Azərbaycanın Türkmənistandakı səfirliyinin təşkilatçılığı ilə xalqımızın Ümummilli Lideri Heydər Əliyevin anadan olmasının 102-ci ildönümü münasibətilə Aşqabad şəhərində “Heydər Əliyev-enerji diplomatiyası: Yaşıl dünya naminə həmrəylik” adlı konfrans keçirilib.
Bu barədə AZƏRTAC-a Azərbaycanın Türkmənistandakı səfirliyindən məlumat verilib.
Konfransda çıxış edən Azərbaycanın Türkmənistandakı səfiri Qismət Gözəlov Ulu Öndər Heydər Əliyevin həyat və fəaliyyəti, böyük dövlətçilik təcrübəsi, ölkəmizin rifahı naminə gördüyü işlər, beynəlxalq aləmdə dövlətimizin mövqeyinin möhkəmlənməsi sahəsində fəaliyyəti haqqında məlumat verib. Q.Gözəlov bildirib ki, Ümummilli Lider Heydər Əliyev müasir Azərbaycanın qurucusu olaraq, ölkənin enerji siyasətinin formalaşdırılmasında əvəzsiz rol oynayıb. Azərbaycanın dünya enerji bazarında mühüm oyunçuya çevrilməsinə zəmin yaradıb. Səfir Ulu Öndər Heydər Əliyevin enerji sahəsindəki strateji baxışını və bu sahədə atdığı əsaslı addımları xatırladaraq, onun müstəqillik dövründə reallaşdırdığı “Əsrin Müqaviləsi”nin Azərbaycanın iqtisadi və siyasi gücünə böyük töhfə verdiyini vurğulayıb. Q.Gözəlov qeyd edib ki, məhz Heydər Əliyevin təşəbbüsü ilə həyata keçirilən Bakı-Tbilisi-Ceyhan, Bakı-Tbilisi-Ərzurum, Bakı-Supsa kimi enerji layihələri Azərbaycanı qlobal enerji təhlükəsizliyinin etibarlı təminatçısına çevirib.
Alternativ enerji sahəsinə də toxunan səfir bildirib ki, Ulu Öndər Heydər Əliyevin ekoloji təhlükəsizliyə və enerji diversifikasiyasına verdiyi önəm bu gün Azərbaycanın yaşıl enerji istiqamətində atdığı addımlara güclü əsas yaradıb. Ümummilli Liderin müəyyən etdiyi enerji siyasəti bu gün Azərbaycan Prezidenti İlham Əliyevin rəhbərliyi ilə uğurla davam etdirilir. O, həmçinin COP29-da əldə edilən mühüm nəticələr haqqında məlumat verərək, Azərbaycanın beynəlxalq əməkdaşlıq və iqlim dəyişikliyi məsələlərindəki fəaliyyətlərini vurğulayıb. Eləcə də Q.Gözəlov Azərbaycanın iqlim dəyişikliyi ilə mübarizədə qlobal və regional əməkdaşlıqdakı roluna toxunub, COP29 çərçivəsində Mərkəzi Asiya ölkələri və Türk Dövlətləri Təşkilatı ilə aparılan əməkdaşlığa diqqət çəkib. Ölkəmizin təşəbbüsü ilə Azərbaycan, Qazaxıstan və Özbəkistan arasında bərpaolunan enerji sahəsində strateji tərəfdaşlıq razılaşmasının imzalandığını, Xəzər dənizi vasitəsilə Avropaya təmiz enerji ötürəcək kabel layihəsinin həyata keçiriləcəyini vurğulayıb. Bununla yanaşı, SPECA və CAREC proqramları çərçivəsində iqlim və innovasiya sahəsində yeni əməkdaşlıq təşəbbüslərinin irəli sürüldüyünü, habelə Xəzər dənizinin ekoloji və nəqliyyat məsələlərinə toxunulduğunu qeyd edib. Səfir COP29-da əldə olunan nailiyyətlərə və statistik məlumatlara diqqət çəkərək, eyni zamanda, Azərbaycanın yaşıl enerji gündəliyi, ölkəmizin alternativ enerji sahəsindəki nailiyyətləri, perspektivlər barədə iştirakçılara ətraflı məlumat verib, Azərbaycanın iqlim dəyişiklikləri ilə mübarizədə və qlobal ekoloji sabitliyin təmin edilməsində oynadığı rolu bir daha vurğulayıb.
Konfransda Türkmənistan xarici işlər nazirinin müavini Əhməd Qurbanov çıxış edərək bildirib ki, Ulu Öndər Heydər Əliyev uzaqgörənliyi və müdrikliyi ilə Azərbaycanın müasir enerji strategiyasının banisi kimi tanınır. Onun əsasını qoyduğu bu siyasət təkcə ölkənin iqtisadi müstəqilliyinin möhkəmlənməsinə deyil, eyni zamanda, enerji sahəsində beynəlxalq əməkdaşlığın dərinləşməsinə mühüm töhfə verib.
Konfransda, həmçinin Türkiyə səfiri Ahmet Demirok, Böyük Britaniya səfiri Setefen Konlon və Qazaxıstanın səfiri Nurlan Noqayev, eyni zamanda, BMT-nin Türkmənistandakı rezident əlaqələndiricisi Dmitri Şlapaçenko, BMT Baş katibinin xüsusi nümayəndəsi - BMT-nin Mərkəzi Asiyada Preventiv Diplomatiya üzrə Regional Mərkəzinin rəhbəri Kaxa İmnadze, habelə “Çalık Enerji” şirkətinin nümayəndəsi Ahmet Anıl Alişbah, “ENI” şirkətinin Türkmənistandakı təmsilçisi Corcio Kastriota Skanderbeq çıxış ediblər.
Konfrans çərçivəsində Azərbaycan Milli Məclisinin deputatı, ADA Universitetinin prorektoru Fariz İsmayılzadənin videoçıxışı da təqdim olunub, F.İsmayılzadə Ümummilli Lider Heydər Əliyevin siyasi irsinin müasir dövrdə strateji əhəmiyyət daşıdığını və xüsusilə müasir enerji diplomatiyasında bu irsin davam etdirilməsinin önəmli olduğunu qeyd edib.
Çıxışçılar Ulu Öndər Heydər Əliyevin xatirəsini ehtiramla anaraq, enerji sahəsindəki strateji təşəbbüslərə, ekoloji təhlükəsizlik və yaşıl iqtisadiyyat prinsiplərinə toxunub, regionda və qlobal səviyyədə enerji əməkdaşlığının vacibliyini və bu sahədəki gələcək inkişaf perspektivlərini qeyd ediblər.
BMT Baş katibinin xüsusi nümayəndəsi K.İmnadze çıxışında Azərbaycanın həyata keçirdiyi enerji layihələrinin önəmini vurğulayıb, eləcə də Gürcüstan Prezidenti Eduard Şevardnadzenin köməkçisi işlədiyi dövrdə Ulu Öndər Heydər Əliyevlə bağlı yaşadığı xoş xatirələrini konfrans iştirakçıları ilə bölüşüb.
Konfransda sinevizyon vasitəsilə Heydər Əliyevlə bağlı kadrlar yayımlanıb, eləcə də Azərbaycanın alternativ enerji sahəsində həyata keçirdiyi layihələr, həmçinin COP29-da əldə olunmuş nailiyyətlər və xronoloji statistik məlumatları ətraflı əks etdirən videoçarxlar nümayiş etdirilib.
Tədbirdə Azərbaycan və dünya bəstəkarlarının klassik musiqiləri ifa olunub.
