Böyük əzm, iradə və qətiyyət nümayiş etdirərək Qarabağı 30 illik işğaldan azad edən Prezident İlham Əliyevin xüsusi diqqət və qayğısı ilə indi bu tarixi bölgəmizin bərpası və quruculuğu istiqamətində mühüm layihələr həyata keçirilir.
Azadlığından sonra həmin bölgələrə səfər edən və o yerlərin barbar düşmən tərəfindən necə viran qoyulduğuna şahidlik edən biri olaraq deyirəm ki, ötən beş il yarımlıq müddət ərzində Qarabağ və Şərqi Zəngəzur dünya tarixində görünməmiş formada dəyişib.
"Ağıllı" kənd və şəhərlərin, nəhəng tunellərin, yolların salındığı, beynəlxalq hava limanlarının tikilib istifadəyə verildiyi bu ərazilərdə dövlətimiz tərəfindən kompleks işlər gerçəkləşdirilir. Həyatın sürətlə axara düşdüyü bu torpaqlara davamlı olaraq qayıdış həyata keçirilir. Yeni müstəqil Azərbaycanın təməllərini yaradan və ölkəmizi qurtuluş yoluna çıxaran Ulu Öndərimiz Heydər Əliyevin 102-ci doğum günündə isə Ağdamın Kəngərli kəndi qayıdışın növbəti ünvanı oldu. Dövlətimiz tərəfindən bu kənddə də sakinlərə gözəl evlər tikilib, güzəranlarının xoş keçməsi üçün hərtərəfli şərait yaradılıb. Həmin gün cənab Prezident İlham Əliyev Kəngərli kəndinə köçən sakinlərlə görüşüb, onlara evlərin açarlarını təqdim edib.
Hələ Vətən müharibəsindəki zəfərə qədər dövlətimizin başçısı çıxışlarında vurğulayırdı ki, Qarabağ və Şərqi Zəngəzur mütləq işğaldan azad ediləcək və keçmiş məcburi köçkünlər üçün doğma torpaqlarında gözəl evlər tikiləcək. İndi cənab Prezident İlham Əliyevin vaxtilə dediyi həmin sözlərin reallığa çevrildiyini gözlərimizlə görürük. Sözü imzası olan Prezident İlham Əliyev kəngərlilərlə görüşü zamanı məhz bu məqama toxunaraq dedi ki, bugünkü mərasim o sözlərin, necə deyərlər, möhürüdür: "Bilirəm, sizdə də, bizdə də - bütün Azərbaycan xalqında heç vaxt şübhə olmayıb ki, biz öz torpaqlarımıza qayıdacağıq. Amma çox möhtəşəm qayıtdıq. 44 gün ərzində düşməni böyrü üstə qoyduq. Ondan sonra da 23 saat ərzində, bəlkə də daha da tez separatçıların kökünü tamamilə kəsdik".
İşğal dövründə düşmən Ağdamı xüsusi qəddarlıq, vəhşiliklə dağıtmış, hətta qəbiristanlıqlarımızı belə şumlamışdı. Ağdam şəhərində bir tək Ağdam Cümə məscidinin divarları salamat saxlanmışdı, o da mənfur niyyətlərə görə idi.
Azadlığından sonra ilk dəfə 2021-ci il mayın 28-i Müstəqillik Günündə Prezident İlham Əliyevin Ağdama səfəri zamanı biz də getmişdik. Təsəvvür edin ki, şəhərdə qarşılaşdığımız dəhşətli mənzərələrdən şoka düşmüşdüm, bir anlıq elə düşünmüşdüm ki, bu talandan, dağıntıdan sonra Ağdam çətin bir də özünə gələr. Ancaq elə həmin gün cənab dövlət başçımızın öz əlləri ilə Qarabağın təməl daşını Ağdamda atması ilə içimdəki inamsızlıq hissi də yoxa çıxdı. Ağdamda ağdamlı ziyalıların, ictimaiyyət nümayəndələrinin iştirakı ilə təməlqoyma mərasimi oldu, işğaldan azad edilən yurdlardan birinci baş plan da məhz Ağdamda təsdiqləndi. Cənab Prezident Ağdamda həyata keçiriləcək bütün işlərlə bağlı orada olan Ağdam ziyalılarının, ictimaiyyət nümayəndələrinin hər birinin fikrini öyrəndi. Ən xırda detalın belə gözdən qaçırılmamasına, mükəmməl şəkildə həyata keçirilməsinə çalışdı.
Budur, artıq gündən-günə dirçəldilən Ağdamda genişmiqyaslı quruculuq işləri aparılır. Qısa müddətdə çox əhəmiyyətli infrastruktur obyektlər istifadəyə verilib.
Ağdam rayonuna ilk köç isə bu il martın 27-də Sarıcalı kəndinə olub. Bu kəndə köçən sakinlərə də yeni evlərinin açarlarını dövlətimizin başçısı İlham Əliyev şəxsən təqdim etdi, sarıcalıların yurda dönüşlərinin sevincini onlarla birlikdə yaşadı. Ağdam şəhərinin sıfırdan qurulduğunu və ölkəmizin ən gözəl şəhərlərindən birinə çevriləcəyini söyləyən cənab Prezident dedi ki, biz Ağdamı yenidən qururuq və quracağıq.
Ağdamın tarixi, dini, mədəni ruhu da dirçəldilir, mənəvi ruhu özünə qaytarılır. Birinci vitse-prezident Mehriban xanım Əliyevanın rəhbərliyi altında Heydər Əliyev Fondu tərəfindən Ağdamda bu istiqamətdə mühüm işlər görülür. Bu baxımdan, ötən ilin aprelində fond tərəfindən müvəffəqiyyətlə bərpaolunan Ağdam Cümə məscidinin Prezident İlham Əliyev və Qırğız Prezidenti Sadır Japarov tərəfindən açılışının edilməsinin özünəməxsus əhəmiyyəti oldu.
Ağdam həm də Azərbaycanın muğam mərkəzi sayılır. Bu il mayın 10-da Ulu Öndərimiz Heydər Əliyevin doğum günündə Prezident İlham Əliyev Ağdam Muğam Mərkəzinin açılışını etməklə bütün muğamsevərlərə bayram hədiyyəsi etdi. Qarabağda, Ağdamda yenidən doğma muğamlarımızın eşidilməsi həm bu yerlərin milli ruhunun qayıdışı, həm də Xan Şuşinskinin, Seyid Şuşinskinin, Zülfi Adıgözəlovun, Sara Qədimovanın, Səxavət Məmmədovun, Qədir Rüstəmovun və neçə-neçə muğam ustadlarımızın ruhlarının şad olması demək idi.
Cənab Prezident İlham Əliyevin şəxsi diqqəti və səyləri ilə Ağdamda da həyata keçirilən unikal quruculuq və bərpa işləri onu deməyə əsas verir ki, çox tezliklə Qarabağın bu qədim şəhəri də öz şan-şöhrətli günlərinə qovuşacaq.
Natiq CAVADOV,
Müdafiə Sənayesi Nazirliyinin Milli Aerokosmik Agentliyinin baş direktoru
jpg_1775472819.jpg)
