Azərbaycanla sülh müqaviləsinin imzalanmasını hər cəhdlə uzatmağa çalışan Ermənistanın tənəzzülü bir qədər də sürətli xarakter almaqda, ölkənin üzləşdiyi çətinliklərin miqyası davamlı şəkildə genişlənməkdədir. Bütün bunlar isə ölkədə iqtidarın əhali arasında nüfuzunun daha da aşağı düşməsi ilə müşayiət olunmaqdadır. Araşdırmalar göstərir ki, Ermənistanda iqtisadiyyatın ifrat mərkəzləşdirilməsi, bütün resursların hakimiyyətdəki ailə ilə oliqarxların əlində cəmləşməsi, vergilərin qarətə çevrilməsi nəticəsində Ermənistanda ağır bir situasiya formalaşıb.
Baş nazir Nikol Paşinyan isə 2026-cı il seçkilərində ona maneə yarada biləcək bütün siyasi qüvvələri və personaları zərərsizləşdirməyə çalışır. Hətta iş o yerə gəlib çatıb ki, inanmadığı komanda üzvlərinə qarşı repressiya maşınını işə salıb. Belə ki, məhkəmə Ermənistan silahlı qüvvələrinin baş qərargah rəisinin keçmiş müavini general-leytenant Tiran Xaçatryanı həbs edib. O, səhlənkarlıqda ittiham olunur.
"4rd.am" nəşri yazıb ki, əvvəllər "milli qəhrəman" və baş qərargah rəisinin keçmiş müavini barəsində 44 günlük müharibə zamanı yol verdiyi qanun pozuntularına görə iş açılıb. Generalın özü ittihamları qəbul etmir. "Gözlənildiyi kimi, (müdafiə tərəfinə - red.) 1200 səhifəlik işlə tanış olmaq üçün kifayət qədər vaxt vermədən, hakim Masis Melkonyan ağlabatan şübhə və əsasların olmamasına məhəl qoymadan müstəntiqin vəsatətini təmin etdi və general-leytenant Tiran Xaçatryanı 2 ay müddətinə həbs etdi" - müdafiə tərəfinin bəyanatında qeyd olunur.
Bəyanatda bildirilir ki, beş saata yaxın davam edən məhkəmə iclasında Xaçatryana qarşı irəli sürülən ittihamların əsassızlığı və onun həbsi üçün əsasların olmaması tam təsdiqini tapıb. Xüsusilə vəkillər bildirdilər ki, bu, orta ağırlıqda cinayət törətməkdə təqsirləndirilən şəxsin tutulması ilə bağlı nadir hallardan biridir və istintaqa mane olmaq üçün mücərrəd ehtimal Xaçatryanın dördillik istintaq zamanı davranışı ilə təkzib olunur. Bəyanatda o da qeyd olunur ki, bu cinayət işi üzrə iddia müddəti yaxınlaşır və Xaçatryanı həbs cəzası gözləmir.
Tiran Xaçatryan müharibə zamanı istiqamətlərdən birinə komandirlik edib. 2020-ci ilin oktyabrında hərbi əməliyyatların qızğın vaxtında ona "milli qəhrəman" adı verilib. Lakin sonradan general gözdən düşüb və 2021-ci ilin fevralında vəzifəsindən uzaqlaşdırılıb. Buna səbəb Xaçatryanın Paşinyanın "İsgəndər" raketləri ilə bağlı bəyanatına cavab olaraq ironik açıqlamaları olub. Baş nazir bildirib ki, müharibə zamanı raketlər "partlamadı və ya sadəcə 10 faizi partladı".
General istefa verdikdən sonra dəfələrlə hakimiyyətin siyasətinə tənqidi qiymətlər verib. 2024-cü ilin yanvarında isə o, restoranlardan birində mübahisə və davadan sonra həbs edilib. Dava zamanı Xaçatryan silahdan atəş açaraq, təsadüfən mübahisə ilə heç bir əlaqəsi olmayan restorana gələn qonaqlardan birini yaralayıb. O, həmin il mart ayında zaminə buraxılmışdı.
Belə bir məqamda hökumətə qarşı İrəvanda tədricən yüksəlməyə başlayan etirazların ölkədə növbəti xaos yaradacağı ehtimalını daha da artırıb. Hakimiyyət özünə qarşı edilən bütün çıxışları birmənalı şəkildə güc yolu ilə susdurmağa, etiraz aksiyalarını polis dəyənəyi və rezin gülləsi hesabına dağıtmağa üstünlük verir. Kütləvi həbslər həyata keçirilir, siyasi partiya rəhbərləri, fəallar saxlanılır, həbs edilir, deputatlara qarşı hücumlar təşkil olunur.
Bu problemlər onu deməyə əsas verir ki, Ermənistan kifayət qədər ciddi problemlərlə üz-üzədir. Yaranmış vəziyyət ciddi siyasi böhranın tezliklə ölkədə qarşıdurmanı ən yüksək həddə çatdıracağını göstərir.
Elçin CƏFƏROV,
"Azərbaycan"
