12 Fevral 2024 09:00
11912
SİYASƏT
A- A+

Ümumxalq etimadının zəfəri

 

Mərkəzi Seçki Komissiyası İlham Əliyevin prezident seçkilərindəki qələbəsini təsdiqlədi

 

Mərkəzi Seçki Komissiyasının dünən keçirilən iclasında 7 fevral prezident seçkilərində səsvermənin nəticələrinə dair protokol imzalanıb. Bununla da İlham Əliyevin prezident seçkilərindəki qələbəsi MSK tərəfindən təsdiq edilib. 
Mühüm siyasi kampaniya olan prezident seçkiləri elan olunduğu gündən səsvermə respublikamızın Seçki Məcəlləsinin tələbinə uyğun şəkildə həyata keçirildi. Seçki kampaniyası dövründə bütün hərəkət və tədbirlər MSK-nın təsdiq etdiyi  təqvim planı üzrə aparıldı və hər hansı qanun pozuntusu, nöqsan qeydə alınmadı. Bütün parametrləri ilə bu seçki Azərbaycanda bir daha demokratiyanın təntənəsinə çevrildi. Beynəlxalq müşahidəçilər də seçkilərin demokratik keçirildiyini bəyan etdilər.
Bu həm də torpaqlarımızın işğaldan azad edilməsindən və ərazilərimizdə erməni separatçılığına son qoyulmasından sonra Azərbaycanda keçirilən ilk seçki idi. Əvvəlki bütün seçkilərdən fərqli olaraq budəfəki seçkilər bütöv Azərbaycanda keçirildi.  Ölkə vətəndaşları həm də Qarabağ və Şərqi Zəngəzurda səs verdilər.
Ümumilikdə isə prezident seçkilərində seçicilər 125 seçki dairəsi üzrə 6537 seçki məntəqəsində öz iradələrini ifadə etdilər. Ən mühümü də odur ki, bu seçkidə seçicilər böyük ruh yüksəkliyi ilə iştirak etdilər. Səsvermədə respublika üzrə qeydə alınmış seçicilərin 76,43 faizi iştirak etdi ki, bu da yüksək seçici fəallığının göstəricisidir.  
Qeyd edək ki, hələ seçki kampaniyası zamanı cəmiyyətin siyasi əhvali-ruhiyyəsi, rəy sorğuları təsdiq edirdi ki, xalqın mütləq əksəriyyətinin seçkiqabağı ovqatı bütünlüklə İlham Əliyevin namizədliyinə dəstək üzərində köklənib. Səsvermə günü qeydə alınan nəticələr bunun təsdiqi oldu və beləliklə, 7 fevral seçkisi xalqımızın Prezident İlham Əliyevə yüksək və sonsuz etimadının və ehtiramının növbəti təntənəsinə çevrildi, ümumxalq etimadının zəfəri oldu. Xalq ona zəfər yaşadan, torpaqlarımızı işğaldan azad edən, erməni separatizminə son qoyan, Azərbaycanı tarixinin ən qüdrətli dövlətinə çevirən siyasətin ətrafında səfərbər olaraq, bütün uğurlarımızın müəllifi olan İlham Əliyevə etimad göstərdi. Seçicilərin 92,12 faizi, yaxud 4 milyon 567 min 458 nəfəri öz səsini İlham Əliyevə verdi.  Bu, İlham Əliyevə əvvəlki prezident seçkiləri ilə müqayisədə verilən ən yüksək səsdir. İlham Əliyevlə digər namizədlər arasında səs fərqi isə 40 dəfədən çox oldu. 
Budəfəki prezident seçkiləri ilə bağlı maraqlı məqamlardan biri də odur ki, bir sıra seçki məntəqələrində, o cümlədən Qarabağ və Şərqi Zəngəzurdakı seçki məntəqələrində seçicilərin 100 faizi öz səslərini İlham Əliyevə verdilər.
Fevralın 7-də keçirilən prezident seçkiləri azad, ədalətli, şəffaf, demokratik meyarlar çərçivəsində keçirilməklə ölkəmizin tarixinə növbəti mühüm siyasi-tarixi hadisə kimi həkk olundu. İlham Əliyevin ətrafında səfərbər olan xalqımız Ulu Öndər Heydər Əliyevin ideyalarının və Azərbaycanın yüksəlişinin davamına səs verdi.  Ümumilikdə isə prezident seçkiləri dövlətimizin və xalqımızın maraq və mənafelərini layiqincə təmin edən hazırkı siyasi kursun alternativsizliyini bir daha təsdiq etdi.  Seçkinin qalibi olan İlham Əliyevin liderliyi ilə Azərbaycan qarşıdakı mərhələdə öz yüksəlişinin daha möhtəşəm zirvələrinə yuksələcək.

Rəşad CƏFƏRLİ,
"Azərbaycan"

Digər Xəbərlər

QƏZETİN ÇAP VERSİYASI

XƏBƏR LENTİ Bütün xəbərlər

DİQQƏT ÇƏKƏNLƏR

ÇOX OXUNANLAR

OXUCU MƏKTUBLARI

NƏŞRLƏRİMİZ

BAŞ REDAKTORDAN

Hamımızın Azərbaycan adlı bir Vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində zəfər çalaraq erməni işğalçılarını kapitulyasiyaya məcbur etdi, düşməni qovaraq ərazi bütövlüyünə nail oldu.
Bununla da Azərbaycan yeni inkişaf dövrünə qədəm qoydu.
Bu dövrdə dünyada mürəkkəb və ziddiyyətli proseslər davam etməkdədir!
Hələ də dünyada ədalətsizliklər mövcuddur!
Hələ də dünyada ikili standartlar var!
Hələ də dünyada güclülər zəiflərin haqqını tapdalamaq istəyir!
Odur ki, biz daima güclü olmalıyıq.
Güclü olmağın əsas şərti isə bizim birliyimizdir!
Dünyanın harasında yaşamağımızdan, hansı sahədə çalışmağımızdan asılı olmayaraq, əlbir və əlaqəli fəaliyyət göstərməyi bacarmalıyıq.
Azərbaycan naminə, onun dünyada yeri, yüksək nüfuzu uğrunda daim birlikdə mübarizə aparmalıyıq.
Yalnız bu halda anamız Azərbaycanı qoruya, yüksəldə və hamımız üçün qürur mənbəyinə çevirə bilərik.
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!

TƏQVİM / ARXİV

Video