Xalqın tərəqqisinə, uğurlu gələcəyinə yol açan təhsilin inkişafı, milli-mənəvi dəyərlərin qorunması və təbliği Azərbaycan dövlətinin prioritet istiqamətlərindəndir.
Son illər ölkəmizdə təhsilə qayğı, onun maddi-texniki bazasının möhkəmləndirilməsi işi ümummilli səviyyəyə yüksəldilib. Respublikamızın bütün bölgələrində müasir tələblərə uyğun minlərlə yeni məktəb binası tikilib və ya təmir edilib. Geniş bazaya malik təhsil infrastrukturu yaradılıb. Bu sahədə əhəmiyyətli layihələr icra olunur, dövlət proqramları həyata keçirilir. Görülən işlər Azərbaycanın gələcək uğurlarını təmin edəcək, ölkəmizin adını yeni zirvələrə ucaldacaq bu günün şagirdlərinin daha yaxşı təhsil almalarına, savadlı olmalarına şərait yaradır.
Azərbaycanda mədəniyyət və incəsənətə dövlət qayğısı da yüksələn xətlə davam edir. Bu sahənin inkaşafı üçün də Prezident İlham Əliyev tərəfindən çoxsaylı fərman və sərəncam imzalanıb, bir sıra islahatlar həyata keçirilir. Dövlət başçısının sərəncamına əsasən, mədəniyyət ocaqlarının yubileyləri təntənə ilə qeyd olunur.
Görkəmli sənət adamlarının yubileyləri həmçinin Azərbaycan Prezidentinin fərdi təqaüdünün və mükafatlarının verilməsi haqqında sərəncamları dövlətimizin başçının mədəniyyətimizə, sənət adamlarımıza göstərdiyi diqqət və qayğının nümunəsidir. Prezident İlham Əliyev vurğulayıb: "Xalqımızı xalq kimi, millət kimi qoruyub saxlayan bizim ənənələrimiz olub, tariximiz olub, ədəbiyyatımız, ana dilimiz və mədəniyyətimiz olubdur. Mədəniyyət, ədəbiyyat, milli musiqi, ana dilimiz tarixi keçmişimizdir - biz bu sahələrə böyük diqqət göstərməliyik".
Dövlətimizin digər sahələr kimi təhsilin, mədəniyyətin inkişafına göstərdiyi diqqət və qayğının daha bir göstəricisi Milli Məclisdə birinci oxunuşda qəbul edilən "Azərbaycan Respublikasının 2025-ci il dövlət büdcəsi haqqında" qanun layihəsidi. Belə ki, gələn il təhsil, mədəniyyət sahələrinə ayrılan xərclər artırılacaq.
Diqqətə çatdıraq ki, növbəti ilin dövlət büdcəsi layihəsində təhsil xərclərinə 4946,1 milyon manat ayrılması proqnozlaşdırılır. Bu, 2024-cü illə müqayisədə 395,7 milyon manat və ya 8,7 faiz çoxdur. Valideynini itirmiş və ya valideyn himayəsindən məhrum olmuş, ölkəmizin suverenliyi və ərazi bütövlüyü uğrunda həlak olmuş, əlil olmuş şəxslərin və keçmiş məcburi köçkünlərin övladları olan tələbələrin, müharibə veteranlarının ali təhsil xərclərinin dövlət hesabına ödənilməsi üçün 41 milyon manat vəsait ayrılacaq.
2025-ci ildə mədəniyyət, informasiya, bədən tərbiyəsi, gənclər siyasəti üzrə ayrılan vəsait cari illə müqayisədə 10,4 faiz artırılaraq 635,0 milyon manat təşkil edəcək.
Son illərin davamlı uğurları sayəsində dünyada nüfuzu yüksələn Azərbaycan yeni hədəflər müəyyənləşdirir və onlara doğru qətiyyətlə irəliləyir. Vətən müharibəsində qazandığımız Zəfər bu illərin ən böyük tarixi hadisəsi oldu. Müharibədən üç il sonra - 2023-cü ildə aparılan lokal xarakterli antiterror tədbirləri nəticəsində Qarabağda separatizmin kökü kəsildi. Azərbaycan öz suverenliyini tam bərpa etdi.
Qalibiyyətlə qürur duymaq da, öyünmək də olar. Ancaq ləngimək olmaz. Çünki əldə olunmuş nailiyyətləri qoruyub saxlamağın yolu yeni uğurlara imza atmaqdır. Azərbaycan məhz bu yolu tutub.
Azərbaycan Ordusu qəsbkar Ermənistan silahlı qüvvələrini məğlub edərək otuz ilə yaxın işğal altında qalan ərazilərimizi azad etdi. Təəssüf ki, işğalçılar həmin abad yerləri xarabalığa çevirmişdilər. İndi Azərbaycan o torpaqlara Böyük qayıdış proqramı həyata keçirir. Qarabağ və Şərqi Zəngəzurda bərpa və yenidənqurma işləri postmüharibə dövrünün əsas prioritetlərindəndir. Erməni vandallarının dağıtdıqları, yerlə yeksan etdikləri kəndlərimizi, qəsəbələrimizi, rayonlarımızı, şəhərlərimizi dövlətimiz yenidən qurur. Qarabağın və Şərqi Zəngəzurun əhalisi uzun illərdən sonra doğma yurdlarına qayıdırlar.
Geniş və sürətli tikinti-bərpa, quruculuq işləri həyata keçirilən həmin ərazilərdə yeni təhsil və mədəniyyət ocaqları inşa olunur. Sevindirici haldır ki, dövlətimizin böyük diqqət və qayğısı ilə təhsil, mədəniyyət və incəsənət sahələrində həyata keçirdiyi yeniliklərin, uğurlu layihələrin reallaşdırıldığı ünvanlar sırasında indi Qarabağ və Şərqi Zəngəzur da var.
Zöhrə FƏRƏCOVA,
"Azərbaycan"
