Azərbaycanın liderliyi ilə region ölkələri yeni dövrə qədəm qoyur
Bu gün Cənubi Qafqaz böyük dəyişikliklər dövrünü yaşayır. Uzun illər davam edən münaqişələr və gərginliklər artıq tarixin arxivinə gedir. Bölgədə sülhə, əmin-amanlığa, əməkdaşlığa xidmət edən yeni dövr başlayır. Bu yeni dövrün memarı isə apardığı uzaqgörən və məqsədyönlü siyasətlə dünyada böyük nüfuz qazanan Azərbaycan dövlətidir.
Aprelin 6-da Prezident İlham Əliyevin Gürcüstana etdiyi dövlət səfəri və orada səsləndirdiyi fikirlər də bir daha təsdiqlədi ki, sülh ünvanına çevrilən Cənubi Qafqaz artıq mühüm iqtisadi mərkəz kimi də mövqelərini möhkəmləndirir.
Yaranmış bu fürsət əldən verilməməlidir
Azərbaycanın son illərdə atdığı strateji addımlar Cənubi Qafqazda onilliklər boyu kök salmış münaqişəni tamamilə aradan qaldırdı. Hərbi və siyasi qələbəsi ilə regionda yeni reallıqlar yaradan Bakı həm də Cənubi Qafqazın iqtisadi potensialını önə çıxararaq bölgəni dünya üçün cəlbedici mərkəz halına gətirdi. İlk növbədə də bununla region ölkələri yeni və daha perspektivli inkişaf imkanları əldə etdilər.
Azərbaycanın yaratdığı yeni reallığın ən mühüm özəlliyi isə təkcə özünün yox, digər region ölkələrinin də inkişafını ehtiva etməsidir. Ölkəmiz bölgədə, sözün əsl mənasında, "Qordi düyünü"nə çevrilmiş mürəkkəb münaqişəni öz gücü ilə həll edərək, Cənubi Qafqazı dünyanın ən böyük enerji və nəqliyyat qovşaqlarından birinə çevirdi. ABŞ və Çin kimi nəhəng siyasi, iqtisadi güclər belə regionun bu imkanlarından faydalanmaq niyyətlərini açıq şəkildə bildirirlər. Bütün bunlara görə də indi bölgə dövlətləri öz seçimlərini etməlidirlər. Xüsusilə də bu, Ermənistana aiddir. O mənada ki, bu ölkə ya Azərbaycanın yaratdığı yeni reallığa uyğunlaşıb tərəqqi yolunu seçməlidir, ya da köhnə və faydasız iddialarla inkişafdan kənarda olan dalan ölkə kimi qalmalıdır.
Prezident İlham Əliyev aprelin 6-da Gürcüstanda səfərdə olarkən Cənubi Qafqaz dövlətlərini yaranmış bu fürsəti əldən verməməyə çağırdı: "Bu gün Cənubi Qafqazda tamamilə yeni vəziyyət yaranmaqdadır və Cənubi Qafqazda yerləşən ölkələr bu imkanları əldən verməməlidir".
Dövlətimizin başçısı əlavə etdi ki, bu gün sülh, təhlükəsizlik, əmin-amanlıq, sabitlik əfsuslar olsun ki, dünyanın müxtəlif yerlərində pozulur və bunun nəticəsində qanlı toqquşmalar, müharibələr, əzab-əziyyət və itkilər baş verir: "Cənubi Qafqazda da vaxtilə buna oxşar mənzərə mövcud idi. Amma bu gün Cənubi Qafqaz artıq sülh, əmin-amanlıq, təhlükəsizlik, əməkdaşlıq məkanına çevrilir və mən burada Gürcüstanın rolunu da xüsusilə qeyd etmək istərdim".
Prezident İlham Əliyevin Tbilisidə də vurğuladığı kimi, bu gün Cənubi Qafqaz artıq sülh və əməkdaşlıq məkanı kimi tanınmağa başlayıb. Bu mühitdə həm də Azərbaycanın lider dövlət statusu daha da möhkəmlənib. Çünki ölkəmiz təkcə öz milli maraqlarını deyil, bütövlükdə "Qafqaz evi"nin təhlükəsizliyini və rifahını düşünən əsas tərəfdir.
Azərbaycanın yaratdığı yeni reallıqlar regionun hər bir ölkəsinə inkişaf şansı verir. Bu prosesdə ən uğurlu tərəfdaşlıq modelini biz Azərbaycan və Gürcüstan arasında görürük. İki ölkə arasında qurulan münasibətlər, sadəcə, qonşuluq deyil, həm də sarsılmaz dostluq körpüsüdür.
Bu dostluğun təməlində isə böyük layihələr dayanır. Bakı-Tbilisi-Ceyhan, "Cənub qaz dəhlizi" və Bakı-Tbilisi-Qars kimi nəhəng layihələr regionun taleyini dəyişdi. İndi isə gündəmdə olan Orta dəhliz layihəsi hər iki ölkəni dünyanın ən vacib nəqliyyat damarına çevirir. Bu dəhliz vasitəsilə yüklər Şərqdən Qərbə daha sürətlə və təhlükəsiz daşınacaq. Bununla həm Azərbaycanın, həm də Gürcüstanın büdcəsinə milyardlarla vəsait daxil olacaq, eyni zamanda bu xalqlarımızın rifahına birbaşa təsir göstərəcək.
Prezident İlham Əliyevin sözügedən səfəri zamanı vurğuladığı mühüm məqamlardan biri də Gürcüstanın müstəqil siyasəti oldu: "Təbii ki, bütün uğurların təməlində əsas şərt, əsas amil siyasi sabitlikdir. Bu siyasi sabitlik Gürcüstanda var. Bunun təminatçısı gürcü xalqıdır və Sizin apardığınız siyasətdir. Biz sizin dostlarınız, qonşularınız kimi buna sevinirik və əminik ki, Gürcüstan-Azərbaycan əlaqələri bundan sonra da inamla inkişaf edəcək".
Gürcüstanın müstəqil siyasəti Cənubi Qafqaz üçün mühüm əhəmiyyət daşıyır. Son parlament seçkilərinin nəticələri də bunu bir daha təsdiqlədi. Gürcü xalqının istəyinin təzahürü olaraq "Gürcü arzusu" Partiyasının hakim mövqeyini qoruyub saxlaması, həmçinin sözügedən partiya tərəfindən namizədliyi irəli sürülən Mixeil Kavelaşvilinin seçkilərdə qalib gələrək Gürcüstan Prezidenti seçilməsi ölkənin, xalqın taleyində mühüm dönüş oldu.
Gürcüstanın öz ayaqları üzərində möhkəm dayanması, Azərbaycan üçün də güclü və etibarlı tərəfdaş anlamına gəlir.
Sülh yolu ilə inkişaf
Azərbaycan heç vaxt təcrid siyasəti tərəfdarı olmayıb. Bakı hər zaman Cənubi Qafqazın üç dövlətinin birgə əməkdaşlığının tərəfdarı olduğunu bəyan edir. Hazırda Azərbaycanla Ermənistan arasında ticarətin Gürcüstan vasitəsilə həyata keçirilməsi də buna misaldır. Ancaq sülh yalnız kağız üzərində olmamalıdır. Bunun üçün real addımlar atılmalıdır. Əgər Ermənistan siyasi iradə nümayiş etdirib regional layihələrə qoşulsa, bu, ən çox onun öz iqtisadiyyatının xilası olacaq. Regionda yaranan bu yeni əməkdaşlıq mühiti heç kimi kənarda qoymur, sadəcə, qarşı tərəfdən siyasi iradə, sülh prosesinə sadiqlik tələb edir.
"Qafqaz evi" regionumuzun, həqiqətən də, evimiz olması kimi danılmaz fakta söykənir. Kənar qüvvələrin burada öz maraqlarını yürütməsinə imkan vermədən, üç dövlət birləşib bu evi abadlaşdırmalıdır. Bu gün dünyanın müxtəlif yerlərində müharibələr, qanlı toqquşmalar baş verdiyi bir vaxtda Cənubi Qafqazın sülh və əməkdaşlıq ünvanına çevrilməsi böyük uğurdur.
Azərbaycan hər zaman mehriban qonşuluq siyasətinə sadiqdir və digər ölkələri də buna dəvət edir. Yəni hər bir dövlət regiondakı yeni reallığa töhfə verməlidir.
Bir sözlə, Prezident İlham Əliyevin Tbilisidən bəyan etdiyi kimi, Cənubi Qafqaz dövlətləri yeni yaranmış fürsəti əldən verməməlidir. Çünki birlikdən güc doğur və bu da sabitliyin, inkişaf və tərəqqinin əsasını təşkil edir.
Yasəmən MUSAYEVA,
"Azərbaycan"
