- Əgər avtobusda və ya digər ictimai nəqliyyatda sürücü sərnişinlə kobud rəftar edərsə, nalayiq ifadələr işlədərsə və hörmətsizlik göstərərsə, sərnişin öz hüquqlarını qorumaq üçün hansı hüquqi addımları ata bilər? Bu halda hara və necə şikayət etmək olar?
Məhbubə CAHİDLİ,
Bakı şəhəri
- Sualınızda qaldırılan məsələ ilə bağlı bildiririk ki, Azərbaycan Respublikası İnzibati Xətalar Məcəlləsinin 510-cu maddəsi ilə qeyd olunan hərəkətlər xırda xuliqanlıq kimi qiymətləndirilə bilər. Yəni belə hərəkətlər ictimai qaydanı pozan, fiziki şəxslər üzərində zorun tətbiq edilməsi hədəsi ilə müşayiət edilən hərəkət hesab oluna bilər ki, bu halda sürücü 50-100 manatadək məbləğdə cərimə edilə, işin hallarına görə, pozuntunu törədənin şəxsiyyəti nəzərə alınmaqla, bu tədbirlərin tətbiqi kifayət sayılmadıqda, 15 günədək müddətə inzibati həbs oluna bilər. Eyni zamanda bu hərəkətlər "İstehlakçıların hüquqlarının müdafiəsi haqqında" qanunun tələblərinin pozuntusu kimi də qiymətləndirilməlidir, çünki bu hal daşıma xidməti üzrə keyfiyyət standartının tələblərinin pozuntusudur. Qeyd olunan halla bağlı siz Daxili İşlər Nazirliyinin "102 xidməti"nə zəng edərək hadisə barədə məlumat verə bilərsiniz ki, sürücü barəsində inzibati məsuliyyət tədbiri seçilsin. Həmçinin nəqliyyat vasitəsinin aid olduğu şirkətə və ya idarəyə yazılı və ya elektron qaydada şikayət də edə bilərsiniz. Əgər hadisə təhqir xarakterli olmaqla sizin şərəf və ləyaqətinizə toxunulubsa, siz Mülki Məcəllənin 23-cü maddəsinə əsasən, məhkəməyə müraciət edərək mənəvi zərərin ödənilməsini tələb edə bilərsiniz.
- Miras paya sərəncam verilməsinə dair müqavilənin təsdiqi üçün dövlət rüsumunun məbləği və xidmət haqqı nə qədərdir?
Lalə MUSTAFAYEVA,
Qazax rayonu
- "Dövlət rüsumu haqqında" Azərbaycan Respublikası Qanununun 10.7.1-10.7.3-cü maddələrinə əsasən, miras paya sərəncam verilməsinə dair müqavilə qiymətləndirilən müqavilə hesab olunur və əgər tərəflər ər (arvad), uşaqlar, valideynlər, baba, nənə, nəvə, qardaş, bacıdan, kənd təsərrüfatı məhsullarının istehsalı ilə məşğul olan fiziki və ya hüquqi şəxslərdən ibarətdirsə, dövlət rüsumunun məbləği 15 manat, xidmət haqqı 2 manat 25 qəpikdir. Əgər həmin şəxslər digər fiziki və hüquqi şəxslərdirsə, dövlət rüsumunun məbləği 100 manat, xidmət haqqı 15 manat təşkil edəcəkdir.
Sualları cavablandırdı:
Fərhad NƏCƏFOV,
Azərbaycan Respublikası Vəkillər Kollegiyasının üzvü
jpg_1775472819.jpg)
