Bu qovşaq işğaldan azad edilmiş ərazidə salınıb

Ölkəmizdə yol infrastrukturunun yenilənməsi Prezident İlham Əliyevin xüsusi önəm verdiyi sahələrdən biridir. Bunun nəticəsidir ki, son 

20 ildə şəhər, rayon və kəndlərimizdə hər il ən azı min kilometr yol çəkilib, yaxud əsaslı təmir edilib. Nə xoş ki, artıq dörd ildir bu yollara bizi doğma Qarabağa, Şərqi Zəngəzura aparan yollar da qovuşub.

44 günlük Vətən müharibəsindəki qələbəmizdən dərhal sonra azad edilmiş ərazilərimizin bərpası istiqamətində başlanan ilk tədbirlərdən biri də məhz yol çəkilişi oldu. Hazırda Qarabağ və Şərqi Zəngəzur iqtisadi rayonları ərazisində "Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı" çərçivəsində, həmçinin dövlət başçısının sərəncamları əsasında 45 avtomobil yolu layihəsinin tikintisi yerinə yetirilir. Avtomobil yolu layihələrinin ümumi uzunluğu 3094,3 kilometr təşkil edir. Proqrama uyğun olaraq artıq ümumi uzunluğu 254,2 kilometr təşkil edən 7 avtomobil yolu layihəsi uğurla yekunlaşıb. Bu gün sözügedən iki iqtisadi rayonun yol infrastrukturu layihələrində ümumi uzunluğu 69,1 kilometr olan 45 avtomobil tuneli, ümumi uzunluğu 13,4 kilometrə yaxın 463-dən artıq körpü, viaduk və yol ötürücüsü də inşa edilir.

Həm də məsələ təkcə görülən işin həcmində deyil, söhbət eyni zamanda yüksək keyfiyyətdən gedir. 2024-cü il Avropa və Mərkəzi Asiya Regional Mükəmməllik Mükafatlarına təqdim edilən Əhmədbəyli-Füzuli-Şuşa Avtomobil Yolu Layihəsinin Beynəlxalq Yol Federasiyası (BYF Qlobal) tərəfindən İnnovativ İnşaat Metodologiyası kateqoriyasında qalib seçilməsi deyilənlərin əyani sübutudur.

Dünya üzrə İnnovativ inşaat metodologiyası nominasiyasında 1-ci yeri tutan bu yol layihəsi daim Prezident İlham Əliyevin nəzarətində olub. Dövlət başçısı bir neçə dəfə tikinti gedən ərazilərə səfər edib. Məsələn, 2023-cü ilin iyul ayında yolun Füzuli Beynəlxalq Hava Limanına qədər uzanan 27 kilometrlik hissəsinin tikintisi ilə tanış olub. Bu ilin mayında isə dövlət başçısı Əhmədbəyli-Füzuli-Şuşa avtomobil yolunda aparılan işlərlə tanış olub, bu yolda inşa edilmiş birinci tunelin açılışında iştirak edib.

 Mühüm yol infrastrukturu layihələrindən biri olan və İnnovativ inşaat metodologiyası nominasiyası üzrə qalib seçilən uzunluğu 81,7 kilometr təşkil edən I texniki dərəcəli Əhmədbəyli-Füzuli-Şuşa avtomobil yolunda 11 körpü, 7 tunel və 9 viaduk inşa edilib. Viadukların tikintisi zamanı aşırım qəliblərin üfüqi sürüşdürülməsi üsulu ilə betonlama işləri yerinə yetirilib.

 Əhmədbəyli-Füzuli-Şuşa avtomobil yolu başlanğıcını Hacıqabul-Horadiz-Ağbənd-Zəngəzur dəhlizi magistral avtomobil yolundan götürməklə işğaldan azad edilmiş Füzuli, Xocavənd, Xocalı və Şuşa rayonlarını birləşdirir. Yeni yol əvvəlkindən 19,3 kilometr qısadır. Bu, birinci texniki dərəcəli yol olmaqla 4-6 hərəkət zolağına malikdir.

Əhmədbəyli-Füzuli-Şuşa yolunun sözügedən mükafatı qazanması ilə Azərbaycan Avtomobil Yolları Dövlət Agentliyi müstəsna layihələri mükəmməlliyə, innovasiyaya və cəmiyyətə müsbət təsirinə görə mükafatlandırılmış təşkilatların elit qrupuna qoşulub. Mükafatlandırma sentyabrın 26-da Bolqarıstanın Plovdiv şəhərində baş tutub.

Avropa Yollar Konfederasiyasının baş katibi Stiv Philips bununla bağlı deyib: "Sizi Beynəlxalq Yol Federasiyası tərəfindən təltif olunmağınız münasibətilə təbrik edirəm. İcra etdiyiniz layihələr çox təqdirəlayiqdir və əminəm ki, yol infrastrukturu sahəsində ölkənizdə görə biləcəyim müsbət işlər kifayət qədərdir". 

 "Kapsch" şirkətinin layihələrin idarə edilməsi üzrə baş mütəxəssisi Kristof Demut da layihəni yüksək dəyərləndirib: "Azərbaycanda icra olunan müasir yol infrastruktur layihəsi haqqında öz fikirlərimi bildirmək istərdim. Qeyd etməliyəm ki, burada bizə təqdim olunan layihənin önəmli cəhəti odur ki, bu layihə vaxtında və yüksək standartlarla icra edilmişdir. Bizə məlum olan Qərb standartları üzrə icra edilmiş bu layihə Avropa və Asiyanın birləşməsində yol qovşağı funksiyasını icra edəcəkdir".

"Ekoposte" şirkətinin Beynəlxalq Biznesin İnkişafı üzrə direktoru Esteban Salinas təbriklərini çatdıraraq bildirib: "Sizi Beynəlxalq Yol Federasiyası tərəfindən təltif olunmanız münasibətilə təbrik edirəm. Bu, böyük bir uğurdur. Ölkənizin yol infrastrukturu sahəsində əldə etdiyi nailiyyətlərə görə, xüsusən də yol təhlükəsizliyi sahəsindəki həyata keçirilən tədbirlərlə bağlı sizi təbrik edirik".

Mükafatlandırma zamanı Azərbaycanın möhtəşəm tədbir - BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası ərəfəsində olduğu, COP29-a ölkəmizin bütün müvafiq qurumları kimi, Azərbaycan Avtomobil Yolları Dövlət Agentliyinin də fəal hazırlıq gördüyü qeyd edilib. 

Flora SADIQLI,

"Azərbaycan"