Makron tarixin ən pis Olimpiya Oyunlarının müəllifi oldu

Sülhü, dostluğu tərənnüm edən idman yarışlarının siyasiləşdirilməsi, belə tədbirlərdən siyasi maraqlar naminə istifadə edilməsi yolverilməzdir. O cümlədən yarandığı gündən əmin-amanlığın, dostluğun və xoş məramların carçısı olan Olimpiya hərəkatı da məramına zidd olan ideyaları heç vaxt qəbul etməyib. 

Fransa Olimpiya ideallarına qarşı təxribat etdi

Hətta 1980-ci ildə Moskvada keçirilən Olimpiya Oyunları bir çox dövlətlər tərəfindən boykot edilsə də, onlara qarşı sovet dövlətinin ideoloji kursundan irəli gələrək birbaşa oyunlar çərçivəsində hər hansı siyasi şüar səsləndirilməyib. Əlbəttə ki, birbaşa Olimpiya Oyunlarına aid imkanlardan sui-istifadə edərək, maraq və mənafeləri güdən hərəkətlərə yol verilməsi, ələlxüsus siyasi və hərbi baxışların ortaya qoyulması tarixi eramızdan əvvəl başlayan Olimpiya hərəkatının məramına və daşıdığı ideallara qarşı çıxmaq, onun bütün dəyərlərini tapdalamaqdır. Hətta sovet ittifaqı kimi bir dövlətin rəhbərliyi bu dəyərlərə qarşı çıxmamışdı. 
Amma sovet ideologiyasının belə rəva bilmədiyini qaragüruhçu Fransa hakimiyyəti etdi. Bu baxımdan, Parisdə keçirilən Yay Olimpiya Oyunlarının açılış mərasimi zamanı "France 2" telekanalında ölkəmizə qarşı səslənən qərəzli ifadələr bir daha təsdiq etdi ki, Fransa dövləti üçün ümumiyyətlə müqəddəs heç bir dəyər qalmayıb.  Sözsüz ki, Fransanın rəsmi dövlət kanalında səsləndirilmiş və Olimpiya Oyunlarının siyasiləşdirilməsinə xidmət göstərən qərəzli fikirlər bu ölkənin siyasi dairələri və mediası tərəfindən Azərbaycana qarşı uzun müddətdir aparılan qarayaxma kampaniyasının tərkib hissəsidir. "France 2" telekanalında bu təxribata məqsədyönlü şəkildə yol verildiyi dəqiqdir. Lakin bu, Azərbaycanın öz qələbələri ilə rəzil duruma saldığı Fransanın, sadəcə, ölkəmizə qarşı növbəti cılızlıqlarından və riykarlıqlarından biri deyildi.  Bu, həm də Parisin Olimpiya ideallarına qarşı təxribatı və xəyanətidir. 
Olimpiya Oyunlarının təşkilatçıları bu qədim tarixə malik idman yarışmasını onun prinsiplərinə uyğun keçirməyə borcludurlar. Amma budəfəki Olimpiya Oyunlarının təşkilatçısı olan Fransa bunu bacara bilmədi. Oyunların təşkilindəki ciddi qüsurlar bir yana, Fransanın Olimpiya Oyunlarından Azərbaycana qarşı qarayaxma məqsədi üçün istifadə etməsi bu idman yarışının əsas prinsip və məramına xələl gətirdi. 
Azərbaycan isə Fransanın təxribatına elə Olimpiya Oyunlarındakı qələbələri ilə cavab verir. İdmançılarımızın qazandığı qızıl medallar Parisin qarayaxma kampaniyasını darmadağın etməklə yanaşı, həm də Azərbaycanın dünyaya mükəmməl təqdimatıdır.

Çirkli Sena çayı və soyğunçuluğa məruz qalan idmançılar

Əlbəttə, tarixboyu insanlığa qarşı saysız-hesabsız cinayətlər törətmiş, kolonial və neokolonial siyasəti ilə dünyanın müxtəlif yerlərində xalqların suverenliyini əlindən almış, azadlığını istəyənləri soyqırımına məruz qoymuş, sınaqdan keçirdiyi atom bombaları ilə yüz minlərlə insanın  həyatına və sağlamlığına qənim kəsilmiş Fransadan yaxşı nəsə gözləməyə də dəyməz. Olimpiya Oyunları prinsiplərinin Paris Olimpiya Oyunlarında pozulmasına dair Bakı Təşəbbüs Qrupunun bəyanatında bildirildiyi kimi, prezident E.Makron və onun hökuməti Paris Olimpiya Oyunlarını "sülh və ümid anı" kimi təqdim etsə də, Fransanın kolonial və neokolonial siyasəti bunun əksini deyir.
Elə Olimpiya Oyunlarının açılışı zamanı nümayiş etdirilən rəzilliyi də Fransanın iyrəncliyinin növbəti göstəricisi hesab etmək olar. Mənəvi aşınmaya məruz qalmış, bütün əxlaqi dəyərlərdən uzaq düşmüş, naşı prezidenti olan dövlətdən bundan başqasını gözləmək bəlkə də sadəlövhlük olardı. Açılış mərasimində xristian dəyərlərinin iyrənc formada təqdimatı isə Fransanın növbəti və həm də beynəlxalq rüsvayçılığı oldu. 
Fransanın Olimpiya rəzaləti isə hər gün müxtəlif formada özünü göstərir. Hər gün qonaqlar və idmançılar qarət edilir, necə deyərlər, soyğunçuluq baş alıb gedir. Bir tərəfdən də idmançılar qidalardan narazılıq edirlər. Fransada keçirilən Olimpiya Oyunlarının ən böyük problemlərindən biri isə Sena çayının çirkliliyidir.  Çayın çirkli olması səbəbindən idmançıların infeksiyaya yoluxmaları, üzgüçülük yarışlarının təxirə salınması Fransanın, daha dəqiq desək Makronun bir başqa rəzalətidir.

Rəşad CƏFƏRLİ,
"Azərbaycan"