Ötən ay Müstəqillik Günü münasibətilə Azərbaycan və Türkiyə prezidentləri İlham Əliyev və Rəcəb Tayyib Ərdoğan, eləcə də Pakistanın Baş naziri Məhəmməd Şahbaz Şərif Laçında bir araya gəldilər. Türkiyə, Azərbaycan və Pakistan liderlərinin mövcud çətinliklər qarşısında həmrəylik və birgə hərəkət qabiliyyətinin artırılması məqsədilə birlikdə olması çox əhəmiyyətlidir.
AZƏRTAC xəbər verir ki, bu fikirlər Mərmərə Qrupu Strateji və Sosial Araşdırmalar Vəqfinin sədri, professor Akkan Suverin Türkiyənin “Gözlem” qəzetində dərc olunmuş məqaləsində yer alıb.
Laçında keçirilən görüşlərdə ortaq coğrafiyalarda təhlükəsizlik təhdidlərinə qarşı birgə mübarizə, iqtisadi sahənin inkişafı, enerji və qida böhranlarının birlikdə aradan qaldırılması kimi mövzuların müzakirə olunduğunu bildirən Akkan Suver əlavə edib: “Azərbaycan Prezidenti İlham Əliyevin rəhbərliyi ilə keçirilən bu Zirvə görüşünü Qərbdə qurulmaqda olan yeni dünya nizamı ilə yanaşı, Şərqin yüksələn güc və dəyərlərinin birləşdirilməsinə yönəlmiş bir addım, bir başlanğıc kimi qiymətləndirmək olar. Türkiyə, Azərbaycan və Pakistan bu Zirvə görüşündə xarici siyasətə istiqamət verə biləcək yeni platforma qura biləcəklərinin siqnallarını verdilər. Ümumi əhalisi 350 milyon və iqtisadi gücü 1,5 trilyon dollar olan bu üç ölkənin strateji əməkdaşlığı coğrafiyamız üçün böyük əhəmiyyət daşıyır”.
O bildirib ki, Avrasiyanın kəsişməsində yerləşən Azərbaycan, Pakistan və Türkiyə nəqliyyat sahəsində də “İnkişaf yolu”, Orta Dəhliz və Şimal-Cənub Nəqliyyat Dəhlizinin birləşdirici həlqələri kimi bölgəyə birlikdə rəhbərlik edə bilər. Blokların və qütbləşmənin artdığı müasir dövrdə reallaşan bu əməkdaşlıq beynəlxalq sistemə yeni töhfədir.
“Qeyd etməliyik ki, Azərbaycan və Türkiyənin əməkdaşlığı ilə bölgəmizdə enerji xəritəsi yenidən formalaşıb. Həmçinin Azərbaycan və Türkiyə Pakistan ilə Hindistan arasında yaşanan münaqişədə rəsmi İslamabadın ərazi bütövlüyünə tam dəstək göstərirlər ki, bu da xüsusi qeyd olunmalı bir həqiqətdir”, - deyə Akkan Suver bildirib.
O qeyd edib ki, əgər bölgəmizin Şərqi Aralıq dənizi, Kipr, Qarabağ və Kəşmir kimi müxtəlif coğrafiyalarındakı münaqişələrin bənzər əsaslara söykəndiyini qəbul etsək, birgə hərəkətin əhəmiyyəti və zəruriliyi də özü-özlüyündə aydın olacaq.
Professor məqaləsini Azərbaycan Prezidenti İlham Əliyevin Laçın şəhərində 28 May – Müstəqillik Gününə həsr edilmiş konsertdən əvvəl çıxışı zamanı səsləndirdiyi “Bu gün bizim üçtərəfli əməkdaşlığımızın (Azərbaycan-Türkiyə-Pakistan əməkdaşlığı – red.) yeni səhifəsi açılır. Bu gün müzakirə etdiyimiz məsələlər, əldə etdiyimiz razılaşmalar bizi bir-birimizə yaxın edəcək” fikirləri ilə yekunlaşdırıb.
