Qusarda "Oxu bayramı"

Rayon icra hakimiyyətinin dəstəyi, Quba-Xaçmaz Regional Mədəniyyət İdarəsi Qusar Rayon Mərkəzləşdirilmiş Kitabxana Sisteminin təşkilatçılığı ilə Qusar Nəriman Nərimanov adına Mədəniyyət və İstirahət Parkında "Şəhərsalma və Memarlıq İli" çərçivəsində  "Oxu bayramı" keçirilib.

Öncə Ümummilli Lider Heydər Əliyevin və respublikamızın ərazi bütövlüyü uğrunda şəhid olmuş qəhrəmanlarımızın xatirələri birdəqiqəlik sükutla yad edilib, Azərbaycan Respublikasının Dövlət Himni səsləndirilib.

Tədbirdən əvvəl parkda kitab, rəsm və "Şəhərsalma və Memarlıq İli" çərçivəsində hazırlanmış əl işlərindən ibarət sərgiyə baxış keçirilib. Rayon icra hakimiyyətinin başçısı Sahir Məmmədxanov,  Quba-Xaçmaz Regional Təhsil İdarəsinin rəisi Coşqun Əliyev, Quba-Xaçmaz Regional Gənclər və İdman İdarəsinin rəisi Qumru Məmmədova, rayon ziyalıları,  digər idarə və müəssisə rəhbərləri sərgidə nümayiş olunan müxtəlif müəlliflərin kitabları, rəsmlər və digər əl işləri ilə tanış olublar.

Çıxış edən Sahir Məmmədxanov tədbir iştirakçılarını salamlayaraq tədbirin təşkilində əməyi olan bütün təşkilatçılara öz minnətdarlığını bildirib. Qeyd edilib ki, mütaliə cəmiyyətin intellektual potensialının formalaşmasının, milli-mənəvi dəyərlərin qorunub gələcək nəsillərə ötürülməsinin əsas mexanizmidir və informasiya bolluğu dövründə insanı səthi bilgilərdən qoruyan yeganə vasitə sistemli kitab oxumaqdır. Bildirilib ki, tarixən maarifçilik ənənələrinə sadiq olan Qusarda müasir dövrün tələblərinə uyğun onlayn kitabxana sisteminin yaradılması istiqamətində müvafiq addımların atılması zəruridir. 

Sonra İctimai televiziyada yayımlanan "Əlaçı" intellektual yarışmasının qalibləri - şəhər 1 saylı tam orta ümumtəhsil məktəbinin şagirdi Tural Sultanov  və şəhər 2 saylı tam orta məktəbin şagirdi Samirə İsabalayevaya,  o cümlədən "Sərhəd" hərbi-idman oyunlarında qələbə qazanmış Yuxarı Zeyxur kənd tam orta ümumtəhsil məktəbinin "Zeyxur" komandasının üzvləri və hərbi müəlliminə hədiyyələr təqdim olunub.

Çıxış edən YAP Qusar rayon təşkilatının sədri David İbramxəlilov qeyd edib ki, kitab insan şüurunun yaddaşı, millətin mənəvi sərvətidir və kitab oxumayan cəmiyyət öz tarixini, dilini, mədəniyyətini itirmək təhlükəsi ilə üzləşir: "Gənclərin vətənpərvərlik ruhunda tərbiyə olunması və Heydər Əliyev ideologiyasına sadiq vətəndaşlar kimi yetişməsi üçün kitabxanalarla əməkdaşlıq, kitab təbliğatı və ədəbi-mədəni tədbirlərin təşkili davamlı xarakter daşımalıdır".

Vətən müharibəsi qazisi İlkin Abuyev, şəhid Oleq Cəfərovun anası Tinatin Cəfərova, şəhid Sultan Şahvələdovun anası Məlahət Şahvələdova, Azərbaycan Yazıçılar Birliyinin üzvü Eyvaz Güləliyev, şəhər 4 saylı tam orta ümumtəhsil məktəbinin müəllimi Telli Davudova gəncləri mütaliəyə daha çox maraq göstərməyə, savadlı, dünyagörüşlü və vətənpərvər gənclər kimi yetişməyə çağıraraq belə maarifləndirici tədbirlərin mütəmadi olaraq keçirilməsinin vacibliyini diqqətə çatdırıblar.

Tədbirin bədii hissəsində məktəblilər tərəfindən vətənpərvərlik mövzusunda şeirlər səsləndirilib, musiqilər ifa edilib, rəqs kompozisiyaları təqdim edilib. Rəngarəng çıxışlar iştirakçılar tərəfindən maraqla qarşılanıb.

Akif ƏLİYEV,

"Azərbaycan"