Hər il dekabrın 6-sı ölkəmizdə Rabitə və İnformasiya Texnologiyaları Sahəsi İşçiləri Günü kimi qeyd edilir. Bu gün Prezident İlham Əliyevin 2 dekabr 2006-cı il tarixli sərəncamı ilə təsis olunub.
Pabitəçilərin və informasiya texnologiyaları işçilərinin peşə bayramının məhz bu gündə qeyd olunması Azərbaycanda ilk telefon xəttinin çəkildiyi tarixlə bağlıdır. Belə ki, 1881-ci il dekabrın 6-da Bakıda "Nobel qardaşları" cəmiyyəti tərəfindən ilk telefon xətti çəkilmişdir.
Ümummilli Lider Heydər Əliyevin Azərbaycana rəhbərlik etdiyi illərdə rabitə sahəsi xüsusi inkişaf dövrü keçmişdir. Rabitə sisteminin əsas inkişafı məhz keçən əsrin 70-80-ci illərinə təsadüf edir. 1976-cı ildə təkcə Bakı telefon şəbəkəsinin gücü 1927-ci illə müqayisədə 20 dəfədən çox artmış, telefon Azərbaycan əhalisinin məişətinin ayrılmaz hissəsinə çevrilmişdir.
Həmin illərdə poçt, teleqraf və teleradio proqramlarının yayımı sahələri də diqqətəlayiq inkişaf yolu keçmişdir. 1979-cu ildə Heydər Əliyevin şəxsi rəhbərliyi altında yaradılmış komissiya tərəfindən Bakıda, köhnə teleqüllənin yaxınlığında tikilməsi nəzərdə tutulan 310 metrlik yeni teleqüllənin layihəsi təsdiq edilmiş və 1981-ci ildə obyektin tikintisinə başlanmışdır. 1990-cı illərdə Azərbaycanda informasiya kommunikasiya texnologiyaları sektoru da inkişaf etməyə başlamış, ölkədə bu yeni sektorun inkişafı prosesi sürətlənmiş, Azərbaycanın internet seqmenti genişlənmişdir.
Ölkəmizdə rabitə və informasiya-kommunikasiya texnologiyaları sektorunun hazırkı sürətli inkişafı Prezident İlham Əliyevin şəxsi diqqəti və qayğısı nəticəsində mümkün olmuşdur.
Dövlət Statistika Komitəsi tərəfindən sözügedən sahənin bu ilin yanvar-oktyabr aylarındakı göstəricilərinə aid açıqlanan rəqəmlər də həmin inkişafı təsdiqləyir. Belə ki, informasiya və rabitə sahəsində cari ilin ilk 10 ayında əvvəlki ilin müvafiq dövrü ilə müqayisədə göstərilmiş xidmətlərin dəyəri real ifadədə 12,1 faiz artaraq 2 milyard 863,6 milyon manat təşkil etmişdir. Bunun 72,3 faizi əhali tərəfindən istehlak olunmuşdur. Xidmətlərdən əldə edilən gəlirin 35,1 faizi mobil telefon rabitəsi sahəsində formalaşmışdır.
"Azərbaycan"
jpg_1733864372.jpg)
