İspaniya hökuməti sənədsiz immiqrantlara qanuni status almağa imkan verən bir proseduru təsdiqləyib. Təxminən yarım milyon insanın bu prosesdən faydalana biləcəyi təxmin edilir.
AFP-nin məlumatına görə, ötən ilin sonuna qədər İspaniyada ən azı beş ay yaşadıqlarını sübut edə bilən qanunsuz immiqrantlar rəsmi status üçün müraciət edə biləcəklər. Solçu koalisiya partiyası "Podemos"dan olan Avropa Parlamentinin üzvü İrene Montero əvvəllər jurnalistlərə bu barədə məlumat vermişdi.
Deputatın dediyinə görə, sadəcə ərizə təqdim etmək miqranta bir il müddətinə yaşayış icazəsi və iş imkanı verəcək.
İspaniya hökumətinin bu proseduru adlandırdığı "nizamnamə" üçün müraciət edənlərin cinayət qeydləri olmamalıdır. Qanuni status onlar üçün artıq İspaniyada olan uşaqları ilə birlikdə mövcud olacaq.
İspaniya hakimiyyəti aprel ayından başlayaraq üç ay müddətinə ərizələri qəbul etməyi planlaşdırır.
Miqrasiya naziri Elma Saiz RTVE telekanalıına bildirib ki, leqallaşdırmadan sonra immiqrantlar İspaniyanın istənilən sektorunda və istənilən yerində işləyə biləcəklər. O, əmək miqrasiyasının İspaniya iqtisadiyyatı üçün vacib olduğunu və hökumətin qərarının İspaniyada yaşayan insanların "varlığını və ləyaqətini tanıdığını" vurğulayıb.
Nazir bildirib ki, hökumətin təxmini hesablamalarına görə, yarım milyon sənədsiz immiqrant bu yeni, birdəfəlik prosedurdan yararlana biləcək.
İspaniyanın Milli Statistika İnstitutunun son məlumatlarına görə, hər yeddi sakindən biri hazırda immiqrantdır. Beləliklə, ölkənin 49,4 milyon əhalisinin yeddi milyondan çoxu immiqrantdır. Onların əksəriyyəti İspaniyada qanuni yaşayır.
Rizvan CƏFƏROV,
"Azərbaycan"
