Yeni ildən sonra Olavio Juninyonu Braziliya "Flamenqo"suna, Julio Romaonu Macarıstan "Ferensvaroş"una göndərən "Qarabağ"ın daha bir aparıcı oyunçusuna Avropadan ciddi maraq var. Belə ki, Xorvatiyanın "Dinamo Zaqreb" klubu Marko Yankoviçə menecerlər vasitəsilə xəbər göndərib.
UEFA Çempionlar Liqasının pley-off mərhələsində Ağdam təmsilçisi ilə qarşılaşmış və hər iki oyunda qalib gəlmiş Xorvatiya klubu onunla danışıqlar aparmağa hazırdır. Bunun üçün Monteneqro yığmasının üzvü məkanı dəyişmək niyyətində olub-olmaması barədə onlara qəti fikir bildirməlidir.
2022-ci il iyunun 20-dən bəri "Qarabağ"ın formasını geyinən balkanlı legioner hələlik "Dinamo"nun çağırışına reaksiya verməyib. Marko Yankoviç 1995-ci il iyulun 9-da o vaxt hələ Yuqoslaviya İttifaq Respublikası adlanan, özündə Serbiya ilə Monteneqronu birləşdirən ölkənin Setinye şəhərində dünyaya gəlib. Məşhur "Partizan"ın yetirməsidir, peşəkar futbolçu karyerasına elə burada başlayıb. Ardından "Teleoptik", OFK, "Partizan" (hamısı Serbiya), "Olimpiakos" (Yunanıstan), "Maribor" (Sloveniya), SPAL, "Krotone" (hər ikisi İtaliya), "Beytər", "Hapoel" (Təl-Əviv, hər ikisi İsrail) klublarında çıxış edib. Onun ən yüksək transfer qiyməti 2018-ci ildə qeydə alınıb. Həmin vaxt SPAL-da çıxış edən Markonun dəyəri 2,5 milyon avro olub.
125 min avro qarşılığında "Qarabağ"a transfer olunan yarımmüdafəçinin indiki dəyəri 600 min avrodur. Ağdam klubunun seleksiyaçıları onu uzun müddət izləyəndən sonra 2022-ci ilin iyununda - Avstriya toplanışının elə ilk günündə Marko ilə müqavilə imzalayıb. Onda müqaviləsi 3 illik idi, ancaq "Qarabağ" 2023-cü il sentyabrın 24-də müqavilə müddətini daha iki il artırıb.
