İspaniya futbolunda faciəvi hadisə yaşanıb. “Tenerife” klubunun 30 yaşlı futbolçusu Xesus de Miquel meydanda baş verən ağır toqquşmadan sonra xəstəxanada vəfat edib. Hadisə futbol ictimaiyyətində dərin kədər doğurub. Portuqaliyalı ulduz Kriştiano Ronaldo da gənc futbolçunun ölümü ilə bağlı ailəsinə başsağlığı verib.
Xesus de Miquel İspaniya çempionatının ikinci divizionu çərçivəsində doğma meydanda keçirilən “Andorra” ilə qarşılaşma zamanı rəqib komandanın qapıçısı Xesus Ovono ilə toqquşduqdan sonra ürəktutması keçirib. Futbolçu huşunu itirib. Ona ilkin tibbi yardım göstərildikdən sonra xəstəxanaya çatdırılsa da, noyabrın 3-də orada vəfat edib.
“Infobae” portalına istinad edən “İzvestiya” qəzetinin yazdığına görə, Xesus de Miquellə toqquşmadan sonra Xesus Ovono dörd ilədək azadlıqdan məhrumetmə cəzası ilə üzləşə bilər. Jurnalistlərin bildirdiyinə görə, oyun epizodu zamanı qapıçı rəqib futbolçunun sinəsinə dizi ilə güclü zərbə endirib. Ehtimal olunur ki, Ovononun hərəkətləri kobud ehtiyatsızlıq nəticəsində ölümə səbəb olma kimi tövsif edilə bilər.
Xesus de Miquelin 30 yaşı var idi. O, 2025-ci ilin yayından “Tenerife” klubunun formasını geyinirdi. Bundan əvvəl isə İspaniyanın bir sıra digər klublarında çıxış etmişdi.
“Qızıl top” mükafatının beşqat sahibi, Madrid “Real”ının sabiq hücumçusu Kriştianu Ronaldu noyabrın 4-də İnstaqram hesabında mərhum futbolçunun ailəsinə dəstək mesajı ünvanlayıb: “Faciədir... Söz tapmaq mümkün deyil. Ailəsinə güc və səbir diləyirəm. Qoy o, rahat uyusun”.
P.S. Təəssüf ki, Xesus de Miquelin faciəvi taleyi futbol tarixində yaşanan ilk belə hadisə deyil. İllər ərzində yaşıl meydan bir sıra futbolçuların son dayanacağına çevrilib. Kamerunlu Mark-Vivyen Foenin Konfederasiyalar Kubokunda, macar Mikloş Feherin “Benfika”nın heyətində keçirdiyi matçda, italiyalı Pyermario Morozininin B Seriyası qarşılaşmasında, panamalı Patrik Ekenqin isə Rumıniya çempionatında həyatını itirməsi futbol ictimaiyyətini sarsıdan faciələr kimi yadda qalıb. Xesus de Miquelin adı da təəssüf ki, meydanda həyatını itirən futbolçuların bu kədərli siyahısına əlavə olundu.
Züleyxa ƏLİYEVA,
“Azərbaycan”
jpg_1793771168.jpg)
