Yeni Dövlət Proqramında heyvandarlıq sektorunun inkişafı, məhsuldarlığın artırılması və müasir təsərrüfatçılıq modellərinin təşviqi xüsusi yer tutur.
AZƏRTAC xəbər verir ki, bunu kənd təsərrüfatı nazirinin müavini Zaur Əliyev “Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026−2030-cu illər üçün Dövlət Proqramı”ndan irəli gələn məsələlərə həsr olunmuş mətbuat konfransında çıxışı zamanı deyib.
Onun sözlərinə görə, beynəlxalq təcrübə və ölkənin mövcud potensialı göstərir ki, həyata keçiriləcək tədbirlər nəticəsində kənd təsərrüfatında məhsuldarlığın əhəmiyyətli dərəcədə artırılması mümkündür.
“Torpaq konsolidasiyası, müasir suvarma sistemlərinin genişləndirilməsi və resurslardan səmərəli istifadənin təmin olunması nəticəsində məhsuldarlığın 5-10 faiz artırılması üçün ciddi imkanlar mövcuddur. Bu isə həm daxili bazarın təminatına, həm də ixrac potensialının genişlənməsinə müsbət təsir göstərəcək. Dövlət Proqramında heyvandarlığın bütün əsas istiqamətləri üzrə inkişafı təşviq edən əlavə tədbirlər nəzərdə tutulub. Sənəd iribuynuzlu və xırdabuynuzlu heyvandarlığın, eləcə də quşçuluq sektorunun inkişafına yönəlmiş hədəfləri əhatə edir. Hazırda ölkədə yüksək məhsuldarlığa malik cins heyvanların xüsusi çəkisi ümumi heyvandarlıq fondunda nisbətən aşağı səviyyədədir. Yüksək məhsuldar cins heyvanların payı təxminən 5 faiz təşkil edir. Dövlət Proqramı çərçivəsində bu göstəricinin dörd dəfə artırılması nəzərdə tutulur. Bu yanaşma xüsusilə süd istehsalının artırılması baxımından mühüm əhəmiyyət daşıyır. Proqram çərçivəsində mal əti istehsalının da təxminən 20 faiz artırılması hədəflənir. Bu məqsədlə ixtisaslaşmış təsərrüfatların yaradılması, müasir heyvandarlıq modellərinin tətbiqi və yem bazasının gücləndirilməsi istiqamətində tədbirlər həyata keçiriləcək. Xüsusilə yem sənayesinin inkişaf etdirilməsi və ixtisaslaşmış heyvandarlıq təsərrüfatlarının sayının artırılması məhsuldarlığın yüksəldilməsi üçün vacib şərtlərdən biridir. Bu istiqamətdə fermerlər üçün yeni təşviq mexanizmləri nəzərdə tutulur”, – deyə nazir müavini bildirib.
Zaur Əliyevin sözlərinə görə, Dövlət Proqramında kiçik ailə təsərrüfatlarının bazar imkanlarının genişləndirilməsi də xüsusi diqqətdə saxlanılır. Süd və digər heyvandarlıq məhsullarının emala cəlb olunmasını təşviq edən mexanizmlərin tətbiqi planlaşdırılır: “Kiçik ailə təsərrüfatlarından südün və digər məhsulların toplanması, emal müəssisələrinə çatdırılması və satış zəncirinə inteqrasiyası istiqamətində yeni dəstək alətləri formalaşdırılacaq. Həmçinin süd və yumurta toplama sistemlərinin inkişafı üçün dövlət dəstəyi tədbirləri nəzərdə tutulur. Proqram çərçivəsində iribuynuzlu heyvandarlıq sahəsində subsidiya və digər dəstək mexanizmlərinin tətbiqi də nəzərdə tutulur. Bu tədbirlər heyvandarlıq məhsullarının istehsalının artırılmasına, fermer gəlirlərinin yüksəlməsinə və ölkənin ərzaq təhlükəsizliyinin möhkəmləndirilməsinə xidmət edəcək”.
