Məlum olduğu kimi, Vətən Müharibəsindəki şanlı Qələbənin beşinci ildönümünü qeyd etmək üçün Bakının Azadlıq Meydanında keçirilən möhtəşəm hərbi parad aparıcı qlobal media orqanlarının diqqətini çəkib.
Türkiyə, Pakistan, Şimali Kipr, Rusiya, BƏƏ, Səudiyyə Ərəbistanı, İspaniya, Rumıniya, Bolqarıstan, Moldova, Gürcüstan və digər ölkələrin KİV-ində Azərbaycan Respublikasının Prezidenti İlham Əliyev, Türkiyə Respublikasının Prezidenti Rəcəb Tayyib Ərdoğan və Pakistanın Baş naziri Məhəmməd Şahbaz Şərifin nitqlərindən sitatlar, paradın Azərbaycan ordusunun hərbi qüdrətini tam şəkildə nümayiş etdirdiyini və Vətən Müharibəsi haqqında məlumat verdiyini vurğulayan məlumatlar yer alıb.
Avropanın Euronews televiziya kanalı noyabrın 8-də Bakıda keçirilən hərbi parad haqqında məqalə dərc edib. Yazıda bildirilir ki, Azərbaycan Qarabağ üzərində nəzarəti bərpa etməsinin beşinci ildönümünü qeyd edib. Bu, ölkə və bütün region üçün tarixi bir an olub, onilliklər davam edən qanlı münaqişənin faciəvi fəslini bitirib və sülhün yeni bir fəslinə qədəm qoyub.
Azərbaycan Prezidenti İlham Əliyev qələbənin strateji iqtisadi və hərbi nailiyyətlərin nəticəsi olduğunu qeyd edərək, Qarabağın bərpasının davam etdiyini vurğulayıb.
Azərbaycan lideri həmçinin münaqişə zamanı göstərdikləri dəstəyə görə türkiyəli həmkarı Rəcəb Tayyib Ərdoğana və Pakistanın Baş naziri Məhəmməd Şahbaz Şərifə minnətdarlığını bildirib və Pakistan qoşunlarının paradda ilk dəfə iştirak etdiyini qeyd edib.
"Bu, üç ölkənin - Azərbaycan, Türkiyə və Pakistanın xalqlarının və ordularının birliyinin təzahürüdür", - deyə İlham Əliyev bildirib.
Türkiyə Prezidenti Qarabağdakı qələbənin Asiya və Avropada geosiyasi tarazlığı dəyişdirdiyini və "bölgəmiz üçün yeni bir dövrün qapısını açdığını" qeyd edib.
"Biz heç bir kin saxlamırıq, amma keçmiş illərin əzablarının təkrarlanmasına imkan verməyəcəyik. Buna görə də biz bu qələbəni son deyil, Qafqazda uzunmüddətli sülhə doğru daha bir addım kimi görürük", - deyə Ərdoğan bildirib və əlavə edib ki, "Qafqazda sülhün təmin edilməsi bütün regionun çiçəklənməsinə xidmət edəcək".
Məqalədə qeyd olunur ki, ötən cümə axşamı Bakıda NATO nümayəndə heyəti ilə görüşdə İlham Əliyev Azərbaycan ordusunun NATO standartlarına uyğunlaşdırıldığını və bu baxımdan Türkiyə ordusu ilə sıx əməkdaşlıq etdiyini bildirib.
Azərbaycanın ittifaqla əməkdaşlığı, əvvəlki sülhməramlı əməliyyatlarda iştirakına əlavə olaraq, enerji təhlükəsizliyi və regional əlaqələri də əhatə edir.
Avqust ayında Azərbaycan və Ermənistan liderləri uzun müddətdir davam edən Qarabağ münaqişəsinə son qoymağı hədəfləyən bir müqavilə (birgə bəyannamə – red.) imzalayıblar.
Ağ Ev bildirib ki, müqavilənin bir hissəsi olaraq, ABŞ həmçinin Beynəlxalq Sülh və Rifah üçün Tramp Marşrutu (TRIPP) adlanacaq tranzit dəhlizinin qurulmasına kömək edəcək.
Bakı üçün dəhliz Naxçıvana birbaşa quru yolu ilə əlaqə təmin edir, Türkiyə ilə əlaqələri gücləndirir və infrastruktur diplomatiyası vasitəsilə müharibədən sonrakı qazancları möhkəmləndirir. Bu, həmçinin Azərbaycanın əsas qlobal nəqliyyat və logistika mərkəzi kimi mövqeyini gücləndirir.
İrəvan üçün bu nəqliyyat marşrutu daha geniş ticarət şəbəkələrinə inteqrasiya olmaq, iqtisadiyyatını şaxələndirmək və xarici investisiyaları cəlb etmək imkanı təqdim edir. Geosiyasi baxımdan, bu, Ermənistana qonşuları, xüsusən də Türkiyə ilə münasibətlərini normallaşdırmağa da kömək edəcək", - deyə məqalədə bildirilir.
Qazaxıstanın nüfuzlu media orqanları Bakıda keçirilən Qələbə Günü paradını geniş şəkildə işıqlandırıblar. Tengrinews.kz, informburo.kz, time.kz və digər saytlarda dərc olunmuş reportajlarda bu barədə ətraflı məlumat yer alıb.
Qələbə Günü paradında Azərbaycan Prezidenti və Ali Baş Komandan İlham Əliyev və Türkiyə Prezidenti Rəcəb Tayyib Ərdoğanın çıxışlarından sitatlar gətirilib.
Yazılarda bildirildiyi kimi, Paradda 3000-dən çox şəxsi heyət iştirak edib və müasir hərbi texnika, raket və artilleriya qurğuları, hava hücumundan müdafiə sistemləri, eləcə də döyüş gəmiləri və qayıqlar da daxil olmaqla 150-yə qədər hərbi texnika nümayiş etdirilib.
Rizvan CƏFƏROV,
“Azərbaycan”
