Prezident İlham Əliyevin şəxsi əzmi, qətiyyəti, siyasi iradəsi sayəsində Azərbaycan ötən 21 illik zaman kəsiyində böyük inkişaf yolu keçib. Milli maraqları qətiyyətlə təmin edilən ölkəmiz dünyada yüksək nüfuz sahibi olub.
Bu gün Azərbaycan nəinki Cənubi Qafqazın aparıcı aktoru, həm də beynəlxalq arenada fəal rol oynayan qüdrətli ölkə kimi tanınır. Dövlətimizin balanslaşdırılmış siyasəti, parçalanmış dünyada bütün qütblərlə eyni məsafədə dayanmağı bacarması, qlobal məsələlərin çözümündə həlledici güc mərkəzi rolunu oynaması məhz Prezident İlham Əliyevin məharətli diplomatik siyasətinin nəticələridir.
Regionda və dünyada baş verən geosiyasi prosesləri dərindən təhlil edən İlham Əliyev atdığı praqmatik addımları ilə ölkəmizə ardıcıl tarixi qələbələr qazandırıb.
Milli hədəfə gedən yol
Ulu Öndər Heydər Əliyevin ən layiqli siyasi davamçısı olan İlham Əliyev ilk dəfə Prezident seçildiyi zaman andiçmə mərasimində Azərbaycan xalqına verdiyi bütün vədləri ötən zamanda ardıcıllıqla və dəqiqliklə yerinə yetirdi.
Qısa zamanda sosial, iqtisadi, hərbi, ümumiyyətlə, bütün sahələrdə hərtərəfli inkişafa nail olan Azərbaycan əsl milli hədəfinə - Qarabağ Zəfərinə də çatdı.
44 günlük Vətən müharibəsində "dəmir yumruğ"u ilə işğalçıları məhv edərək, həm də onlara himayədarlıq edən xarici gücləri yerlərində otuzduran Qalib Lider İlham Əliyev torpaqlarımızın 30 illik işğalına son qoydu. Qarabağ və Şərqi Zəngəzurdan didərgin salınan yüzminlərlə insanı məcburi köçkünlük adından qurtardı.
Vətən müharibəsi bitəndən dərhal sonra işğaldan azad edilən torpaqlarımızda genişmiqyaslı tikinti-quruculuq işlərinə başlanıldı. Çox keçmədən "ağıllı kənd" konsepsiyası əsasında yenidən salınmış Zəngilanın Ağalı kəndinə köç ilə Böyük qayıdışa start verildi.
Bu gün artıq Qarabağ və Şərqi Zəngəzura qayıdan keçmiş məcburi köçkünlərin, ümumiyyətlə isə, bu ərazilərdə yaşayanların sayı 34 mini ötüb.
Azərbaycan adına qazanılan misilsiz qələbələr
Prezident İlham Əliyevin yürütdüyü məqsədyönlü siyasət nəticəsində Qarabağda kök salmış separatizm məhv edildi. Xankəndidə bayrağımız dalğalandırılmaqla ölkəmizin suverenliyi tam təmin olundu.
Əlləri xalqımızın qanına bulaşmış erməni hərbi cinayətkarlar qandallanaraq Azərbaycan qanunları ilə mühakimə edilmələri üçün Bakıya gətirildilər.
Öz təbirincə desək, Prezident İlham Əliyevin bir tələbi ilə Qazax rayonunun dörd kəndi də azad edildi. Necə ki, Vətən müharibəsi zamanı kapitulyasiyaya imza atan düşmən Qalib Lider İlham Əliyevin tələbi ilə Ağdamı, Kəlbəcəri, Laçını bir güllə atılmadan, bir itki verilmədən qaytarmışdı, bu siyahıya Qazax rayonunun Bağanıs Ayrım, Aşağı Əskipara, Xeyrımlı və Qızılhacılı kəndləri də əlavə olundu.
Bu kəndlərin azadlığı həm də tarixi torpaqlarımızı qarış-qarış öz sahiblərinə qaytaran xilaskar lider İlham Əliyevin Azərbaycan adına qazandığı misilsiz zəfərlərdən biri oldu.
İkinci Qarabağ müharibəsindən dərhal sonra Bakı İrəvana təkmil sülh modeli təklif edib. Xüsusilə 2024-cü ildə Azərbaycan ilə Ermənistan arasında masa arxasında heç bir vasitəçiyə ehtiyac görülmədən danışıqlar aparılması, delimitisaiya və demarkasiya işlərinə başlanılması regionda davamlı sülh üçün böyük zəmin yaradıb.
Qlobal dialoq ünvanı
Sülhü, tolerantlığı, multikultural dəyərləri daim təbliğ edən Azərbaycanın sivilizasiyalararası dialoqların unikal ünvanı kimi tanınması da təsadüfi deyil.
Dünyanın bir çox beynəlxalq qurumunda üzv dövlət kimi uğurla təmsil olunan Azərbaycan bəşəri qərarların qəbuluna və icrasına da birbaşa töhfələr verir. Buna dünyanın 120 ölkəsi arasında səmərəli əməkdaşlıq əlaqələrinin qurulmasında və inkişafında mühüm siyasi platforma olan Qoşulmama Hərəkatının da məhz Azərbaycanın sədrliyi dövründə özünün ən uğurlu dövrünü yaşaması misaldır.
Qeyd edək ki, bu yaxınlarda Azərbaycanın Misirin paytaxtı Qahirə şəhərində İnkişaf etməkdə olan səkkiz ölkənin İqtisadi Əməkdaşlıq Təşkilatının (D-8) XI Sammiti zamanı yekdilliklə D-8 təşkilatının üzvü seçilməsi ölkəmizin növbəti diplomatik uğuru oldu.
Yürütdüyü müstəqil və məqsədyönlü siyasət sayəsində ölkəmizi enerji, nəqliyyat qovşağına, sözün əsl mənasında dünyanın mərkəzinə, ümid ünvanına çevirən Prezident İlham Əliyevin səylərinin nəticəsi idi ki, COP29 kimi nüfuzlu tədbirin keçirilməsi də yekdil qərarla Azərbaycana həvalə olunmuşdu.
"Mübaliğəsiz deyə bilərik ki, Bakı COP tədbiri ən möhtəşəm COP-lardan biri kimi tarixə düşəcək", - deyə noyabrın 24-də etdiyi paylaşımda Prezident İlham Əliyev vurğulamışdı ki, COP29-un çox yaxşı təşkil olunması ilə bağlı bütün qonaqlardan yüksək qiymət almaqdan qürur duyuruq.
Bəli, son iki onilliyə nəzər salanda görürük ki, Azərbaycan həm ölkə, həm də dünya miqyaslı xeyli uğurlar, qələbələr əldə edib. Bütün bu tarixi nailiyyətlər, zəfərlər isə heç şübhəsiz, Prezident İlham Əliyevin müstəqil, uzaqgörən və müdrik siyasətinin sayəsində qazanılıb.
Yasəmən MUSAYEVA,
"Azərbaycan"
