Bu ölkədə hakim partiya müxalifətin addımını xəyanət kimi qiymətləndirib

"Yanvarın 27-də açıq elan edilən Avropa Şurasının Parlament Assambleyasının (AŞPA) qış sessiyasında müzakirə olunan məsələlərdən biri Gürcüstan nümayəndəliyinin səlahiyyətlərinin müəyyənləşdirilməsi olub. Gürcü müxalifəti bir neçə həftə əvvəl Strasburqa məktub göndərərək, Gürcüstan nümayəndələrinin AŞPA-dakı səlahiyyətlərinin dayandırılmasını tələb edib". 

Bu sözləri "Azərbaycan" qəzetinə Beynəlxalq Münasibətlərin Təhlili Mərkəzinin aparıcı məsləhətçisi Nəsibə Mirzəyeva deyib. Ekspert qeyd edib ki, onlar bu addımla ölkədəki hadisələri beynəlxalq ictimaiyyətə çatdırmaq və bununla bağlı müəyyən sübutlar təqdim etmək niyyətində olduqlarını ifadə ediblər. Onların fikrincə, bu addım Gürcüstan hakimiyyətinə müəyyən problemlərin həlli üçün istiqamət vermək məqsədini güdür. "Lakin hakim partiya müxalifətin tələblərini ölkəyə qarşı xəyanət kimi qiymətləndirib. "Gürcü Arzusu" Partiyası Tea Tsulukiani rəhbərliyində nümayəndəliyin Avropa Şurasına obyektiv məlumat verdiyini bəyan edib. T.Tsulukiani hesab edir ki, müxalifətin əsas məqsədi AŞPA-da Gürcüstanda demokratik seçkilərin keçirilmədiyi barədə bəyanat vermək, o cümlədən Prezident Mixeil Kavelaşvilinin yerinə Salome Zurabişvilinin tanınmasına nail olmaqdır", - deyə o əlavə edib.

N.Mirzəyeva bildirib ki, parlament çoxluğu AŞPA-da Gürcüstan nümayəndəliyinə hər hansı bir məhdudiyyətin tətbiqinə şübhə ilə yanaşıb və irəli sürülən iddialara qarşı mövqelərini açıqlayıb. Bu arqumentlərə əsasən, ATƏT-in Demokratik Təsisatlar və İnsan Hüquqları Bürosu tərəfindən keçirilmiş seçkilərin nəticələri müsbət qiymətləndirilib, AŞPA oktyabrın 26-da müzakirəyə çıxardığı "Ədalətli Seçkilər"in paralel hesablaması ilə seçki nəticələri arasında uyğunsuzluq tapmayıb. 2024-cü ildə keçirilən seçkilərlə bağlı şikayətlərin sayının 2020-ci il seçkiləri ilə müqayisədə xeyli az olduğu bildirilib, xarici ekspertlər tərəfindən aparılan tədqiqat nəticələri seçkilərdə istifadə olunan avadanlıqların çoxsaylı pozuntuların qarşısını aldığını göstərib,  seçkilər üzrə 400-dən çox şəxs dindirilib, irəli sürülən iddialar əsassız hesab edilib. 

Ekspert vurğulayıb ki, Avropa İttifaqı Şurası isə Gürcüstanla Aİ arasında viza rejiminin sadələşdirilməsi sazişinin bəzi hissələrini dayandırmaq qərarına gəlib: "Bu qərar Gürcüstanda qəbul olunan "Xarici Təsirin Şəffaflığı Haqqında" qanun və "Ailə Dəyərləri və Yetkinlik Yaşına Çatmayanların Müdafiəsi Haqqında" qanunvericilik paketinə cavab olaraq verilib. Qərar nəticəsində Gürcüstan diplomatlarının və rəsmi şəxslərin Aİ-yə səfəri zamanı vizaya müraciət etmələri tələb oluna bilər. Hakim partiya bu qərarın ikili standartlara əsaslandığını və ABŞ-nin də oxşar qərarlar verdiyini qeyd edib. Başqa bir arqument olaraq hakimiyyətin son üç ildə apardığı siyasətə görə cəzalandırılmasının məqsədli olduğu iddia edilib. Baş nazir bu qərarı simvolik və B qeyri-effektiv adlandırıb".

AŞPA-nın Gürcüstanda yeni parlament seçkilərinin keçirilməsini və siyasi məhbusların azad edilməsini tələb edən qətnamə qəbul etdiyini xatırladan N.Mirzəyeva bildirib ki, qətnamə 134 deputatdan 114-ü tərəfindən dəstəklənib, 13-ü əleyhinə səs verib və 7-si bitərəf qalıb. Bu qətnamədə Gürcüstan hakimiyyətinə qarşıdakı aylarda yeni seçkilərin elan edilməsi, nümayişçilərə qarşı güc tətbiqinin dayandırılması, jurnalistlərə və vətəndaş fəallarına qarşı hüquqi tədbirlərin tətbiq edilməməsi, həmçinin "Xarici Agentlər" qanununun geri çəkilməsi tələb edilib. Bu şərtlərin aprel ayına qədər yerinə yetirilməsi tələb olunub. Gürcüstan nümayəndəliyi isə qətnamənin bir milyon 120 min seçicinin iradəsini nəzərə almadığını və bunun qəbuledilməz olduğunu bildirib. Baş nazir İrakli Kobaxidze AŞPA-nın hər il daha az aktual və funksional olduğunu və bu şəraitdə təşkilatın işində iştirak etməməyin Gürcüstan üçün mənfi nəticələr yaratmayacağını bəyan edib.

Əsmər QARDAŞXANOVA,

"Azərbaycan"