Bakı ətraf ərazilər hesabına gündən-günə böyüyür. Paytaxtın ən yaxın qonşusu Sumqayıt da yerində saymır, çiyin-çiyinə veriblər. İndi uşaq da, böyük də bilir ki, gec-tez bu iki şəhər birləşəcək, bəlkə artıq bəzi ərazilərdə birləşiblər də... 
Bu da məlumdur ki, hər gün Sumqayıtdan Bakıya və əks istiqamətə neçə-neçə insan gedib-gəlir. Çoxu paytaxtın və Sumqayıtın müəssisə və təşkilatlarında çalışan işçilər, eləcə də tələbələrdir. Onları birləşdirən təkcə iki şəhər arasında qalmaları deyil. Həm də bu zaman hər səhər-axşam yaranan tıxac problemini yaşamalarıdır. Bu gün Sumqayıt və paytaxt arasındakı tıxac yolçuların sanki həyat tərzinə çevrilib.
Amma bu o demək deyil ki, çıxış yolu yoxdur. Var və axtaran onu tapır. Götürək Bakı-Sumqayıt-Bakı elektrik qatarını. Bu qatar işləyəndən sonra çoxları üçün Sumqayıtdan paytaxta və əks istiqamətə gedib-gəlmək xeyli asanlaşıb. Paytaxtdakı universitetdə təhsil aldığı üçün həftənin 5 günü Bakıya getməli olan İsa İbrahimov deyir ki, elektrik qatarının açılışı ilə bu problem bir qədər çözülüb: "Əvvəllər mikroavtobusla gedirdim. Səhər saat 6-da Sumqayıtdan çıxır, 8-ə işləmiş paytaxta çatırdım. Təhsil müəssisəsinə çatanda saat 9 olurdu. Tıxac üzündən dəfələrlə dərsə gecikmişəm də. İndi isə səhər 7-də Sumqayıtdan çıxan qatarla gedirəm. 45 dəqiqədən sonra Bakıya çatıram. Metrodan istifadə etməklə universitetə yarım saata yetişirəm. Artıq iki aya yaxındır dərsə belə gedirəm".
Elə bu səbəbdəndir ki, bu gün Bakı-Sumqayıt-Bakı elektrik qatarından istifadə edənlərin sayı getdikcə artır. Yeri gəlmişkən, qeyd edək ki, hazırda bu nəqliyyat istifadəçilərinin 30 faizindən çoxu gediş haqqını kart vasitəsilə ödəyir. Bu da bilet növbəsini aradan qaldırır, vaxta qənaət edir. Amma sumqayıtlı sərnişinlərin müvafiq qurumlardan bir xahişi var. İstəyirlər ki, şəhər ictimai nəqliyyatının hərəkət cədvəlini yarım saat önə çəksinlər. Çünki səhər vaxtı avtobusların sərnişinləri vağzala çatdırmasında gecikmələr baş verir. Bizə belə gəlir ki, bu, heç də həlli çətin problem deyil. 

Akif ƏLİYEV,
"Azərbaycan"