Bizim ata-babalarımız əli iş tutandan qoyunçuluqla məşğul olublar. İndi bu peşəni biz davam etdiririk. Hələ sovet dövrü - kolxoz zamanı yayı Kəlbəcər yaylaqlarında, qışı isə doğma Bərdədə keçirərdik. Varımız, dövlətimiz aşıb-daşırdı, bərəkət, bolluq ölçüyə gəlməzdi.
Namərd qonşularımızın xəyanəti hesabına 30 il yaylaqlara həsrət qaldıq. Şükür Allaha, Ali Baş Komandan İlham Əliyevin, şanlı ordumuzun qəhrəmanlığı nəticəsində düşmən məğlub edildi. Qələbəyə hamıdan çox sevinən bəlkə də biz olduq. Axı 30 ildən sonra doğma yurd yerlərimizə, gül-çiçəkli yaylaqlarımıza qovuşmuşduq.
Hörmətli redaksiya, indi arzumuzu gözümüzdə qoyublar. Yüz bəhanə gətirib bizi yaylaqlara buraxmırlar. Uzun illər boyu sürülərimizi yay mövsümündə Kəlbəcərin Keti, Sarı yer, Qara arxac, Pişikli, Çəlik qayası, Əyri qar, Taxta düzü deyilən ərazilərində bəsləmişik. Bu yerlərin hər qarışına, hər addımına bələdik. O dağlarda qəbiristanlıq da salmışıq. Yaylaq mövsümündə dünyasını dəyişən əzizlərimizi daha Bərdəyə gətirməyib elə orada torpağa tapşırmışıq. Çünki oranı da yurd bilmişik.
Dəfələrlə Kənd Təsərrüfatı Nazirliyinə, əlaqədar dövlət qurumlarına müraciət etmişik. Amma bir nəticə yoxdur, bizi müxtəlif bəhanələrlə dağa-daşa salırlar. Biz çobanıq, istədiyimiz odur ki, bizə şərait yaradın, qayğı, diqqət göstərin, biz də əvəzində bolluq yaradaq. Nəyə görə xaricdən ət, yağ, pendir almalıyıq? Vallah, işləri yaxşı təşkil etsələr, əngəllər yaratmasalar, kiməsə möhtac olmarıq, süfrəmizin ehtiyacını özümüz ödəyə bilərik.
Hörmətli redaksiya, xeyli vaxtdır yaylaq mövsümü başlayıb. Biz isə hələ də arandayıq. Səlahiyyət sahibi olan məmurlardan xoş xəbər gözləyirik. Xahiş edirik, bizə köməyinizi əsirgəməyəsiniz, səsimizi həmin məmurlara çatdırasınız.
Bərdə rayon sakinləri:
Məmmədov Əfqan Əli oğlu
Məmmədov Ağamməd Süleyman oğlu
Əmralıyev Fariz Bəşir oğlu
Nadirov Hilal Ədil oğlu
Əhmədov Telman Süleyman oğlu
Cəmi: 30 imza
