Azərbaycan Mərkəzi Bankının (AMB) sədri Taleh Kazımov Türk Dövlətləri Təşkilatına (TDT) üzv ölkələrin mərkəzi (milli) banklarının Şurasının birinci toplantısında iştirak edib.
AMB-dan AZƏRTAC-a bildirilib ki, toplantı Qazaxıstan Milli Bankının sədri Timur Süleymenovun və Türk Dövlətləri Təşkilatının baş katibi Kubanıçbek Ömüralıyevin salamlama nitqi ilə başlayıb.
AMB sədri Taleh Kazımov çıxışı zamanı Azərbaycanda mövcud iqtisadi inkişaf trendləri barədə məlumat verib və pul siyasətinin ötürücülüyünün artırılması istiqamətində Azərbaycan Mərkəzi Bankı tərəfindən həyata keçirilən təşəbbüslərdən danışıb. O, maliyyə texnologiyalarının tətbiqinin genişləndirilməsi və rəqəmsal valyutanın inkişafı istiqamətində AMB tərəfindən atılan mühüm addımları diqqətə çatdırıb.
Taleh Kazımov Türk Dövlətləri Təşkilatının regional və qlobal əhəmiyyətli platforma kimi ölkələr və mərkəzi banklar arasında səmərəli qarşılıqlı fəaliyyətin gücləndirilməsinə xidmət edəcəyinə dair əminliyini ifadə edib.
Sədr çıxışının sonunda Türk Dövlətləri Təşkilatına üzv ölkələrin mərkəzi (milli) banklarının Şurasının növbəti toplantısının Bakı şəhərində keçiriləcəyi barədə məlumat verib.
Toplantıda Qırğız Respublikasının Milli Bankının sədri Melis Turqunbayev, Türkiyə Mərkəzi Bankının sədri Fatih Karahan, Özbəkistan Mərkəzi Bankının sədri Timur İşmetov və Macarıstan Mərkəzi Bankının icraçı direktoru Qabor Szöksün də çıxışları baş tutub.
Toplantı çərçivəsində Qazaxıstan Respublikasının Prezidenti Kasım-Jomart Tokayev Türk Dövlətləri Təşkilatına üzv ölkələrin mərkəzi (milli) banklarının sədrlərini qəbul edib.
Xatırladaq ki, ötən ilin noyabr ayında AMB sədrinin iştirakı ilə Qırğız Respublikasının Bişkek şəhərində Türk Dövlətləri Təşkilatının On Birinci Zirvə Görüşü çərçivəsində “Türk Dövlətləri Təşkilatına üzv ölkələrin mərkəzi (milli) banklarının Şurası”nın yaradılmasına dair Memorandumun imzalanma mərasimi keçirilib. Azərbaycan, Qazaxıstan, Qırğız Respublikası, Türkiyə və Özbəkistan mərkəzi banklarının sədrləri tərəfindən imzalanan Memorandumun əsas məqsədi banklar arasında əməkdaşlıq əlaqələrinin möhkəmləndirilməsinə töhfə verməkdir.
Qeyd edək ki, məsləhətçi və məşvərətçi orqan funksiyasını daşıyan Şuranın əsas vəzifəsi monetar siyasət, maliyyə sabitliyi, ödəniş sistemlərinin inkişafı, maliyyə texnologiyaları və digər qarşılıqlı maraq doğuran sahələrdə birgə məsləhətləşmələr və tədqiqatlar həyata keçirməkdir. Şura regional iqtisadi dayanıqlılığın gücləndirilməsinə, maliyyə sabitliyinin möhkəməndirilməsinə və üzv ölkələr arasında bilik mübadiləsinin təşviqinə dəstək verəcək.
jpeg_1765975443.jpeg)
