Dünyada dövlətlər arasında dostluq qarşılıqlı maraqlara əsasən formalaşır. Keçmiş nümunələrə baxdıqda, maraqlar bitəndə dostluq da bitir. Öz mənafeyinə əsaslanmayan və dünyada misilsiz olan yeganə nümunə Türkiyə ilə Azərbaycan arasındakı qardaşlıq və dostluqdur.
Bunu AZƏRTAC-a açıqlamasında Kocaeli Heydər Əliyev mədəniyyət mərkəzinin direktoru Bilal Dündar bildirib.
Onun sözlərinə görə, Ulu Öndər Mustafa Kamal Atatürk deyib ki, Azərbaycanın kədəri kədərimiz, sevinci sevincimizdir.
“İstiqlaliyyət müharibəsi zamanı qardaş Azərbaycanımız Türkiyəyə ən böyük maddi və mənəvi dəstəyi göstərib. Atatürk Nəriman Nərimanova məktub yazaraq təşəkkür etmiş və borclarını ən qısa zamanda ödəyəcəklərini bildirmişdi. Məktuba cavab isə belə idi – “Qardaşın qardaşa borcu yoxdur, qardaş qardaşın əlindən tutur”. Çanaqqala döyüşümüzdə minlərlə azərbaycanlı qardaşımız könüllü olaraq şəhid oldu. Ardınca Nuri Paşanın komandanlığı altında Qafqaz İslam Ordusu tərəfindən Azərbaycan qırğından xilas edildi. Azərbaycanın işğal olunmuş ərazilərini azad etdiyi 44 günlük qələbə müharibəsi zamanı 85 milyon əhalisi olan Türkiyə maddi və mənəvi dəstəyini dünyaya açıq şəkildə elan etdi”, - deyə mərkəzin direktoru vurğulayıb.
B.Dündar qeyd edib ki, yaralarını hələ də sağaltmağa çalışdıqları zəlzələ fəlakəti zamanı Azərbaycan ən böyük dəstəyi göstərdi, onların qəlbindəki ağrını hiss etdi və dərhal, davamlı yardım göstərdi: “Qələbə müharibəsindən sonra iki ölkənin prezidentləri strateji tərəfdaşlıqlarını davam etdirən tarixi Şuşa Bəyannaməsini imzaladılar. Qarşılıqlı münasibətlərimizin dərinliyi bütün dünyaya məlumdur. Bu güclü qardaşlıq və dostluq bağı böyüməyə və digər türk respublikalarını da əhatə edən nümunə olmağa başlayıb. Məlumdur ki, birliyimizi və həmrəyliyimizi pozmağa çalışan insanlar, hətta dövlətlər də var. Öz maraqları naminə yalan, hiylə və qərəzlə münasibətlərimizi pozmağa çalışanlar dünən də var idi, bu gün də var, sabah da mövcud olacaqlar. Biz bunu bilirik”.
B.Dündar əlavə edib ki, Türkiyə ilə Azərbaycan arasında qardaşlığı və dostluğu inkişaf etdirmək hamının borcudur.
jpg_1767695582.jpg)
jpg_1767211798.jpg)
