Yatan zaman çoxlu qorxulu yuxular görə bilərsiniz. Ancaq onların hamısı kabus deyil. Kolorado Universitetinin Tibb fakültəsinin professoru Ceyms Pagel bu yuxuların və kabusların əslində yuxunun müxtəlif mərhələlərində meydana gəldiyini bildirir: "Məsələn, yuxu dövrünün ortasında dərin yuxu zamanı gecə qorxuları yaranır. Heç bir forması və ya aydın simptomları olmasa da, güclü və səbəbi bilinməyən qorxu hissi yuxudan oyanmağa səbəb olur".
Digər tərəfdən, yuxu dövrünün REM mərhələsi zamanı kabuslar baş verir. Pagelin fikrincə, kabuslar sadəcə olaraq qorxulu hekayə ilə dolu yuxulardır və demək olar ki, hər kəsdə həyatının müəyyən məqamlarında, xüsusən də uşaqlıq və yeniyetməlik dövründə baş verir.
Alim düşünür ki, kabus görmək əslində normaldır və gözləniləndir, xüsusilə də həmin gün sizi narahat edə biləcək bir hadisə baş veribsə. Buna qorxu filminə baxmağı misal çəkmək olar.
Travmasonrası stres pozuqluğu olan insanlarda daha tez-tez rast gəlinən kabusgörmənin əsas səbəbi travmatik yaşantılardır. Kabuslara meyli artıran digər bir səbəb isə REM yuxusunu tənzimləyən hormonları pozan dərmanların istifadəsi və ya hər hansı bir psixoloji pozuntunun olmasıdır.
Kabus görən insanların sinir fəaliyyətlərində anormallıqlar olması çox yayğındır. Məsələn, beynin bir bölgəsi olan amigdala (qorxu və öyrənməni idarə edən) mütəmadi olaraq kabuslar görən travmasonrası stres pozuqluğu olan xəstələrdə həddindən artıq aktiv olarkən beynin Paralimbik sistem kimi hiss mərkəzini idarə edən hissələri tez-tez kabus görən insanlarda aktivdir.
Kabuslar bəzi insanlarda, xüsusən də orta yaşlı kişilərdə REM yuxu pozuqluğuna səbəb ola bilər. Təhlükəli tərəfi odur ki, bu vəziyyət beynin yuxu zamanı əzələlərimizin hərəkət etməsinə mane olan körpü adlanan hissəsinin (pons) düzgün işləməməsinə səbəb olaraq yuxuda gəzməyə yol açır.
