Azərbaycan Respublikası Prezidentinin Sərəncamı ilə 2025-ci ilin “Konstitusiya və Suverenlik İli” elan edilməsi çərçivəsində İtaliya Deputatlar Palatasında Azərbaycan Konstitusiyasının 30 illik yubileyinə həsr olunmuş konfrans keçirilib.
AZƏRTAC xəbər verir ki, bu barədə Azərbaycanın İtaliyadakı Səfirliyindən məlumat verilib. İtaliya Parlamentinin üzvü Nazario Paqanonun təşəbbüsü ilə keçirilən konfransda Azərbaycanın İtaliyadakı səfiri Rəşad Aslanov, Azərbaycan - İtaliya Parlamentlərarası Əlaqələr üzrə İşçi Qrupun sədri, deputat Azər Kərimli, İtaliya - Azərbaycan Parlamentlərarası Dostluq Qrupunun sədri, senator Marko Skurria, Neapol Universitetinin “Federiko II” Elmi Komitəsinin sədri professor Sandro Staiano və Azərbaycan Parlamentində Hüquq siyasəti və dövlət quruculuğu komitəsinin üzvü, deputat Nurlan Həsənov çıxış ediblər.
Tədbirin əvvəlində deputat Azər Kərimli 12 dekabr tarixinin Azərbaycanın Ümummilli Lideri Heydər Əliyevin anım günü olduğunu xatırladaraq, tədbir iştirakçılarını onun xatirəsini bir dəqiqəlik sükutla yad etməyə dəvət edib.
Konfransda çıxış edən natiqlər 12 noyabr 1995-ci ildə qəbul olunmuş və müasir Azərbaycan dövlətinin hüquqi və siyasi əsaslarını müəyyən edən Konstitusiyanın təhlili, tarixi əhəmiyyəti və simvolik dəyəri barədə fikirlərini bölüşüblər.
Təqdimatlar zamanı Azərbaycanın 1991-ci ildə dövlət müstəqilliyini bərpa etdikdən sonra keçdiyi inkişaf yolu, müstəqilliyin və suverenliyin möhkəmləndirilməsində Konstitusiyanın fundamental rolu, habelə multikulturalizm, qadınların cəmiyyətdə rolu və əsas vətəndaş hüquq və azadlıqlarının tanınması kimi fundamental dəyərlər xüsusilə qeyd edilib.
Çıxışlarda natiqlər, həmçinin Azərbaycanın beynəlxalq hüququn prinsiplərinə uyğun olaraq ərazi bütövlüyünü bərpa etməsi, Qarabağ münaqişəsinin başa çatması və regionda sülhün, təhlükəsizliyin və dayanıqlı inkişafın təmin olunması istiqamətində atılan addımlar barədə də məlumat veriblər. Bu kontekstdə Konstitusiyanın dövlətçiliyin möhkəmləndirilməsi və post-münaqişə dövründə quruculuq proseslərinə hüquqi bazanın təmin edilməsi baxımından əhəmiyyəti xüsusi vurğulanıb.
Tədbirdə habelə Azərbaycan və İtaliya arasında mövcud strateji tərəfdaşlıq münasibətlərinə toxunulub. Bildirilib ki, bu münasibətlər yüksək səviyyəli qarşılıqlı səfərlərlə, o cümlədən İtaliya Prezidenti Sercio Mattarellanın builki Bakıya səfəri ilə daha da güclənib. Prezident Mattarellanın səfəri çərçivəsində İtaliya - Azərbaycan Universitetinin açılış mərasiminin keçirilməsi iki ölkə arasında təhsil və humanitar sahələrdə əməkdaşlığın inkişafına mühüm töhfə kimi qiymətləndirilib.
