Əmək və Əhalinin Sosial Müdafiəsi Nazirliyinin tabeliyindəki Sosial Xidmətlər Agentliyinin təşkilatçılığı ilə ölkəmizə gələn ukraynalı uşaq və gənclərdən ibarət növbəti qrup Qəbələ Dövlət Tarix-Bədii Qoruğu və Qəbələ Arxeoloji Mərkəzində olub.
AZƏRTAC-ın bölgə müxbiri xəbər verir ki, qonaqları Qəbələ Arxeoloji Mərkəzinin qarşısında Dövlət Tarix-Bədii Qoruğunun direktoru Zahir Kərimov və kollektiv üzvləri qarşılayıblar.
Qəbələ Arxeoloji Mərkəzinin sərgi salonlarına baxış keçirən qonaqlara qoruğun ekskursiyaçıları tərəfindən ərazidə aparılan arxeoloji qazıntılar zamanı aşkar olunan tarixi və maddi-mədəniyyət nümunələri barədə geniş məlumat verilib. Qeyd olunub ki, Qəbələ Dövlət Tarix-Bədii Qoruğu ərazisində dövri olaraq aparılan arxeoloji qazıntılar zamanı aşkar olunan maddi-mədəniyyət nümunələri Arxeoloji Mərkəzin laboratoriyasında müvafiq tədqiq olunduqdan sonra sərgi salonunda nümayiş etdirilir.
Daha sonra qonaqlar Qəbələ Arxeoloji Mərkəzinin akt zalına dəvət olunublar və onlara mərkəz haqqında ətraflı məlumat verilib. Diqqətə çatdırılıb ki, Qəbələ Arxeoloji Mərkəzi SEBA (Seul-Bakı) Azərbaycan-Koreya Mədəniyyət Mübadiləsi Assosiasiyasının təşəbbüsü, təşkilatçılığı və maliyyə dəstəyi ilə yaradılıb.
Tədbir çərçivəsində qonaqlara “Qafqaz Albaniyasının paytaxtı – Qəbələ” filmi nümayiş olunub. Ukraynalı uşaqlar tərəfindən Ukraynanın Dövlət Himni səsləndirilib, qrupun nümayəndələrinə və azyaşlılara xatirə hədiyyələri təqdim edilib.
Məktəblilər qoruğun “Səlbir” və “Qala” adlanan arxeoloji əraziləri ilə də yaxından tanış olublar. Burada yerli və xarici arxeoloqlar tərəfindən aşkar edilmiş ictimai bina qalıqları, təsərrüfat quyuları, ocaq yerləri, su xətləri və tarixi tapıntılar haqqında məlumat verilib, qədim qala divarlarına baxış keçirilib.
Sonda qonaqlar üçün çay süfrəsi təşkil olunub, xatirə şəkilləri çəkilib.
Ukraynalı uşaqlar Qəbələ Dövlət Tarix-Bədii Qoruğundan zəngin təəssüratlarla ayrılıblar.
