Yetmiş illik sovet hakimiyyəti illərində Azərbaycanda cəmi 12 dəfə amnistiya aktı qəbul edilmişdisə, müstəqilliyin 34-cü ilində verilən amnistiya qərarlarının sayı 16-ya çatıb. Göründüyü kimi, milli dövlətimiz daha humanist və ədalətlidir.
Bu sözləri AZƏRTAC-a açıqlamasında Milli Məclisin İnsan hüquqları komitəsinin sədri Zahid Oruc söyləyib.
O bildirib ki, əfv və amnistiya siyasəti yalnız düzgün hüquqi-mənəvi prinsiplərə söykənəndə uğur qazanır, dövlətin və millətin birgə ideallarına xidmət edir. Əks halda siyasi qəsdlərə və təhlükəli əməllərə humanizm nümayiş etdirmək ictimai ədalətə və təhlükəsizliyə zərbə vurur, dövlətin vətəndaşların hüquqlarını, azadlıqlarını və mülkiyyətini qanun vasitəsilə qoruma qabiliyyətini zəiflədir.
"Yalnız Ulu Öndər Heydər Əliyevin ikinci dəfə hakimiyyətə dönüşündən sonra həyata keçirilən humanizm siyasəti milli həmrəyliyi təmin etdi, qanunçuluğu gücləndirdi və ölkədə hərbi-siyasi xaosa son qoydu. Diqqət yetirək ki, torpaqlarımızın Ermənistan tərəfindən işğala məruz qaldığı ötən əsrin 90-cı illərində üç dəfə dəyişən hakimiyyətlərin dövründə qəbul edilən amnistiya aktları nəinki dövlətçiliyin möhkəmlənməsinə xidmət etmədi, əksinə ölkədə silahlı birləşmələrə meydan açdı, cinayətkarlığın səviyyəsini artırdı və qanunsuz yolla hakimiyyət dəyişikliklərinə təkan verdi.
Ulu Öndərin yaratdığı 30 yaşlı "əfv institutu"nun sayca 71-ə çatan fərmanları ilə azadlığa qovuşan 10 min 162 vətəndaş təkrar cinayət törətməməklə dövlətimizin qərarının düzgünlüyünü təsdiqləyib, bağışlanma yolu ilə islah olunmağın mümkünlüyünü göstərib.
Prezident İlham Əliyevin 2025-ci ilin "Bütövlük və Suverenlik" amnistiyası isə mühüm hüquqi-siyasi akt olmaqla Qələbəmizi gücləndirməyə xidmət edir. Bir vaxtlar ərazilərimizin itirilməsinə görə çıxarılan cəza qərarları indi Qələbə amnistiyaları ilə əvəz olunub. Son 30 ildə baş verən ağır cinayətlərin sayı azalmaqla yanaşı, onların xarakteri, törədilmə üsulları və ağırlıq dərəcələri sabitlik və təhlükəsizliyin xeyrinə dəyişib. Məsələn, son 10 ildə qəsdən adam öldürmə hadisələrinin ümumi tendensiyası aşağı düşüb: əhalinin 100 min nəfərinə düşən ölüm faktları 2014-cü ildə 2,4 nəfər idisə, ötən ilin göstəricisi 1,6 nəfər təşkil edib”, - deyə Z.Oruc bildirib.
Komitə sədri qeyd edib ki, ölkəmiz əhalinin 100 min nəfərinə düşən məhkumların sayına görə, 269 nəfərlik göstərici ilə beynəlxalq indekslərdə sabit və təhlükəsiz ölkələr sırasında 56-cı yerdədir. Prezident İlham Əliyevin 2017-2019-cu il fərmanları isə cəza siyasətinin daha da humanistləşməsini, azadlıqdan məhrumetmə qərarlarının alternativ cəzalarla əvəz olunmasını nəzərdə tutur. Dekriminallaşma və Probasiya sisteminin yaradılması müsbət nəticələr verir. Buna görə də yeni həbsxanaların tikilməsi deyil, cinayətlərin səbəblərinin aradan qaldırılması prioritet olmalıdır. Hazırkı amnistiya aktı isə Penitensiar sistemdə məhkum sıxlığını azaltmağa xidmət edəcək.
“Eyni zamanda, müharibədə məğlub olan qüvvələrin beynəlxalq ədliyyə, məhkəmə və siyasi orqanlarda insan hüquqları mövzusunda Azərbaycana qarşı apardıqları kampaniyalara baxmayaraq, Prezidentin amnistiya təşəbbüsü həm vətəndaş cəmiyyəti, həm partiyalar, həm sosial media fəalları tərəfindən dəstəklənir", - deyə komitə sədri diqqətə çatdırıb.
Onun sözlərinə görə, İran, Rusiya və Qərbin təsir dairəsində olan 400 nəfərlik məhbus siyahısı ətrafında siyasi kampaniyalar aparanlar isə on minlərlə vətəndaşımızın azadlığa qovuşmasına qarşı gözdənsalma cəhdləri göstərirlər.
“Amnistiyaya əleyhinə çıxan, xaricdən hökmlər çıxarmağa cəhd edən və vətəndaşlarımızın dövlətimizdən deyil, xarici mərkəzlərdən ədalət gözləməsini təşviq edənlər anti-Azərbaycançı şəbəkələrdir. Məhkumlara siyasi mənsubiyyət fərqi qoymadan azadlıq verilməsi və dövlətin qərarını dəstəkləmək milli həmrəyliyin yeganə yoludur. Heç bir beynəlxalq təşkilat və ya məhkəmə qalib Azərbaycan liderinin ədaləti ilə müqayisə oluna bilməz”, - deyə Zahid Oruc qeyd edib.
jpg_1769767002.jpg)
