxın gələcəkdə iki ölkə iqtisadiyyatına ciddi töhfə verə bilər. Xüsusilə Azərbaycanın bərpaolunan enerji potensialına Vyetnam şirkətlərinin cəlb olunması və eyni zamanda, SOCAR-ın Vyetnamda sərmayə layihələrinə maraq göstərməsi enerji əməkdaşlığını strateji müstəviyə çıxaracaq. Müdafiə sənayesi sahəsində əməkdaşlıq memorandumu isə regional təhlükəsizlik və hərbi-texniki əməkdaşlıq baxımından yeni imkanlar yaradır. Bu istiqamətdə təcrübə və texnologiya mübadiləsi, həmçinin birgə müəssisələrin yaradılması gələcəkdə regional təhlükəsizlik məsələlərində tərəflərin imkanlarını daha da artıracaq.
“Bir sözlə bu səfər Azərbaycan diplomatiyasının Asiya istiqamətindəki siyasətində əlamətdar hadisə kimi tarixə düşəcək. İmzalanmış sənədlər və əldə olunan razılaşmalar yalnız iki ölkənin deyil, bütövlükdə regionun iqtisadi və siyasi maraqlarına xidmət edəcək, Cənubi Qafqazla Cənub-Şərqi Asiya arasında strateji tərəfdaşlıq platformasının formalaşmasına töhfə verəcək”, - deyə Müşfiq Məmmədli qeyd edib.
Rəşad CƏFƏRLİ
“Azərbaycan”
jpg_1749076194.jpg)
