- Bakıda evim var, amma çıxarışım yoxdur. Qeydiyyata necə düşə bilərəm?

Mətanət XƏLİLOVA, 

Lənkəran rayonu

- Sualınıza cavab olaraq bildiririk ki, "Yaşayış yeri və olduğu yer üzrə qeydiyyat haqqında" Azərbaycan Respublikası Qanununun 5-ci maddəsinin ikinci hissəsinin 2-ci bəndinə, habelə "Yaşayış yeri və olduğu yer üzrə qeydiyyat haqqında" Azərbaycan Respublikası Qanununun tətbiqi haqqında Əsasnamənin 2-ci bəndinin "a" yarımbəndinə əsasən, yaşayış yeri üzrə qeydiyyata alınmaq üçün tələb olunan sənədlərə əsas etibarilə mülkiyyət hüququnun dövlət qeydiyyatına alınması haqqında daşınmaz əmlakın dövlət reyestrindən çıxarış, order, icarə və ya kirayə müqaviləsi aiddir. Yaşayış yeri üzrə qeydiyyat orqanı qismində Daxili İşlər Nazirliyi çıxış edir. Əsasnamənin 9-cu bəndində göstərilir ki, əgər şəxsin mülkiyyətdən istifadəyə hüququnu təsdiq edən sənəd yoxdursa, qeydiyyat orqanı şəxsi yaşayış yeri üzrə qeydiyyata almaqdan imtina edir.

Çıxış yolu kimi qeydiyyat orqanının (polis orqanının) olduğu yer üzrə qeydiyyata alınmaqla bağlı məhkəməyə müraciət etməyi tövsiyə edirik. Bunun üçün maraqlarına toxunulan şəxs əmlakın yerləşdiyi yer üzrə qeydiyyat orqanına (polis) həmin orqanın olduğu ünvan üzrə qeydiyyata salınmaqla bağlı müraciət etməlidir. Qeydiyyat orqanından alınacaq imtinadan İnzibati Prosessual Məcəllənin 2.2.2 və 8.1.2-ci maddələrinin tələbinə uyğun olaraq, Bakı İnzibati Məhkəməsinə inzibati orqanın üzərinə yaşayış yeri üzrə qeydiyyata alınma barədə öhdəliyin qoyulması ilə bağlı ərizə verilir. Yalnız bundan sonra məhkəmənin qərarı ilə şəxs qeydiyyat orqanının (polis orqanının) olduğu ünvan üzrə yaşayış qeydiyyatına alınır.

Bələdiyyədən torpaq sahəsi almışam. Layihəsi, icra hakimiyyətindən icazəsi var. Çıxarış almaq üçün nə etməliyəm? Deyirlər ki, dövlət reyestri xidmətinə müraciət et, xidmət imtina versin, imtinadan məhkəməyə müraicət et. Başqa hansı yol var?

Elşən ƏLİYEV,

Bakı şəhəri

- Qeyd olunmalıdır ki, daşınmaz əmlak üzərində hüquqların dövlət qeydiyyatı üçün əsaslar və qaydalar "Daşınmaz əmlakın dövlət reyestri haqqında" Azərbaycan Respublikasının Qanununa müvafiq tənzimlənir. Həmin əsaslardan biri də qanunla müəyyən edilmiş qaydada bələdiyyə orqanları tərəfindən bələdiyyələrə məxsus olan daşınmaz əmlakın özgəninkiləşdirilməsinə dair qəbul olunmuş aktlardır. Qeyd olunan sənəddən başqa, siz "Daşınmaz əmlakın dövlət reyestri haqqında" Qanunun 10.2-ci maddəsinə əsasən, torpaq sahəsinin planı və ölçüsü; torpaq sahəsində bina, qurğu, tikililərin və digər daşınmaz əmlak (onların tərkib hissələri) yerləşirsə, onların texniki pasportu, plan-cizgisi və dövlət rüsumunun ödənilməsi barədə sənədi hüquqlarınızın qeydiyyatı ilə bağlı Daşınmaz Əmlakın Dövlət Kadastrı və Reyestrinə (DƏDKR-yə) ünvanlanacaq ərizəyə əlavə etməlisiniz. Qanunun 9.2-ci maddəsinə əsasən, DƏDKR ərizənin və ona əlavə edilən sənədlərin təqdim edildiyi gündən 10 iş günü müddətində daşınmaz əmlak üzərində hüquqları dövlət qeydiyyatına alır və elektron qaydada dövlət reyestrindən çıxarış tərtib edir. Əgər müraciətiniz yuxarıdakı meyarlara cavab verməsinə baxmayaraq, DƏDKR-dən imtina cavabı alsanız, siz inzibati prosessual qanunvericiliyə uyğun olaraq, həmin qurumdan əmlakın yerləşdiyi yer üzrə inzibati məhkəməyə şikayət edərək, inzibati orqanın üzərinə öhdəlik qoyulması ilə bağlı tələb irəli sürə bilərsiniz. 

Məhkəmə bir qayda olaraq orqanın üzərinə qeydiyyat üçün əsas olan sənədlərin qəbul olunması və həmin şəxsin əmlak hüquqlarının tanınması barədə öhdəlik qoyur və qərar vətəndaşın xeyrinə çıxarıldığı halda bunun əsasında torpağa dair çıxarış verilir.

Sualları cavablandırdı:

Fərhad NƏCƏFOV,

Azərbaycan Respublikası Vəkillər Kollegiyasının üzvü