Avropa Şurası Parlament Assambleyasının (AŞPA) 2026-cı il qış sessiyası yanvarın 26-dan 30-dək Strasburqda keçiriləcək. Sessiyanın əsas məqamları sırasında Moldova Prezidenti Maya Sandunun, Ermənistanın xarici işlər naziri Ararat Mirzoyanın və Almaniyanın ədliyyə naziri Ştefani Hubiqin çıxışları yer alır. Ştefani Hubiqin “beynəlxalq ədalət sisteminin qorunması” mövzusunda cari məsələlər üzrə debat çərçivəsində çıxış etməsi gözlənilir.
AZƏRTAC xəbər verir ki, sessiya çərçivəsində Avropa İnsan Hüquqları Konvensiyası sisteminin bütövlüyünün qorunması, atəşkəsdən sonra Qəzza və İordan çayının qərb sahilində hesabatlılığın, humanitar müdafiənin və beynəlxalq hüquqa hörmətin təmin edilməsi və Avropa Sosial Xartiyasının 65 illiyi kimi üç mövzu üzrə təcili debat tələb olunub.
Həmçinin sessiya günlərində Holokost qurbanlarının xatirəsinə həsr olunmuş Beynəlxalq Anım Günü münasibətilə rəsmi mərasim keçiriləcək.
Qış sessiyasının gündəliyinə daxil olan digər müzakirələr Ukrayna üçün ədalətli və davamlı sülhə sadiqlik və Avropa qitəsinin təhlükəsizliyi, konversiya praktikalarının qadağan edilməsi, eləcə də böhran dövrlərində seçkilər mövzularını əhatə edir. Assambleya, eyni zamanda, İnsan Hüquqları və Biotibb Konvensiyasına psixi sağlamlıq sahəsində şəxslərin məcburi yerləşdirilməsi və müalicəsinə dair yeni protokol üzrə rəyini qəbul etməyi planlaşdırır.
Sessiyada Assambleyanın vəzifəsini başa vuran prezidentinin vida mərasimi keçiriləcək və yeni prezident seçiləcək. Moldova Respublikasının Baş nazirinin müavini və xarici işlər naziri Mixai Popşoy Nazirlər Komitəsi sədrliyinin ənənəvi məruzəsini təqdim edəcək və deputatların suallarını cavablandıracaq. Avropa Şurasının Baş katibi Alen Berse də parlament üzvləri ilə sual-cavab sessiyası keçirəcək.
Gündəliyə, həmçinin Bosniya və Herseqovinanın öhdəliklərinin icrası, Şimali Makedoniya ilə postmonitorinq dialoqu, Assambleyanın monitorinq prosedurunda yeniliklər, eləcə də Qırğızıstan Respublikasında erkən parlament seçkilərinin müşahidəsi ilə bağlı debatlar daxildir.
Sonda deputatlar gənclərlə demokratiyanın gücləndirilməsi, məktəblərdə sosiallaşma və inklüziv təhsil mövzularını müzakirə edəcəklər.
Assambleya sessiyanın yekun gündəliyini plenar iclasın ilk günü qəbul edəcək.
jpg_1766394772.jpg)
jpg_1766390271.jpg)
jpeg_1766380967.jpeg)
