Rəqəmsallaşma müasir dövrdə cəmiyyətin bütün sahələrinə təsir göstərməklə yanaşı, əmək bazarında da köklü dəyişikliklərə səbəb olur. Süni intellekt, avtomatlaşdırma, böyük verilənlər və rəqəmsal platformaların sürətli inkişafı ənənəvi peşə və məşğulluq formalarını transformasiya edir, yeni bacarıq və biliklərə olan tələbatı artırır. Bu proses əmək münasibətlərinin məzmununu yeniləyərək işin təşkili, icrası və idarə olunmasında çevik və texnoloji yanaşmaları ön plana çıxarır. Qlobal miqyasda rəqəmsal iqtisadiyyatın genişlənməsi əmək bazarında həm imkanlar, həm də çağırışlar yaradır. Bir tərəfdən məsafədən iş, frilans və platforma məşğulluğu kimi yeni iş modelləri formalaşır, digər tərəfdən isə bəzi ənənəvi peşələr risk altına düşür. Bu baxımdan rəqəmsallaşmanın əmək bazarına təsirinin düzgün qiymətləndirilməsi, insan kapitalının inkişafı və davamlı məşğulluğun təmin edilməsi aktual məsələlər sırasında yer alır.
Mövzu ilə əlaqədar AZƏRTAC-a açıqlamasında iqtisadçı-ekspert Eldəniz Əmirov bildirib ki, rəqəmsallaşmanın əmək bazarına bir çox istiqamətlər üzrə təsiri var.
“Ancaq ən böyük təsir deyə birini ifadə etməli olsaq, rəqəmsallaşmanın əmək bazarında bir çox peşələri tarixə qovuşdurmasıdır. Zamanla bir çox peşələr sıradan çıxır və yox olur. Məhz rəqəmsallaşma bunun sürətini daha da artırır. Yoxa çıxan peşələrin əvəzində isə müxtəlif rəqəmsal xidmətlər meydana gəldi”,- deyə o qeyd edib.
E.Əmirov vurğulayıb ki, əvvəl sahibkarlıq kontekstində ancaq yaxın ətrafla əlaqə qurmaq mümkün olurdusa, rəqəmsallaşma kontekstində artıq ucqar bir kənddə fəaliyyət göstərən bir mikrosahibkarlar planetin digər ucuna da kənddən çıxmadan öz məhsulunu online sata bilər: “Həmçinin süni intellekt fenomeni yarandı ki, bu da bir çox peşələri sıradan çıxarmağa doğru gedir. Kibertəhlükəsizlik məsələləri meydana gəldi və bu da yeni mütəxəssislərin yaranmasını da zəruri etdi. İnsanlarda analitik düşüncə bacarıqlarının inkişafına zərurət yaratdı.
Bundan başqa, distant iş rejimləri aktuallaşdı, eyni zamanda, gündəlik iş qrafiklərinin saatlıq iş qrafikləri ilə əvəz olunmasında məhz rəqəmsallaşma daha güclü təkan verdi”.
