Azərbaycan qadını tarix boyu xalqımızın mənəvi
dayağı, dövlətçilik ənənələrinin qoruyucusu və cəmiyyətimizin inkişafına töhfə
verən aparıcı qüvvələrdən biri olmuşdur. Tarixin müxtəlif mərhələlərində Azərbaycan
qadınları həm Vətənimizin müdafiəsində, həm də dövlət quruculuğu və
ictimai-siyasi həyatda böyük fədakarlıq və vətənpərvərlik nümunələri nümayiş
etdirmişlər. Qədim xalq dastanımız olan “Kitabi-Dədə Qorqud”dan başlayaraq
Möminə Xatun, Sara Xatun, Nüşabə, Tomris kimi qəhrəman qadın obrazları Azərbaycan
qadınının cəsarətinin və müdrikliyinin rəmzi kimi tariximizdə xüsusi yer tutur.
Azərbaycan qadınlarının hüquq və
azadlıqlarının təmin olunması istiqamətində mühüm addımlardan biri də Şərqdə
ilk dəfə məhz Azərbaycanda qadınlara seçib-seçilmək hüququnun verilməsi
olmuşdur. Azərbaycan Xalq Cümhuriyyəti dövründə qadınların bu hüququ qazanması
onların ölkənin ictimai-siyasi həyatında fəal iştirakının əsasını qoymuşdur.
Ümummilli Lider Heydər Əliyevin rəhbərliyi ilə
ölkəmizdə dövlət qadın siyasətinin möhkəm təməli qoyulmuşdur. Ulu Öndər
qadınların cəmiyyət həyatında rolunun artırılmasına xüsusi diqqət yetirərək
onların idarəetmədə və ictimai fəaliyyətin müxtəlif sahələrində geniş təmsil
olunması üçün mühüm qərarlar qəbul etmişdir. Bu siyasət bu gün möhtərəm
Prezidentimiz İlham Əliyev tərəfindən
uğurla davam etdirilir və yeni məzmunla zənginləşdirilir. Dövlət başçısının rəhbərliyi
ilə qadın hüquqlarının qorunması, gender bərabərliyinin təmin edilməsi və
qadınların sosial-iqtisadi imkanlarının genişləndirilməsi istiqamətində mühüm
qanunlar və proqramlar qəbul edilmişdir.
Qadınların cəmiyyətdə rolunun gücləndirilməsi
baxımından Birinci vitse-prezident Mehriban xanım Əliyevanın fəaliyyəti xüsusi
qeyd olunmalıdır. Onun rəhbərlik etdiyi humanitar və mədəni layihələr Azərbaycan
qadınının nüfuzunun beynəlxalq miqyasda daha da artmasına mühüm töhfə verir.
Bu gün Azərbaycan qadınları ölkəmizin
ictimai-siyasi, iqtisadi, elmi və mədəni həyatında fəal iştirak edir, dövlət
quruculuğu prosesində mühüm rol oynayırlar. Onlar parlamentdə, dövlət idarəetməsində,
biznesdə, elmdə, təhsildə, səhiyyədə və digər sahələrdə böyük uğurlar qazanaraq
cəmiyyətimizin inkişafına töhfə verməyə davam edirlər. Statistik göstəricilər də
bunu təsdiq edir. Ölkə əhalisinin yarıdan çoxunu təşkil edən qadınlarımız əmək
bazarında, sahibkarlıqda və yerli özünüidarəetmə orqanlarında getdikcə daha
geniş təmsil olunurlar.
Azərbaycan qadını tarixən ailə dəyərlərinin
qoruyucusu, milli-mənəvi irsimizin daşıyıcısı olmaqla yanaşı, eyni zamanda fəal
vətəndaş mövqeyi ilə dövlətimizin inkişafına xidmət edən güclü ictimai qüvvədir.
Əminliklə demək olar ki, Azərbaycan qadınları
bundan sonra da dövlətimizin inkişafında, cəmiyyətimizin tərəqqisində və milli
dəyərlərimizin qorunmasında fəal rol oynamağa davam edəcəklər.
Bu əlamətdar gün münasibətilə bütün xanımları
səmimi qəlbdən təbrik edir, onlara möhkəm cansağlığı, xoşbəxtlik və fəaliyyətlərində
uğurlar arzulayıram.
Fatma YILDIRIM,
Milli Məclisin deputatı
jpeg_1772961927.jpeg)
jpg_1775472819.jpg)
