Son illər yaşadığımız H.Z.Tağıyev qəsəbəsinin yüksəkmərtəbəli binalarının dam örtükəri dəyişdirilib, fasadları rənglənib, səkilər təmir edilib, yolların kənarında xeyli ağac əkilib.
Qəsəbəmizin içindən keçən Quba-Bakı magistral yolunun hər iki tərəfi də təmir edilir. Yolun qəsəbənin digər tərəfində olan hissəsində torpaq təpəcikləri düzəldilir, yaşıllıqlar salınır. "Yaşıl dünya naminə həmrəylik ili" çərçivəsində yeni yaşıllıq zolaqları salınacaq və ağaclar əkiləcək. Həmçinin parklarda yaşıllıqlar genişlənəcək.
Bütün bu proseslərdə qəsəbə əhalisi də yaxından iştirak edir. Qəsəbədə vaxtaşırı bir sıra ədəbi-bədii tədbirlər - "Sumqayıt şəhərinin 75 illiyi" və "Sumqayıt şairlərimizin şeirlərində", "Narkomaniyaya yox deyək", "Ekologiyamızı qoruyaq" kimi tədbirlər və şahmat, dama yarışları keçirilir. Sumqayıtın qurucuları ilə yeni nəslin nümayəndələri arasında da görüşlər təşkil edirik. Bu günlər qəsəbədəki musiqi məktəbinin nəzdində olan rəsm dərnəklərinin üzvləri ilə birlikdə şəhərimizin yubileyinə rəsm müsabiqələri təşkil etmişdik.
Ağsaqqallarımız Sumqayıtın 75 yaşını qeyd etməyə hazırlaşırlar. Qəsəbəmizin əvvəlki illərini və indiki həyatını əks etdirən sərgilər, qocaman tağıyevçilərin ziyarəti və digər tədbirlər yer alacaqdır.
Bu gün qəsəbənin qarşılaşdığı problemlər də şuramız tərəfindən araşdırılır, onların həlli üçün əlaqədar idarələr qarşısında məsələ qaldırılır. Bu qəsəbə bizimdirsə, böyüklü-kiçikli hamımız onun inkişafı üçün çalışmalıyıq. Odur ki, ağsaqqallar həm də gənclər arasında tərbiyəvi işlərin aparılmasında yaxından iştirak edirlər. Ona görədir ki, son illər qəsəbədə cinayət hallarının sayı azalıb.
Əsas məsələlərdən biri gənclərimizin təhsilidir. Son illər ali məktəblərə qəbulda artım müşahidə olunur. Hamı yaxşı başa düşür ki, gələcək elmin yüksəlişinə söykənir. Əminik ki, qəsəbə sakinlərinin illərin sınağından keçən əzmkarlığı, sağlam ruhu və gələcəyə inamı bizi nurlu sabahlara aparacaq.
Arif QAFAROV,
Sumqayıt şəhəri, Hacı Zeynalabdin Tağıyev qəsəbəsi Ağsaqqallar Şurasının sədri
 (1)jpg_1732227508.jpg)
