Dünyanın "yaşıl enerji"yə transformasiya nəbzi Azərbaycanda döyünəcək

BMT Təhlükəsizlik Şurasına, Qoşulmama Hərəkatı və Türk Dövlətləri Təşkilatı kimi beynəlxalq təsisatlara uğurlu sədrlik edən, Avropa Oyunlarının standartlarını müəyyənləşdirən, İslam Həmrəyliyi Oyunlarına, siyasi-iqtisadi beynəlxalq forumlara, konfranslara ən layiqli şəkildə evsahibliyi ilə nüfuzunu artıran Azərbaycan indi müstəqillik tarixinin ən böyük tədbirinə - BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu qlobal konfransına (COP29) hazırlaşır.

Gələn həftə dünyanın nəzəri Azərbaycana yönələcək.

Əlbəttə ki, irimiqyaslı beynəlxalq tədbirlərin keçirilməsi ölkəmizin üzərinə böyük məsuliyyət qoyur. Ancaq bu sahədəki təcrübə yetərlidir ki, bu beynəlxalq konfransı da ən yüksək səviyyədə keçirə bilək. 

Ölkəmizin evsahibliyi edəcəyi bu beynəlxalq sammit öncəsi Bakıda və işğaldan azad edilmiş şəhərlərimizdə mühüm konfranslar, forumlar təşkil edilib. Bu toplantılar, görülən hazırlıq işləri onu deməyə əsas verir ki, gələn həftə Azərbaycanın COP29-a evsahibliyi etməsi fonunda dünyanın təmiz enerjiyə transformasiya nəbzi ölkəmizdə döyünəcək. Azərbaycanın isə tədbirə yüksəksəviyyəli təşkilatçılıq edəcəyi heç kimdə şübhə doğurmur. 

Prezident İlham Əliyevin tapşırıqlarına əsasən, ölkəmizdə, xüsusən Bakıda  COP29-a yüksək səviyyədə hazırlıq işləri görülüb. Bu istiqamətdə müxtəlif layihələr həyata keçirilib. 

Noyabrın 4-də Prezident İlham Əliyevin və birinci xanım Mehriban Əliyevanın Bakı Olimpiya Stadionunun ərazisində COP29-la bağlı yaradılan şəraitlə tanış olarkən bəlli olub ki, COP29-un keçiriləcəyi tarixlərdə tədbir məkanı yük və sərnişindaşıma, eləcə də tibbi və yanğınsöndürmə üçün elektrikli minimobilləri, sammit zamanı yüksəksəviyyəli qonaqların ərazidə hərəkətini təmin etmək üçün elektrikli qolf-mobillər və elektrikli avtobuslar, həmçinin tədbir günlərində şəhər ərazisində hərəkət edəcək digər elektrikli nəqliyyat vasitələri tam hazırlıqlı vəziyyətdədir. 

COP29-un rəsmi "mavi zona"sında açılış mərasimində milli bəyanatların səsləndiriləcəyi "Nizami" plenar iclas zalı, İqlim Fəaliyyəti üzrə Dünya Liderlərinin Sammiti üçün hazırlanan məkanlar, eləcə də rəsmi danışıqların aparılacağı sahələrdə təşkil edilən çoxfunksiyalı müxtəlif görüş otaqları yaradılıb. Burada Azərbaycanın mədəniyyəti və təbiətini təbliğ edən müxtəlif ekspozisiya və sərgilər var. 

Bakı küçələri də bu mötəbər sammitə hazırdır. COP29 tədbirlərinin davam edəcəyi günlərdə avtomobillərin maneəsiz və rahat gediş-gəlişinin təmin olunması məqsədilə yollarda xüsusi zolaqlar salınmışdır. COP29 Azərbaycan Əməliyyat Şirkətinin məlumatına əsasən, 11-22 noyabr tarixlərində Bakıda keçiriləcək konfransla bağlı paytaxtın bir sıra mərkəzi küçələrində xüsusi COP29 nəqliyyat zolaqları yaradılıb. COP29 loqosunu əks etdirməklə işarələnən bu zolaqlar sürətli və fasiləsiz hərəkətin təmin edilməsi məqsədilə tədbir iştirakçılarını daşıyan nəqliyyat vasitələri üçün ayrılıb. Konfrans zamanı həmin zolaqlardan yalnız ictimai nəqliyyat vasitələri və tədbirlə əlaqədar xüsusi icazələrə sahib olan nəqliyyat vasitələri istifadə edəcəklər. Konfransa qədər müvafiq yol nişanları quraşdırılmayan zolaqlardan bütün nəqliyyat vasitələri istifadə edə bilər. Bundan əlavə, konfrans zamanı şəhərin müxtəlif əsas hissələrində ümumilikdə 14 nəqliyyat qovşağının təşkil edilməsi planlaşdırılıb.

Göründüyü kimi, Azərbaycan bu beynəlxalq sammitə yüksək səviyyədə evsahibliyi etmək üçün bütün imkanlarını səfərbər edib. Buna beynəlxalq birlik də şahidlik edir və atılan bütün addımlar təqdir olunur. 

Bu sammit Azərbaycanın neft-qaz ölkəsi olmaqla yanaşı, "yaşıl iqtisadiyyat"ı nə dərəcədə prioritet sahə kimi gördüyünü dünyaya bir daha sübut edəcək. 

Rəşad BAXŞƏLİYEV,

İlham BABAYEV (foto),

"Azərbaycan"