Azərbaycan tarixi qələbə qazanmaqla, ərazi bütövlüyünü və suverenliyini tam bərpa etməklə yanaşı, regionda yeni geosiyasi reallıq yaradaraq, sülhün təməlini qoyub. Ölkəmiz qələbədən sonrakı illər ərzində tarixi Zəfərimizin reallıqlarının beynəlxalq səviyyədə təqdimatı və qəbul etdirilməsi istiqamətində səylər göstərərək, buna nail olub.
Milli Məclisin deputatı Vüqar Rəhimzadə qəzetimizə açıqlamasında bildirib ki, ötən il avqustun 8-də Prezident İlham Əliyevin ABŞ Prezidenti Donald Trampın dəvəti ilə bu ölkəyə işgüzar səfəri bütün məqamlara işıq salıb. Dövlət başçısının Vaşinqtona səfəri yalnız Azərbaycan-ABŞ münasibətlərinin inkişafı baxımından deyil, eyni zamanda beynəlxalq informasiya müstəvisində ölkəmizin mövqeyinin güclənməsi və diplomatik sahədə əldə etdiyi növbəti uğur kimi dəyərləndirildi.
Regionda artıq geri dönməz xarakter daşıyan sülh gündəliyinin müəllifinin Prezident İlham Əliyev olduğunu vurğulayan deputat deyib ki, Azərbaycan yalnız sülh gündəliyini təqdim etmir, buna nail olmaq üçün sistemli, qətiyyətli və konkret addımlar atır: "Azərbaycan regional və beynəlxalq münasibətlərdə sülh və əməkdaşlıq təşəbbüsləri ilə çıxış edən ölkə kimi mövqeyini daha da gücləndirir. Münaqişələrin beynəlxalq hüquq, suverenlik və ərazi bütövlüyü prinsipləri əsasında həllini müdafiə edən Azərbaycan dialoq, diplomatiya və qarşılıqlı etimadın qurulmasını vacib hesab edir. Regional kommunikasiyaların açılması, iqtisadi əməkdaşlığın genişləndirilməsi və təhlükəsizliyin möhkəmləndirilməsi istiqamətində irəli sürülən təşəbbüslər sülh gündəminin əsas elementləridir. Prezident İlham Əliyevin sülh təşəbbüsləri region üçün həm siyasi, həm də iqtisadi dividendlər qazandırmaqla, Cənubi Qafqazda uzunmüddətli sabitliyin və əməkdaşlığın yaranmasına xidmət edir".
Deputat deyib ki, Azərbaycanın Sülh Şurasına təsisçi üzv kimi qoşulması ölkəmizin beynəlxalq miqyasda sülh, dialoq və qarşılıqlı anlaşma dəyərlərinə sadiqliyinin göstəricisidir. Bu təşəbbüs Azərbaycanın qlobal təhlükəsizliyinin möhkəmləndirilməsi, münaqişələrin dinc yolla həlli və xalqlar arasında əməkdaşlığın inkişafına verdiyi töhfəni əks etdirir. Sülh Şurasının təsisçilərindən biri kimi Azərbaycan beynəlxalq platformalarda fəal iştirak etməklə, sülh gündəliyinin formalaşmasına və qlobal etimadın güclənməsinə töhfə verəcəkdir.
V.Rəhimzadə Davos İqtisadi Forumu çərçivəsində Azərbaycanın da təsisçi üzvlər sırasında olduğu "Sülh Şurası Nizamnaməsi"nin imzalanma mərasiminin keçirildiyini xatırladaraq deyib ki, Şuranın əsas məqsədləri arasında münaqişələrdə davamlı barışığın təşviqi, sülhün dəstəklənməsi, beynəlxalq dialoq və əməkdaşlığın gücləndirilməsi yer alır. Azərbaycanın ABŞ Prezidenti Donald Trampın təşəbbüsü ilə yaradılan Sülh Şurasına təsisçi üzv kimi qatılması dövlətimizin beynəlxalq nüfuzunu artırmaqla yanaşı, qlobal siyasətdəki rolunu daha da artıracaq.
Əsmər QARDAŞXANOVA,
"Azərbaycan"
jpg_1775219395.jpg)
