1996-cı il oktyabrın 1-də, sərin bir payız günündə Goranboyun Yolqulular kəndində yaşayan Qüdrət kişinin ailəsində bir oğul övladı dünyaya gəldi. "Həmişə elə arxa, dayaq olsun" - deyib körpənin adını Qəhrəman qoydular.
İllər yavaş-yavaş ötüb keçdikcə Qəhrəman da boya-başa çatdı. 6 yaşı olanda valideynlərinin əlindən tutub yaşıdları ilə çiyin-çiyinə kəndlərindəki orta məktəbə getdi. Beləcə, günlər, həftələr, aylar yavaş-yavaş ilə dönərək durna qatarı kimi ötüb keçdi. Qəhrəman həm dərslərini yaxşı oxuyur, həm də məktəbin ictimai həyatında yaxından iştirak edirdi. "Üfüqdə parıltı", "Cəsurlar", "Şahin" hərbi idman və turizm oyunlarında böyük fəallıq göstərirdi.
Qəhrəman Məmmədov 2014-cü ildə ordu sıralarına çağırıldı. O, bu günü çoxdan gözləyirdi. Gözləyirdi ki, əyninə hərbi forma geyinib ordu sıralarına yollansın, Vətənə xidmət eləsin. Qoynunda dünyaya göz açdığı torpaqları düşmənlərdən qorusun. Artıq Qəhrəman arzusuna çatmışdı.
Doğmaları, yaxınları onu ordu sıralarına təntənə ilə yola saldılar. Qəhrəman əsgərliyə yollanarkən doğmalarına verdiyi sözə sadiq qaldı. Xidmətinin ilk günlərindən təlim-məşqlərdə fəal iştirak etdi, hərbi biliklərə dərindən yiyələndi.
Günlər keçdikcə, xidməti davam etdikcə əsgər Qəhrəman Məmmədovun orduya, hərbi xidmətə sevgisi daha da artırdı. Silahlı Qüvvələrin sıralarında xidmət etməyi özü üçün böyük şərəf bilən Qəhrəman Vətənə xidmət etmək istəyirdi. Odur ki, ordu sıralarında qalıb müddətdən artıq həqiqi xidmət qulluqçusu kimi xidmət etmək istədiyini komandanlığa bildirdi. Etiraz etmədilər.
Qəhrəman Məmmədov torpaqlarımızın azadlığı uğrunda döyüşməyə, igidlik göstərməyə hər an hazır idi. Onun gözlədiyi gün 2020-ci il sentyabrın 27-də gəldi. İkinci Qarabağ müharibəsi başlayanda Qəhrəman Məmmədov ön xətdə idi. Bir müddətdən sonra onları Suqovuşana göndərdilər. Bu istiqamətdə qanlı döyüşlər gedirdi. Geriyə çəkilmək istəməyən düşmən əlverişli mövqelərdə möhkəmlənərək ciddi müqavimət göstərirdi. Amma nəyin bahasına olursa olsun, yağılar geri oturdulmalıydı.
Qəhrəman Məmmədov cəsarətlə vuruşurdu. Atdığı güllələrin biri də olsun hədəfdən yayınmırdı. Düşmən ordumuzun güclü əks-hücumları qarşısında dayana bilməyərək geri çəkilirdi. Amma Suqovuşandan geri çəkilən düşmən strateji yüksəkliklərdə mövqelər tutaraq müqavimət göstərməyə çalışırdı. Döyüşün qızğın, həlledici məqamında Qəhrəman kürəyindən yaralandı. Buna baxmayaraq, döyüş mövqeyindən çıxmadı, geri çəkilmədi, atəşi dayandırmadı. Güllələri düşmənin başına dolu kimi yağdırmağa davam etdi. Təəssüf ki, bir azdan düşmənin atdığı güllə bu dəfə onun başından dəydi. Əsgər Qəhrəman Məmmədov şəhid oldu.
Doğmaları, əzizləri göz yaşları içində onu doğulduğu Yolqulular kəndində torpağa tapşırdılar. Qəhrəman ölümü ilə də valideynlərinin, doğmalarının başını el içində uca etdi. Ölümündən sonra 3-cü dərəcəli "Vətənə xidmətə görə" ordeni və "Suqovuşanın azad olunmasına görə", "Vətən uğrunda" medalları ilə təltif edildi.
Vahid MƏHƏRRƏMOV,
"Azərbaycan"
