Qlobal bazarlarda qızıl qiymətlərində yenidən artım müşahidə olunur.
AZƏRTAC xəbər verir ki, 2025-ci ildə qızılın bir troya unsiyasının qiyməti 2 550 dollardan 4 550 dollara yüksələrək son onilliklərin ən güclü artımlarından biri kimi qeydə alınıb.
2026-cı ilə də yüksək qiymətlərlə başlayan qızıl ABŞ-ın Venesuelaya qarşı həyata keçirdiyi əməliyyatlardan sonra 4 300 dollar səviyyəsindən 4 600 dollara qədər bahalaşıb.
Mütəxəssislərin fikrincə, ABŞ Federal Ehtiyat Sisteminin (FED) 2025-ci ilin sonunda faiz dərəcələrini azaltması və əlavə faiz endirimlərinə dair gözləntilər qızıl və gümüşün bahalaşmasında əsas rol oynayıb. Qeyd olunur ki, sonuncu dəfə qızıl qiymətlərində belə artım 1979-cu ildə baş vermişdi. Dünya üzrə mərkəzi bankların qızıl alışlarını artırması və fərdi investorların qızıl əsaslı fondlara yönəlməsi də qiymət artımını dəstəkləyən mühüm amillərdəndir.
Analitiklərin sözlərinə görə, oktyabr ayında qeydə alınan rekorddan sonra qızıl qiymətlərinin dəyişkən dinamikası bir neçə səbəblə izah olunur. Bunlardan biri investorların mənfəət götürmək məqsədilə satışlara üstünlük verməsi, digəri isə əvvəlki dövrdə həddindən artıq alışların baş verməsidir.
Ekspertlər bildirirlər ki, qlobal iqtisadi və siyasi qeyri-müəyyənliklər aradan qalxmadıqca qızıl üzrə yeni rekordlar mümkündür. “CPM Group”un rəhbəri Cefri Kristian yaxın aylarda artımın davam edəcəyini, qızılın bir troya unsiyasının 4 500 dollara çatmasının təəccüblü olmayacağını bildirib. Onun fikrincə, 2026-cı ildə qızılın 5 000 dollar olması da mümkün hesab olunur və bu, qlobal siyasi problemlərin dərinləşməsi ilə bağlıdır.
2026-cı ildə qızılın bir troya unsiyası üzrə orta qiymətin 4 300 – 4 600 dollar diapazonunda olacağı proqnozlaşdırılır və bu göstəricini daha da yüksəldə biləcək risklər mövcuddur.
Qeyd edək ki, yanvarın 9-da Nyu-Yorkun COMEX əmtəə birjasında qızılın bir troya unsiyasının qiyməti 17 dollar artaraq 4 477,7 dollar təşkil edib.
jpg_1767957259.jpg)
jpg_1767211798.jpg)
