Azərbaycan və İran arasında münasibətlər zaman-zaman fərqli məcralarda inkişaf edib. Azərbaycan qonşu dövlətlə münasibətlərin inkişafı üçün əlindən gələni etməyə çalışıb. Ara-sıra anlaşılmazlıqlar baş versə də, ümumiyyətlə, iki ölkə siyasi iradə nümayiş etdirərək qarşıya çıxan problemlərin həll edilməsi üçün müvafiq işlərin görülməsini təmin etməyə çalışıb.
Milli Məclisin deputatı Vüqar İskəndərov bununla bağlı qəzetimizə açıqlamasında bildirib ki, İran Prezidenti Məsud Pezeşkianın Azərbaycana rəsmi səfəri çərçivəsində imzalanan sənədlər, verilən bəyanatlar hər iki tərəfin xoş qonşuluq niyyətində, münasibətlərin bütün sahələrdə tənzimlənməsində maraqlı olduğunu deməyə əsas verir: "Azərbaycanla bağlı həm ikitərəfli, həm də çoxtərəfli platformalarda bir-birini dəstəkləmək, regional məsələlərdə qarşılıqlı faydalı əməkdaşlıq çərçivəsində birgə fəaliyyət üçün yol xəritəsi cızıblar. Bu sevindirici haldır. İmzalanan sənədlər bir çox sahələri əhatə edir. Bunlardan biri də hərbi-texniki, müdafiə sənayesi sahəsidir".
Deputat vurğulayıb ki, Azərbaycan-İran hərbçiləri arasında həyata keçirilən "Araz-2025" hərbi təlimini daha da maraqlı edən işğaldan azad edilmiş ərazilərdə keçirilməsidir. Azərbaycan-İran hərbi əməkdaşlığının dərinləşdirilməsində birgə təlimin əhəmiyyəti çox böyükdür. Tədbirdə çıxış edənlər də iki ölkə arasında hərbi əməkdaşlığın faydalı olmasından söz açaraq, təlimin əhəmiyyətini qeyd ediblər. Bildirilib ki, bu təlim iki ölkənin silahlı qüvvələri arasında qarşılıqlı etimadın yaranmasına xidmət edir. Bu, çox vacib məsələdir.
V.İskəndərovun fikrincə, iki ölkə arasında hərbi sahədə münasibətlərin formalaşması, inkişafı həm qarşılıqlı faydalı əməkdaşlıq, həm də region üçün çox vacibdir: "Hazırda Azərbaycan və İran hərbçilərinin təlimdə iştirakı bir çox məsələləri özündə ehtiva edir. Bu təlim hərbi məsələləri əhatə etməklə bərabər siyasi hədəflərini də biruzə verməkdədir. Təlimlərin Azərbaycanın işğaldan azad olunmuş ərazilərində keçirilməsi İran dövlətinin ölkəmizlə münasibətlərə daha çox önəm verdiyini göstərir. İran Prezidentinin Azərbaycanda olarkən Qarabağdakı zəfərimizi qeyd etməsi, siyasi mövqeyini bildirməsi bu təlimlərlə də özünü göstərir".
V.İskəndərov qeyd edib ki, bütün bunlar imzalanmış sənədlər, verilən bəyanatların işləməsi deməkdir. Təbii ki, bu, məmnunluq doğurur. Azərbaycan və İran hərbçilərinin "Araz-2025" birgə təliminin iki qonşu ölkə arasında bütün sahələrdə gələcək inkişafa böyük stimul verəcəyinə inam yaradır.
Əsmər QARDAŞXANOVA,
"Azərbaycan"
