"Avropa Siyasi Birliyinin 6-cı sammiti bu dəfə Qərbi Balkanlarda - Albaniyada baş tutdu. "Yeni dünyada yeni Avropa" mövzusuna həsr olunmuş zirvə toplantısında Azərbaycan Prezidentinin də iştirakı təsadüfi deyil. Bu, ilk növbədə Prezident İlham Əliyevin rəhbərliyi ilə Azərbaycanın xarici siyasətində həm Şərq, həm Qərb istiqamətində əldə edilmiş uğurların nəticəsidir".
Bunu "Azərbaycan" qəzetinə açıqlamasında Milli Məclisin deputatı Nigar Məmmədova bildirib. Bu günlərdə Azərbaycanla dünyanın iqtisadi nəhəngi olan Çin arasında strateji əməkdaşlıq sahəsində birgə bəyanat imzalandığını xatırladan Nigar Məmmədova deyib ki, eyni zamanda İran Prezidentinin Azərbaycana uğurlu səfəri baş tutub: "İki ölkə arasındakı münasibətlərdə artıq yeni səhifənin açıldığını söyləyə bilərik. Azərbaycanın həm də Avropanın enerji təhlükəsizliyi və alternativ nəqliyyat dəhlizləri baxımdan önəmi artır. Təsadüfi deyil ki, Azərbaycan 10 Avropa ölkəsinə qaz satır. Ölkəmizin üzərindən keçən Qərblə Şərqi birləşdirən Orta dəhliz üzrə daşımalar da ilbəil artmaqdadır. Regionda Azərbaycanın müsbət mövqeyi olmadan ciddi transregional layihə effektiv icra olunmur, bunu həm region, həm dünya ölkələri, o cümlədən Avropa dövlətləri də anlayır. Eyni zamanda neokolonializmlə mübarizə, Qlobal Cənub ölkələrinə dəstək kimi qlobal təşəbbüslərin müəllifi olan Azərbaycan öz maraqlarını qlobal səviyyədə təmin etməyə müvəffəq olur".
Deputat qeyd edib ki, bütün tərəfdaşlar Azərbaycanın mövcud imkanlarını, təhlükəsiz və dayanıqlı əməkdaşlıq təkliflərini dəyərləndirməyə çalışırlar. Bununla yanaşı, rəsmi Bakı qlobal məsələlərin həllində həm də vasitəçi olmaq kimi uğurlu təcrübəyə malikdir. Bütün bu keyfiyyətlər Azərbaycanı beynəlxalq siyasi gündəmin müzakirə edildiyi platformalarda əsas iştirakçıya çevirir. Siyasi, iqtisadi və hərbi gücü hesabına ərazi bütövlüyü və suverenliyini bərpa edən Azərbaycanın yeni dünya nizamının formalaşması ilə bağlı öz baxışı var.
N.Məmmədova xatırladıb ki, Avropa Siyasi Birliyinin 2022-ci ilin oktyabrında Praqada keçirilən toplantısında da ölkəmizlə əməkdaşlığın Avropanın strateji prioritetlərindən biri olduğu xüsusi vurğulanmışdı. "Tiranadakı Zirvə görüşündə isə əsas diqqət yetirilən məsələlərdən biri çoxtərəflilik oldu. Azərbaycan hər zaman beynəlxalq münasibətlərdə çoxtərəflilik prinsipinin fəal tərəfdarı olub. Dövlət başçımızın da söylədiyi kimi, bu, 2020-2023-cü illərdə Qoşulmama Hərəkatına sədrlik dövründə rəsmi Bakı tərəfindən əyani şəkildə nümayiş etdirilib. Yeri gəlmişkən, Tirana görüşündə beynəlxalq ticarət və iqtisadi əməkdaşlığın qarşılıqlı asılılıq yaratmasına, bunun güc və təzyiq alətinə çevrilməsinə diqqət çəkildi. Amma Azərbaycanın təşəbbüsü ilə reallaşan bütün layihələrdə tərəflərə qazan-qazan prinsipi təklif edilir", - deyə deputat bildirib.
Siyasətçi vurğulayıb ki, Avropa hazırkı mürəkkəb geosiyasi şəraitdə dünyadakı nüfuzunun zəifləməsindən narahatdır. Ona görə də etibarlı, proqnozlaşdıra bilən tərəfdaşlara ehtiyac getdikcə artır. Bu xüsusda Azərbaycan ən uğurlu seçimdir.
Əsmər QARDAŞXANOVA,
"Azərbaycan"
jpg_1749076194.jpg)
