Xəzərin sahilində təbiətin qorunması üçün yeni bir səhifə açılır. Azərbaycanda ilk dəniz milli parkının yaradılması istiqamətində işlərə başlanılıb, ərazinin xəritələşdirilməsi artıq başa çatıb. İndi Abşeronun mühafizə olunan təbiət sərhədlərinə dəniz akvatoriyasının da əlavə edilməsi nəzərdə tutulur.
Bu barədə Bioloji Müxtəlifliyin Qorunması Xidmətinin rəis müavini Rəşad Allahverdiyev Bakıda keçirilən Birinci Azərbaycan Regional Akvakultura Forumunda çıxışı zamanı məlumat verib. Onun sözlərinə görə, hazırda ölkənin ən kiçik milli parkı hesab olunan Abşeron Milli Parkının 700 hektarlıq ərazisi dəniz istiqamətində genişləndiriləcək. Beləliklə, milli park yalnız sahilin deyil, Xəzərin müəyyən akvatoriyasının da mühafizəsini əhatə edəcək.
Bu addımın əsas məqsədlərindən biri dəniz ekosisteminin qorunması, balıq ehtiyatlarının mühafizəsi və qanunsuz ovun qarşısının alınmasıdır. Yeni ərazidə mütəmadi reydlərin keçirilməsi, nəzarət tədbirlərinin gücləndirilməsi planlaşdırılır.
Xəzərin mühafizəsi isə yalnız yeni sərhədlərin müəyyənləşdirilməsi ilə bitmir. Rəşad Allahverdiyev bildirib ki, xüsusi mühafizə olunan təbiət ərazilərində qoruma tədbirləri ilboyu davam etdirilir. Xüsusilə balıqların kürüləmə dövründə nəzarət daha da sərtləşdirilir, zəruri hallarda sutkalıq növbəli iş rejiminə keçilir.
Beləliklə, Xəzərin bir hissəsinin milli park statusu alması Azərbaycanın dəniz biomüxtəlifliyinin qorunmasında yeni mərhələnin başlanğıcı ola bilər. Xəzər artıq yalnız sahildən seyr edilən mavi mənzərə deyil, həm də xüsusi mühafizə sərhədləri ilə qorunacaq canlı təbiət məkanı olacaq.
“Azərbaycan”
314444444 - Copyjpg_1793831795.jpg)
