A.OVERÇUK: "Bu ərazilər birgə layihələr üçün yeni imkanlar yaradır"
Azərbaycan və Rusiya Hökumətlərarası Komissiyasının budəfəki iclası işğaldan azad olunmuş Zəngilan rayonunda keçirildi. Bu, komissiyanın sayca 24-cü iclası idi və özəlliyi onda idi ki, qonaqlar "ağıllı kənd"imiz Ağalı ilə ətraflı tanış oldular.
İclas iştirakçılarının diqqətinə çatdırılıb ki, kəndin bütün evlərinə müasir kommunikasiya xətləri çəkilib, qazlaşdırma tam təmin olunub, hər bir ev kombi sistemi ilə təchiz edilib. Bununla yanaşı, ərazidə yol və səkilərin abadlaşdırılması, ictimai binaların və infrastruktur obyektlərinin istifadəyə hazırlanması istiqamətində də işlər görülüb.
İştirakçılar eləcə də Ağbənd avtomobil körpüsü, Horadiz-Ağbənd dəmir yolu layihəsi, sərhəd-keçid məntəqəsinin infrastrukturunun tikintisi ilə tanış olublar. Diqqətə çatdırılıb ki, Horadiz-Cəbrayıl-Zəngilan-Ağbənd avtomobil yolu "Şimal-Cənub" Beynəlxalq Nəqliyyat Dəhlizinin yeni qolunun əsas komponenti, Horadiz-Ağbənd dəmir yolu Zəngəzur dəhlizinin (TRIPP) mühüm halqasını formalaşdıracaq.
Rusiya Baş nazirinin müavini Aleksey Overçuk bildirib ki, iclasın Azərbaycanın Şərqi Zəngəzur iqtisadi rayonunda keçirilməsi regionda əməkdaşlığın yeni mərhələsini əks etdirir. Qeyd edək ki, Hökumətlərarası Dövlət Komissiyasının 24-cü iclasının həmsədrləri Azərbaycan tərəfdən Baş nazirin müavini Şahin Mustafayev, Rusiya tərəfdən isə Baş nazirin müavini Aleksey Overçuk olmuşlar. İclasa hər iki ölkənin müvafiq nazirlik və qurumlarının nümayəndələri qatılmışlar.
Hazırda iki ölkə arasında uğurlu əməkdaşlıq nümunələri mövcuddur və bu proses genişlənməkdədir. İkitərəfli əməkdaşlığın ardıcıl və dinamik inkişafı dövlətimizin başçısı İlham Əliyev və Rusiyanın Prezidenti Vladimir Putin tərəfindən həyata keçirilən siyasi iradə və strateji kursla müəyyən olunur. Xüsusilə 2022-ci ildə imzalanmış müttəfiqlik qarşılıqlı fəaliyyəti haqqında Bəyannamə ikitərəfli münasibətlərə mühüm təkan verir. Mürəkkəb regional şəraitə baxmayaraq, əməkdaşlıq davamlı şəkildə inkişaf edir.
Biznes dairələrinin qarşılıqlı biznes missiyalarda və beynəlxalq sərgilərdə iştiraka marağı artır. Bu da iqtisadi əlaqələrin dərinləşməsinə xidmət edir. 2025-ci ilin yekunlarına əsasən, Azərbaycan və Rusiya arasında ticarət dövriyyəsi 4,9 milyard dollara çatıb. Tərəflər mal çeşidinin genişləndirilməsi və ticarət həcminin artırılması üzərində birgə işləyirlər. İki ölkə arasında hesablaşmaların əsas hissəsi milli valyutalarla aparılır ki, bu da iqtisadi inteqrasiyanı daha da gücləndirir. Kənd təsərrüfatı məhsulları üzrə ticarət xüsusi əhəmiyyət daşıyır. Belə ki, Rusiya bazarı Azərbaycan qeyri-neft ixracının əsas istiqamətlərindən biri olaraq qalır. Bir sözlə, ticarət-iqtisadi əməkdaşlığı Azərbaycan-Rusiya münasibətlərinin əsas istiqamətlərindəndir.
Təsadüfi deyil ki, Baş nazirin müavini Şahin Mustafayev öz çıxışında investisiya əməkdaşlığının müsbət dinamikasını xüsusi qeyd edib. Bildirilib ki, Rusiyanın Azərbaycana yatırdığı ümumi investisiyaların həcmi 10,5 milyard dolları, o cümlədən qeyri-neft sektorunda 2,9 milyard dolları ötüb. İnvestisiya əməkdaşlığı müsbət dinamika nümayiş etdirir və Azərbaycanda 1400-dən çox Rusiya şirkəti fəaliyyət göstərir. Eyni zamanda Azərbaycan investisiyalarının da Rusiya iqtisadiyyatında mövqelərinin möhkəmləndiyi, sanatoriya, sənaye və istehsal layihələrinin uğurla icra olunduğu bildirilib.
Nəqliyyat-logistika sahəsi əməkdaşlığın prioritet istiqamətlərindən biri kimi dəyərləndirilir. İclasda xüsusilə "Şimal-Cənub" Beynəlxalq Nəqliyyat Dəhlizinin inkişafının strateji əhəmiyyəti vurğulanıb, dəhliz üzrə infrastrukturun modernləşdirilməsi və rəqəmsallaşdırmanın yükdaşımaların həcmini əhəmiyyətli dərəcədə artıracağı qeyd olunub. Bildirilib ki, 2028-ci ildən etibarən Azərbaycan ərazisindən illik daşımaların həcmi azı 5 milyon ton, sonrakı mərhələdə isə 15 milyon ton səviyyəsinə çatdırılacaq.
Araz Vadisi İqtisadi Zonasında "KamAZ" servis mərkəzinin və Qubadlının Mahruzlu kəndində Həştərxan qubernatorluğu tərəfindən uşaq bağçasının tikintisi əməkdaşlıq nümunəsi kimi yüksək qiymətləndirilir.
Rusiya Federasiyası Hökuməti sədrinin müavini Aleksey Overçuk ölkələrimiz arasında əməkdaşlığın strateji xarakter daşıdığını qeyd edib. Nəqliyyat-logistika, sənaye və aqrar sahələrinin əsas prioritetlər olduğu, "Şimal-Cənub" Beynəlxalq Nəqliyyat Dəhlizinin inkişafının regional və beynəlxalq ticarət əlaqələrinin genişlənməsində mühüm rol oynadığı vurğulanıb. A.Overçuk Zəngilanda aparılan bərpa işlərini yüksək qiymətləndirərək, bu ərazilərin birgə layihələr üçün yeni imkanlar yaratdığını da bildirib.
Aparılan müzakirələr göstərdi ki, tərəflər ticarət, investisiya, maliyyə, nəqliyyat, kənd təsərrüfatı, energetika, turizm və humanitar sahələr üzrə əməkdaşlığın perspektivli olmasında maraqlıdırlar. Azərbaycanda və Rusiyada avtomobil nəqliyyatı üçün elektron beynəlxalq yük qaiməsi (e-CMR) tətbiqi üzrə şəraitin yaradılmasına dair imzalanan "Yol Xəritəsi" ölkələrimiz arasında ticarət-iqtisadi əməkdaşlığın genişləndirilməsini, qarşılıqlı investisiyaların təşviqini, eləcə də müxtəlif sahələr üzrə birgə layihələrin həyata keçirilməsini nəzərdə tutur.
İclasın yekunlarına dair imzalanan protokol da Azərbaycan-Rusiya münasibətlərinin qarşılıqlı hörmət, etimad və tərəfdaşlıq prinsipləri əsasında inkişaf etdiriləcəyini, əldə olunmuş razılaşmaların ardıcıl şəkildə icrasının davam etdiriləcəyini vurğulayır.
Flora SADIQLI,
"Azərbaycan"
jpg_1775472819.jpg)
