Lənkəranın seçki məntəqələrində bunun üçün bütün şərait yaradılıb

Hər ötən gün bizi sentyabrın 1-də keçiriləcək növbədənkənar parlament seçkilərinə yaxınlaşdırır. Lənkəranda da bu mühüm siyasi kampaniyaya ciddi hazırlaşırlar. Buna şahid olmaq üçün şəhərdəki bir neçə məntəqəyə baş çəkdik.
77 saylı Lənkəran şəhər seçki dairəsinin 2 saylı seçki məntəqəsi Asif Məhərrəmov adına şəhər 7 nömrəli tam orta məktəbin binasında yerləşir. Digər seçki məntəqələri kimi, bu məntəqədə də səsvermə gününə hazırlıq işləri başa çatmaq üzrədir. Məntəqə seçki komissiyasının sədri Allahverən Babayevin sözlərinə görə, dəqiqləşdirilmiş son siyahıya əsasən, məntəqədə 28 nəfər ilk dəfə səs verəcək. Ümumiyyətlə, məntəqədə seçkilərin şəffaf və demokratik keçirilməsi üçün hər cür şərait yaradılıb. Seçici siyahıları hazırdır, istənilən seçici gəlib adının siyahıda olub-olmaması ilə maraqlana bilər: "Adları seçici siyahısında olmayan şəxslər isə səsvermə günü şəxsiyyət vəsiqəsini təqdim etməklə səs vermək hüququ qazanacaqlar. Məntəqəmiz lazım olan bütün texniki avadanlıqlarla, təbliğat-təşviqat materialları ilə də təchiz olunub. Əvvəlki seçkilərdə olduğu kimi, şəffaflığın təmin edilməsi üçün gözlə görünməyən mürəkkəbdən istifadə olunacaq. Tam əminliklə deyə bilərəm ki, növbədənkənar parlament seçkilərinin şəffaf, ədalətli, demokratik və qanun çərçivəsində keçirilməsi təmin olunacaq", - deyə A.Babayev bildirdi. 
76 saylı Lənkəran-Masallı seçki dairəsinin Xarxatan  kənd tam orta məktəbinin binasında yerləşən 29 saylı seçki məntəqəsi də seçkilərə hazırlığın son mərhələsindədir. Məntəqə seçki komissiyasının sədri Faiq Babayev: 
- Məntəqəmiz səsvermə kabinələri, seçki qutuları ilə təmin olunub. Seçici siyahıları, təbliğat və təşviqat xarakterli plakatlar seçki məntəqəsinin girişində, təyin olunmuş yerlərdə asılıb. Siyasi mənsubiyyətindən asılı olmayaraq hər bir namizədin öz seçiciləri ilə görüşməsi üçün bərabər şərait yaradılıb. Söz düşmüşkən bildirim ki, deputat mandatı uğrunda mübarizə çox gərgin olacaq. Əslində bu, həm də ölkəmizdə seçkilərin  demokratik, şəffaf, azad və ədalətli keçirilməsinə yaradılan şəraitin  göstəricisidir.  
78 saylı Lənkəran kənd seçki dairəsi Girdəni kəndində yerləşir. Dairə üzrə 53 seçki məntəqəsi fəaliyyət göstərir. Dairə Seçki Komissiyasının sədri Əlövsət Rufiyevin məlumatına görə, avqustun 13-dən 16-na qədər məntəqə seçki komissiyalarının üzvləri üçün Mərkəzi Seçki Komissiyası tərəfindən maarifləndirici treninqlər keçirilib. "DSK-ya müraciət edən 14 nəfərdən 7-nin namizədliyi qeydə alınıb. Onlar xüsusi ayrılmış yerlərdə maneəsiz olaraq seçiciləri ilə görüşlər keçirmək imkanı qazanıblar", - deyə Ə.Rufiyev bildirdi. 
Ə.Rufiyevdən onu da öyrəndik ki, dairənin əhatə etdiyi bütün məntəqələr zəruri texniki avadanlıqlarla təchiz olunub. Seçici siyahıları hamının tanış ola biləcəyi yerlərdən asılıb. Seçki məntəqələrində seçkilərə hazırlıq işləri qanunvericiliyin tələblərinə uyğun aparılır. Məntəqələr işıq, qaz, rabitə, internet və tibbi xidmətlə təmin edilib.
Baş çəkdiyimiz digər seçki məntəqələrində də səsvermə gününə hazırlıq işlərinin seçki qanunvericiliyinin tələblərinə uyğun aparıldığının şahidi olduq. Gördüklərimiz onu deməyə əsas verir ki, sentyabrın 1-də Lənkəranda seçicilərin öz iradələrini sərbəst, demokratik və şəffaf şəkildə bildirmələri üçün hər cür şərait yaradılıb.
    
Seyran CAVADOV,
"Azərbaycan"