Azərbaycanla Türkiyə çalışır ki, böyük arealda, o cümlədən Cənubi Qafqazda, uzunmüddətli, ədalətli və dayanıqlı sülh olsun.
AZƏRTAC xəbər verir ki, bunu Ankarada keçirilən "Cənubi Qafqazda normallaşma prosesi: Türkiyə-Azərbaycan birliyinin yaratdığı imkanlar" mövzusundakı paneldə iştirak edən “Trend” Beynəlxalq İnformasiya Agentliyinin baş direktor müavini, "Baku Network" Araşdırma Mərkəzinin sədr müavini Sahil Kərimli deyib.
Onun sözlərinə görə, 2020-ci ildəki Qarabağ Zəfəri və 2023-cü ildəki birgünlük antiterror tədbirlərindən sonra öz ərazi bütövlüyünü və suverenliyini tam bərpa edən Azərbaycan bölgəmizdə yeni reallıqlar yaradıb. Bu reallığı yaradan kimdirsə, idarə edən də odur.
Azərbaycan-Türkiyə əməkdaşlığının Cənubi Qafqazdakı proseslərə böyük təsir göstərdiyini vurğulayan S.Kərimli bu baxımdan münasibətlərimizi ən yüksək zirvəyə çatdıran “Şuşa Bəyannaməsini” xüsusilə qeyd edib. Onun sözlərinə görə, Bakı ilə Ankara arasındakı əlaqələr daha da inkişaf etdirilməlidir: “Ölkələrimiz bu gün bütün sahələrdə, o cümlədən bölgədəki normallaşma prosesi çərçivəsində birgə addımlayır. Əminəm ki, Azərbaycan və Türkiyə əməkdaşlığı yeni uğurlara gətirib çıxaracaq. Avqust ayında Ermənistanla Azərbaycan arasında Vaşinqtonda paraflanmış sülh müqaviləsinin imzalanmasına da nail olacayıq”.
Baş direktor müavini Ermənistan rəhbərliyinin sülh prosesinə zidd olan qeyri-konstruktiv addımlarına da diqqət çəkib. Buna misal kimi Avropa İttifaqı ilə İrəvan arasında imzalanmış qərəzli mətni göstərən S.Kərimli vurğulayıb: “Separatçı və quldur rejimin nümayəndələrinin ədalətli mühakimə prosesinə qarşı yönəldilmiş hər hansı bir addımı qəbul edilməzdir. Azərbaycan haqlı yoldadır”.
O xatırladıb ki, antiterror tədbirləri zamanı Azərbaycan dəfələrdə bəyan edirdi ki, ölkəmizin ərazisində yaşayan ermənilər yenə yaşaya bilərlər. Onlar Azərbaycan qanunları, bayrağı və Konstitusiyası altında bizim vətəndaşımız kimi dövlətimizi tanımalıdırlar, ölkəmizin qanun və qaydalarına uyğun yaşamalıdırlar. Onlar bütün dünyanın gözü qarşısında öz istəkləri ilə bunu qəbul etmədilər. Müxtəlif media qurumları da bu prosesi izləyirdi. Azərbaycan isə sülh prosesinə töhfə vermək üçün daim hazırdır”.
jpg_1767211798.jpg)
