Ukrayna ilə Rusiya arasında danışıqlardan əvvəl 30 günlük atəşkəs elan edilməlidir və bu, yaxından izlənəcək. Moskva bundan imtina edərsə, o zaman Qərb ona təzyiqləri artırmalıdır.
AZƏRTAC xəbər verir ki, bu barədə Ukraynanın Prezident aparatının rəhbəri Andrey Yermak “RBC-Ukrayna”ya müsahibəsində bildirib.
Onun sözlərinə görə, Ukraynanın mövqeyi təhlükəsizlik təminatı ilə təmin olunacaq ədalətli və uzunmüddətli sülh qurmaqdır. Ona görə də ilk addım kimi hər hansı dialoqdan əvvəl 30 günlük atəşkəs elan edilməlidir. ABŞ avropalıların iştirakı ilə monitorinq imkanlarına malikdir.
O əlavə edib: “Hesab edirik ki, Avropa bütün mərhələlərdə iştirak etməlidir, çünki Ukrayna Avropanın bir hissəsidir, Ukrayna Avropa İttifaqının gələcək üzvüdür. Bundan sonra danışıqların formatı razılaşdırıla bilər”.
Dialoq zamanı Kiyev və Moskva müharibəyə son qoymaq üçün zəruri olan məsələləri müzakirə edəcəklər. O əlavə edib ki, Ukrayna aydın mövqeyə malikdir və Rusiyanın ultimatum dilində danışmasına imkan verməyəcək. Danışıqlar üçün əsas şərtlər beynəlxalq hüquq və BMT Nizamnaməsi olmalıdır.
Yermak vurğulayıb: “Rusiya razılaşarsa, o zaman biz növbəti mərhələyə keçirik ki, bu da aydındır və tərəfdaşlarımız buna hazırdır. Yoxsa, lütfən, Rusiyaya qarşı sanksiyalar və digər tədbirlərlə mütləq və dəqiq şəkildə təzyiq olmalıdır. Çünki biz Rusiyaya inanmırıq. Biz inanırıq ki, onlar yalnız güc dilini başa düşürlər. Ukrayna üçün heç bir sual yoxdur və ona görə də bu gün əsas məsələ Rusiyanın mövqeyindədir”.
Qeyd edək ki, mayın 11-nə keçən gecə Rusiya Prezidenti Vladimir Putin atəşkəs ideyasını dəstəkləməkdən imtina edib və Ukrayna ilə birbaşa danışıqların bərpası təşəbbüsünü irəli sürüb. O, eyni zamanda, mayın 15-də İstanbulda görüş keçirilməsini təklif edib.
Həmin gün səhər Ukrayna Prezidenti Volodimir Zelenski dialoqa hazır olduğunu bildirib, lakin əlavə edib ki, bunun üçün ilkin şərt mayın 12-də qüvvəyə minməli olan təsdiq edilmiş atəşkəs olmalıdır.
Daha sonra Türkiyə rəsmi olaraq Kiyev ilə Moskva arasında vasitəçi kimi çıxış etməyə hazır olduğunu təsdiqləyib.
Öz növbəsində, ABŞ Prezidenti Donald Trampın Ukraynadakı xüsusi nümayəndəsi Keyt Kelloq iki tərəf arasında danışıqların başlanmasının yalnız atəşkəs əldə edildikdən sonra mümkün olacağını vurğulayıb.
