Minalanmış ərazilərin xəritələri və ya mina sahələrinə dair formulyarlar barədə ilkin məlumatların dəqiq və tam olmaması minatəmizləmə prosesini əhəmiyyətli dərəcədə çətinləşdirir, əməliyyatların planlaşdırılmasına və ərazilərin təhlükəsizliyinin qiymətləndirilməsinə birbaşa təsir göstərir.
Bu barədə Azərbaycan Minatəmizləmə Agentliyinin (ANAMA) AZƏRTAC-ın sorğusuna cavab olaraq verdiyi məlumatda bildirilib.
Qeyd edilib ki, normativ-texniki qaydalara əsasən, mina sahələrinin formulyarlarında minaların koordinatları, istinad nöqtələri, basdırılmış minaların növləri və sayı, onlar arasındakı məsafələr, həmçinin minaların basdırılma və gizlədilmə üsulları barədə məlumatlar öz əksini tapmalıdır. Lakin təqdim edilən formulyarlarda məlumatlar qeyri-dəqiq, etibarsız və natamam əks olunub.
Bununla yanaşı, Ermənistan tərəfindən təqdim edilmiş mina formulyarlarında uyğunsuzluqların olması, ərazilərin nizamsız şəkildə minalanması, minalanmış sahələrin metal qalıqları ilə çirkləndirilməsi, həmçinin mina və digər partlayıcı sursatlarla yanaşı, müxtəlif növ tələ minalarının və əldəqayırma partlayıcı qurğuların yerləşdirilməsi minatəmizləmə fəaliyyətini daha da mürəkkəbləşdirən əsas amillərdəndir.
“Şübhəli ərazilərin müəyyənləşdirilməsi prosesində mina və digər partlayıcı sursatlarla bağlı baş vermiş insidentlər barədə məlumatlar, həmçinin yerli əhalidən və ərazini yaxşı tanıyan şəxslərdən əldə edilən məlumatlar da mühüm əhəmiyyət daşıyır. Müasir texnologiyalar da bu prosesdə mühüm rol oynayır. Peyk təsvirləri, pilotsuz uçuş aparatlarından əldə olunan məlumatlar və coğrafi informasiya sistemləri vasitəsilə ərazinin xüsusiyyətləri, keçmişdə aparılmış fəaliyyətin izləri və mümkün təhlükəli sahələr təhlil olunur”, - deyə məlumatda diqqətə çatdırılıb.
677jpg_1790033437.jpg)
