Azərbaycan Prezidenti İlham Əliyevin Naxçıvana səfərini təhlil edərkən məntiqi ardıcıllığa diqqət yetirdikdə, səfərin məqsədlərinin kifayət qədər aydın olduğu görünür. İlk növbədə, səfərin məqsədinə baxdıqda, əsas məqsəd üç istiqamət üzrə müəyyən tədbirlərin həyata keçirilməsini təmin etmək idi. Birinci növbədə Naxçıvanın təhlükəsizliyi məsələsi ilə bağlı ciddi mesaj verildi. Hərbi hissənin yenidən qurulması, komando birliklərinin imkanlarının genişləndirilməsi və sair məsələlər Naxçıvanın təhlükəsizliyi ilə bağlı ciddi mesaj idi. İkinci istiqamət Naxçıvanın sosial-iqtisadi inkişafı, əhalinin rifahının gücləndirilməsi, müəyyən sosial layihələrin həyata keçirilməsi və sosial çağırışların həlli oldu.
Bu barədə AZƏRTAC-a açıqlamasında iqtisadçı-ekspert Elman Sadıqov deyib.
“Bununla bağlı Prezident tərəfindən Sərəncam imzalandı və müxtəlif istiqamətlər üzrə məsələlərin həlli ilə bağlı 258 milyon manat vəsait ayrıldı. Bu vəsaitin içərisində həm də investisiya xarakterli məsələlər var. Məsələn, 15-16 meqavat gücündə su elektrik stansiyasının tikintisi, eləcə də sosial istiqamətli məsələlər var. Binaların mərkəzi istilik sistemi ilə təmin olunması, təmiri və sair”, - deyə ekspert bildirib.
O qeyd edib ki, üçüncü əsas məsələ Naxçıvanın qlobal layihələrdə iştirakını təmin edən infrastruktur layihələrinin həyata keçirilməsi, bununla bağlı yerli və beynəlxalq ictimaiyyətə konkret mesajların çatdırılmasıdır: “Azərbaycan, o cümlədən onun ayrılmaz parçası olan Naxçıvan Orta Dəhlizin əsas iştirakçılarından biri kimi müəyyənləşdirilib. Naxçıvan Orta Dəhlizdə hansı rol oynayacaq. Azərbaycan həmin layihələrdə investorların cəlb olunmasına müsbət baxır - bütün bunlarla bağlı konkret mesajlar verildi”.
Ekspert vurğulayıb ki, müxtəlif layihələrin həyata keçirilməsinin və qlobal layihələrin Naxçıvanın iqtisadiyyatına töhfəsi məsələsi də xüsusi əhəmiyyət daşıyır. Burada önəmli məsələlərdən biri odur ki, Azərbaycan təkcə Orta Dəhlizdən keçən yükün həcminin artırılmasını deyil, həm də bu logistika xəttindən əlavə, Orta Dəhlizdən əldə olunan iqtisadi dəyərin artırılmasında maraqlıdır. Azərbaycan həm ənənəvi, hə də alternativ enerjisini ixrac etməyi planlaşdırır. Bu dəhlizlə paralel olaraq gələcəkdə fiber-optik kabelin çəkilməsi, avtomobil yollarının inşası və sair gözlənilir. Naxçıvanda, həmçinin sənaye və istehsal imkanlarının genişləndirilməsi mühüm əhəmiyyət daşıyır. Muxtar respublikada istehsal olunan məhsullar üçün lazım olan xammalın həmin dəhliz vasitəsilə gətirilməsi, hazır məhsulların isə bu marşrutla ixrac olunması imkanları var”.
O deyib ki, səfər çərçivəsində sənaye və enerji sahələri ilə bağlı da konkret mesajlar verilib: “Prezident Naxçıvana səfəri zaman ümumi gücü 50 MVt olan “Şəms 1” və “Qərbi Üfüq” Günəş elektrik stansiyalarında görülən işlərlə tanış oldu. Stansiyanın istismara verilməsindən sonra illik təxminən 57 milyon kilovat-saat elektrik enerjisinin istehsal olunacağı və 19 minə yaxın ev təsərrüfatının enerji ilə təmin ediləcəyi planlaşdırılır. Bununla da ildə təxminən 26 min ton karbon qazı emissiyasının qarşısı alınacaq və 12 milyon kubmetr təbii qaza qənaət ediləcək. Naxçıvanın elektrik enerjisi istehsal etmək imkanları genişdir. Burada su, istilik və Günəş enerjisindən istifadə imkanları mövcuddur. Bu istiqamətdə konkret mesajların verilməsi Azərbaycanın həm elektrik enerjisi istehsalı, həm də ixracı baxımından imkanlarını genişləndirə bilər.
Naxçıvanın turizm potensialına da diqqət çəkən iqtisadçı-ekspert bildirib ki, muxtar respublika Azərbaycanın ən böyük turizm potensialına malik olan bölgələrindən biridir. Özünün tarixi abidələri ilə çox böyük imkanlara malikdir. Naxçıvanın tarixi və mədəni irsinin, tarixi məkanlarının daha geniş tanıdılması üçün imkanlar böyükdür. Naxçıvanda turizmin inkişafı ilə bağlı verilən mesajlardan biri də mehmanxana infrastrukturunun genişləndirilməsi ilə əlaqədardır. Muxtar respublikada hotellərin hazırda müəyyən tələblərə cavab verməsi və yeni hotellərin tikintisi ilə bağlı tədbirlər görülür. Həmçinin Naxçıvanda binaların təmiri, istilik stansiyasının tikintisi, yolların çəkilməsi və digər infrastruktur layihələrinin icrasının böyükdür. Naxçıvan rayonlarını bir-birinə bağlayan yolların daha da təkmilləşdirilməsi regionun inkişafına əlavə imkanlar yaradacaq. Qazlaşdırma və digər kommunal infrastruktur məsələləri ilə bağlı da dövlətimizin başçısı tərəfindən konkret mesajlar verilib və qarşıdakı dövrdə bu istiqamətdə tədbirlərin görülməsi gözlənilir.
