30 illik gözlənti, doğma yurdun itirilməsinin ağrısı, eyni sualı verən minlərlə məcburi köçkün: “Biz nə vaxt evimizə qayıdacağıq?” və nəhayət, tarixi ədalətin təntənəsi...
Cəbhəyanı ərazilərdə uzun illər Azərbaycan xalqı ilə çiyin-çiyinə sınaqlardan keçmiş tanınmış litvalı jurnalist Riçardas Lapaytis Zəfər Günü ərəfəsində “Qarabağ gündəliyi” kitabını təqdim edəcək.
O, AZƏRTAC-ın müxbirinə müsahibəsində təəssüratlarından, Qələbəyə inamından, eləcə də bu gün təkcə Qafqaz üçün deyil, bütün dünya üçün əhəmiyyət daşıyan əzmkarlıq dərslərindən danışıb.
“Tezliklə bütün Azərbaycan İkinci Qarabağ müharibəsində Qələbə Gününü – işğaldan azad olunma gününü, ədalətsizlik üzərində qələbəni, təxminən 30 il gözlənilən günü qeyd edəcək.
Bu baxımdan, kitabın nəşri böyük hədiyyə olub. Hətta, deyərdim, bu, əsl təsadüfdür. Belə ki, kitabın məhz bu günlərdə işıq üzü görəcəyini əvvəlcədən planlaşdırmamışdım. Lakin düşünürəm ki, kitabın məhz bu dövrdə çapdan çıxması həyatımın ən gözəl təsadüflərindən biridir. Kitabın Litvada, Zəfər Günü münasibətilə Azərbaycanın Litvadakı səfirliyinin dəstəyi və səfir Tamerlan Qarayevin şəxsi təşəbbüsü ilə Vilnüsdə təqdim olunması da rəmzi məna daşıyır. Biz Azərbaycanın Zəfər Gününü qeyd edəcək, eyni zamanda, “Qarabağ gündəliyi” kitabını da təqdim edəcəyik. Bu, mənim üçün olduqca mühüm hadisədir”, – deyə jurnalist bildirib.
Müsahibimiz belə bir gündə keçirdiyi hissləri bölüşüb: “Ürəyim doludur, deməyə o qədər söz var ki, onları ifadə etmək çətindir. Azərbaycan xalqı ilə birlikdə keçdiyim 30 il ərzində, cəbhəyanı ərazilərdə aylarla yaşadığım və qaçqın düşərgələrində çalışdığım müddətdə insanların tarixi vətənlərini bir daha görə bilmədən dünyadan köçdüyünün şahidi olmuşam. Bu gün nə hiss edirəm? Azərbaycan əsgərinə və hər şeydən əvvəl bu addımı atmaq qərarına gələn Azərbaycan Prezidentinə qarşı dərin qürur və hörmət hissi keçirirəm.
Şuşada keçirilən Qlobal Media Forumunda iştirak edərkən Prezident İlham Əliyevin məcburi köçkünlərlə görüşlərində qarşılaşdığı ən çətin sual barədə danışdığını xatırlayıram. İnsanlar ondan soruşurdular: “Biz nə vaxt evimizə qayıdacağıq?” Bir anlıq təsəvvür edin. Son dərəcə mürəkkəb siyasi şəraitdə belə bir sualı eşitmək və ona cavab axtarmaq necə də çətin idi. Amma Allaha şükürlər olsun ki, həmin gün gəlib çatdı”.
Vətən müharibəsi zamanı R.Lapaytis hər gün baş verən hadisələri izləyir, ilk soyuqlar düşənə və qar yağana qədər Azərbaycan əsgərinin Şuşaya daxil olması, şəhərdə Azərbaycan bayrağının dalğalanması üçün dua edirdi.
“Yəqin ki, zaman keçdikcə Ukrayna da, işğalla üzləşmiş digər ölkələr də bunu anlayacaqlar. Bu məqamda Prezident İlham Əliyevin sözlərini təkrarlamaq istərdim: “Heç vaxt işğalla barışmayın. Necə ki, Azərbaycan xalqı barışmadı”. Baxın, onların inamı, əzmkarlığı və cəsarəti Qarabağın azad olunmasına gətirib çıxardı.
Bütün Azərbaycan xalqı və ən çətin anlarda yanımızda olan əsl dostlar qarşısında böyük qürur hissi keçirirəm. Hamınızın qarşısında baş əyirəm. Hər bir azərbaycanlıya ən səmimi hörmətimi və sevgimi çatdırıram”, – deyə tanınmış jurnalist sözlərini yekunlaşdırıb.
314444444 - Copyjpg_1793831795.jpg)
