ABŞ-də keçirilən seçkilərdə Demokratlar Partiyası üstünlük qazanıb  

ABŞ-də keçirilən Konqresə aralıq seçkiləri ölkənin siyasi xəritəsini kökündən dəyişdirən tarixi bir hadisəyə çevrildi. Bir neçə aydır davam edən seçki kampaniyası, rekord sayda erkən səsvermə və seçicilərin yüksək fəallığı ilə yekunlaşan bu səsvermə ölkənin siyasi həyatında yeni reallıqlar formalaşdırdı. 

İlk nəticələrə görə, Demokrat Partiyası Senatda üstünlüyü ələ alıblar. Senatda çoxluğu təmin etmək üçün tələb olunan minimal hədd 51 mandatdır. Demokratlar 54 yerə qədər irəliləməyə nail olublar. Respublikaçıların ən güclü olduğu Texas ştatında Demokrat namizəd Ceyms Talariko qalib gəlib və 1988-ci ildən bəri ilk dəfə bu ştatda Senat yerini öz partiyasına qazandırıb. Texasdakı bu tarixi səsvermə seçki kampaniyasının ən baha başa gələn mübarizələrindən birinə çevrilib.   

Anadolu Agentliyinin məlumatına görə, Demokratlar Senatda Şimali Karolina, Cənubi Karolina, Ohayo, Kanzas və Ayova ştatları üzrə Respublikaçılardan üstün olublar. Nümayəndələr Palatası üçün gedən mübarizədə isə Demokratlar 173, Respublikaçılar 106 yer qazanıblar. 435 nəfərlik Nümayəndələr Palatasında səsvermənin ilkin nəticələrinə görə hesablama davam edir. Demokratların Nümayəndələr Palatasındakı rəhbəri Həkim Ceffris, Aleksandriya Okasio-Kortez və fələstinəsilli Konqres üzvü Rəşidə Tlaib yenidən seçilməyi bacarıblar. Həkim Ceffrisin bu qələbədən sonra Nümayəndələr Palatasının ilk qaradərili spikeri olacağı gözlənilir. Corciya ştatında Demokrat Keyşa Lans Botts qubernator seçilərək (səslərin 54 faizdən çoxunu toplayaraq) həm ştatın, həm də ABŞ tarixinin ilk qaradərili qadın qubernatoru olub və ştatın idarəçiliyi 24 ildən sonra Demokratlara keçib. Texasda qubernator seçimini də Demokrat namizəd Cina Hinojosa qazanıb. O, uzun illər ştata rəhbərlik edən Respublikaçı Qreq Əbbotta qalib gəlib.

ABŞ Prezidenti Donald Tramp nəticələri qəbul etməyə və Demokratlarla birlikdə işləməyə hazır olduğunu deyib. D.Tramp sosial şəbəkədə yazdığı mesajda öz adının seçki bülletenində olmadığını, əgər olsaydı böyük fərqlə qalib gələcəklərini bildirib və Texasda uduzan Respublikaçı qubernator Qreq Əbbottu tənqid edib.

Bu seçki nəticələri ABŞ-nin siyasi mənzərəsində ciddi dəyişikliklərin baş verdiyini nümayiş etdirir. Xüsusilə də ənənəvi olaraq Respublikaçıların üstün olduğu ştatlarda Demokratların qalib gəlmələri partiya balansı üçün mühüm dönüş nöqtəsidir. Konqresin hər iki palatasında və qubernatorluq səviyyəsində qazanılan üstünlük Demokratlara qanunvericilik proseslərinə daha fəal təsir etmək imkanı yaradacaq. Ağ Evlə Konqres arasında formalaşan bu yeni güc nisbəti ölkənin daxili və xarici siyasətində yeni mərhələnin başlamasından xəbər verir.

Təhminə VERDİYEVA,

“Azərbaycan”